Nonoten tan Pasesegen so Sakey tan Sakey

1, 2. Akin et asarag na 230 ya Tasi nen Jehova so death march kayari Sankamundoan a Guerra II?

NEN anampot lay uley na Nazi kayari Sankamundoan a Guerra II, ingganggan ya pateyen so nilibon priso ya walad panamairapan a kampo. Saray priso ed kampo na Sachsenhausen et panakaren anggad pier ya ditan et ilugan irad barko insan leneren irad dayat. Diad saginonor, sayan agawa et akabkabat bilang death march.

² Pinan-akar na 250 kilometro so 33,000 ya priso manlapud panamairapan a kampo ed Sachsenhausen anggad Lübeck, daongan a syudad ed Germany. Kaibad saraya so 230 ya Tasi nen Jehova a nanlapud anemiran bansa. Ingganggan ira na saray sundalo ya saniiba iran manakar. Kinmakkapuy la ran amin lapud eras tan sakit. Panon dan asarag so death march? “Manpapasesegan kamin lanang ya ag-onsusuko,” so kuan na sakey ed sikara. Likud ed inter na Dios ya “pakayari a mas mabiskeg nen say pakayari na too,” say panangaro dad sakey tan sakey so rason kanian nansiansia ran mabilay.—2 Cor. 4:7.

3. Akin et kaukolan tayon pasesegen so sakey tan sakey?

³ Tua, agtayo naeksperiensyay death march, balet dakel met so irap ya dadalanen tayo natan. Nen niletneg so Panarian na Dios nen 1914, imbantak diad dalin si Satanas, ya “agaylay pasnok to, ta amta ton antikey lay panaon to.” (Apo. 12:7-9, 12) Legan ya manasingger so Armagedon, uusaren nen Satanas iray problema pian onkapuy so espiritualidad tayo. Wadtan met iray nanduruman kapagaan. (Job 14:1; Ecl. 2:23) No maminsan, anggano mabiskeg tayod espiritual et siansia nin nadismaya tan onkapuy itayo sano nantatabunan la ray problema. Singa bilang, walay sakey a brother ya diad inlabas na dakel a taon et dakdakel so agagin apabiskeg tod espiritual. Balet sanen tinmakken la ran sanasawa et nansakit ira, kanian nadidismayan maong ed situasyon da. Singa satan a brother, amin tayo et mankaukolan na “pakayari a mas mabiskeg nen say pakayari na too” ya manlalapud si Jehova. Kaukolan tayo met ya pasesegen so sakey tan sakey.

4. Pian napaseseg tayo so arum, anton simbawa nen apostol Pablo so kaukolan tayon seryosoen?

⁴ Pian napaseseg tayo so arum, kaukolan tayon seryosoen iyan simbawa nen apostol Pablo ed saray Hebreon Kristiano: “Nonoten tayo so sakey tan sakey pian makapansasagyatan itayo a mangaro tan manggawa na maabig, ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon asingsingger lay agew.” (Heb. 10:24, 25) Panon tayon niyaplika iyan simbawa?

‘NONOTEN SO SAKEY TAN SAKEY’

5. Antoy labay ya ibaga na ‘nonoten so sakey tan sakey,’ tan panon tayon nagawaan itan?

⁵ Say labay ya ibaga na ‘nonoten so sakey tan sakey’ et “ikonsidera so pankaukolan na arum.” Kasin naamtaan tayoy pankaukolan na agagi no ibabano ti’ ra labat ed Kingdom Hall odino nakakaistoryaan tayo ran tua, balet ta nipaakar labat ed ag-importantin bengatla? Andi. Tua, agtayo labay so “mibabali ed gagawaen na arum.” (1 Tes. 4:11; 1 Tim. 5:13) Balet, pian napaseseg tayo ray agagi, kaukolan ya kabaten tayo ran maong—say kipapasen dad bilay, ugali, espiritualidad, abilidad, tan kakapuyan da. Ipalikna tayod sikara ya kaaro da itayo tan papablien ti’ ra. Kaukolan sirin ya mangigana tayoy panaon ya nakaiba iray agagi—aliwa labat no naproproblema odino onkakapuy ira.—Roma 12:13.

6. Antoy ontulong ed saray elder ya “nonoten” iray agagid kongregasyon?

⁶ Abilin iray elder ed kongregasyon ya mabulbulos tan maliket dan ‘pastolan so pulok na Dios a walad panangasikaso ra.’ (1 Ped. 5:1-3) Nagawaan da kasi itan no agda kakabaten a maong iray agagid kongregasyon? (Basaen so Uliran 27:23.) No walay panaon na saray elder parad saray kakongregasyon da tan maliket da ran nakaiba, mainomay iran asinggeran na saray agagi no kaukolan day tulong. Naibaga da met so tuan nalilikna ra tan saray kapagaan da, kanian niiter na saray elder ed saray agagi so tulong ya kaukolan da.

7. Panoy nepeg ya reaksion tayo no makapansalita na “marlas” o bengatbengat iray nadidismaya?

⁷ Sanen sinulatan nen Pablo so kongregasyon ed Tesalonica, oniay imbaga to: “Tulongan yo iramay makapuy.” (Basaen so 1 Tesalonica 5:14.) “Saray maneermen” et makapuy, ontan met ed saray nadidismaya. Oniay ibabaga na Uliran 24:10: “No onkapuy ka ed agew na kasegsegang, say kasil mo sikato so melag.” No nadidismaya so sakey a too, ompan “marlas” odino bengatbengat a mansalita. (Job 6:2, 3) Pian natulongan tayo ra, tandaan tayon no maminsan et makapangibaga ray agda met gagagalaen. Naeksperiensya iya nen Rachelle sanen a-depress ya maong so nanay to. Oniay imbaga nen Rachelle: “Mabetbet ya ansakit so panagsalita nen Nanay. Balet ipapanonot kon lanang ed sarilik no anton talagay inkatoo nen Nanay—maaro, maomaong, tan maiter. Naamtaan kon saray nadi-depress et dakel so ibabaga ran agda met gagagalaen. Aliwan maong sirin no mansalita o manggawa ti’ met na makapuy ed sikara.” Ibabaga na Uliran 19:11: ‘Say kalakal na too manggawa ed sikaton matantan a manpasnok, tan gayaga so pamalabas na pakalukso.’

8. Siopa so kakkaukolan tayon ‘paseguroan’ na panangaro tayo, tan akin?

⁸ Panon tayon ikonsidera so pankaukolan na sakey ya agin onkakapuy lapud nababaingan nin siansia ed ginawa ton lingo nensaman anggano nagbabawi la? Sinulatan nen Pablo iray taga Corinto nipaakar ed agi ya nagbabawi lad kasalanan to. Imbaga to: “Sikatoy mapangasi yon perdonaen tan ligliwaen, ta pian agnadaeg na alablabas a paneermen to. Bilinen ta kayo sirin ya ipaseguro yo ed sikato so panangaro yo.” (2 Cor. 2:7, 8) Unong ed sakey a diksiyunaryo, samay salitan “ipaseguro” et mankabaliksay “paletan” odino “paneknekan.” Agtayo iisipen ya amta la na samay too so panangaro tan panangiyansakit tayod sikato. Kaukolan ton nalikna itan diad saray ibabaga tan gagawaen tayo.

‘MANSASAGYATAN A MANGARO TAN MANGGAWA NA MAABIG’

9. Antoy labay ya ibaga na ‘mansasagyatan a mangaro tan manggawa na maabig’?

⁹ “Nonoten tayo so sakey tan sakey pian makapansasagyatan itayo a mangaro tan manggawa na maabig,” so kuan nen Pablo. No onkukuyep lay apoy, kaukolan tayon paypayan so ngalab pian ondalang. (2 Tim. 1:6) Mipadpara, sarag tayon sagyaten iray agagi ya ipanengneng so panangaro rad Dios tan ed totoo. Importante so komendasyon pian napakiwas iran manggaway maabig.

10, 11. (a) Siopa ray mankaukolay komendasyon? (b) Mangiter na alimbawa no panon ya makatulong so komendasyon ed sakey ya ‘aliwa lay aarapen to.’

¹⁰ Balanglan onkakapuy itayo odino andi, kaukolan tayoy komendasyon. “Anggan aminsan et agko nadngel si amak ya imbaga ton balibali agawaan ko,” so kuan na sakey ya elder. “Kanian binmaleg ak ya anggapoy talek kod sarilik. . . . Anggano 50 años ak la natan, siansia nin naaapresyak no ibabaga na kakaarok ya marakep so nagagawaan ko bilang elder. . . . Apaneknekan kod eksperiensyak ya talagan importantin pasesegen so arum, kanian pansasagpotan kon gawaen itan.” Say komendasyon et makapaseseg ed anggan siopa—kaiba la ray payunir, maedad, tan saray onkakapuy tan nadidismaya.—Roma 12:10.

¹¹ ‘No saray walaan na espiritual a kualipikasyon et ipetek da so sakey a too ya aliwa lay aarapen to,’ say maaron simbawa tan matukoy ya komendasyon so mamakiwas ed samay nankasalanan ya manggawa lamet na maabig. (Gal. 6:1) Naeksperiensya iya nen Miriam. Insulat to: “A-trauma ak sanen wala ray kakaarok ya inmarawi ed kongregasyon tan diad saman met lanlamang ya panaon et a-brain hemorrhage si tatay ko. A-depress ak ya maong. Pian nalabanan koy ermen ko, akiinaroan ak ed worldly.” Say pakalikna to et aglan balot naaro nen Jehova, kanian labay to lan taynan so katuaan. Balet, impanonot na elder so matoor ya impanlingkor to nensaman tan pinaseguroan ton inaro nin siansia nen Jehova. Bilang resulta, say panangaro tod si Jehova et binmiskeg lamet. Sikatoy akisian ed boyfriend ton worldly tan nanlingkor lamet ed si Jehova.

12. Antoy nagawa no ikompara, balawen, odino konsiensiaen tayo ray agagi?

¹² Nepeg ya maalwar itayo no ‘sasagyaten’ tayo ray agagi ya magmaliw a maseseg. Agtayo ra ikokomparad arum, agtayo ra babalawen sano agda nagagawaan iray labay tayo, tan agtayo ra kokonsiensiaen pian labat nakombinse ra. No ontay gawaen tayo, nayarin onseseg met ira, balet temporaryo labat. Say sankaabigan ya paraan pian ‘nasagyat’ tayo ray agagi et sano komendaan tayo ra tan ipanonot ed sikara ya say panangarod Dios so rason no akin ya nepeg tayon gawaey anggaay nayarian tayon manlingkor.—Basaen so Filipos 2:1-4.

“MANPAPASESEGAN”

13. Antoy nepeg tayon gawaen pian napaseseg tayo ray agagi? (Nengnengen so litrato ed pahina 18.)

¹³ Kaukolan ya ‘manpapasesegan itayo, nagkalalo la ta asingsingger lay agew.’ Kabaliksan na satan ya pakiwasen tayo ray agagi ya mantultuloy a manlingkor ed Dios. No say ‘pansasagyatan a mangaro tan manggawa na maabig’ et nikomparad pamaypay ed ngalab sano onkukuyep lay apoy, say pamaseseg ed arum et nikompara ed pansunglor lan pansunglor pian lalon ondalang so apoy. Napaseseg tayo ray nadidismaya no pabiskegen tan ligliwaen tayo ra. Nepeg ya maaro tan inas-asikaso so pitongtong tayod sikara. (Uli. 12:18) Ontan met, ‘nepeg ya alisto itayon ondengel’ tan “agbengatbengat a mansalita.” (Sant. 1:19) No ondengel tayon maong tan milikna tayo, naamtaan tayo no akin ya onkakapuy so sakey ya agi tan makapangibaga tayoy makatulong ed sikato.

14. Panon ya atulongan so sakey ya agin adismaya?

¹⁴ Laen tayon alimbawa so intulong na sakey ya maaron elder ed brother ya pigay taon lan inaktibo. Legan ton dedengelen imay brother, anengneng to ya siansia nin inad-aro na sayan brother si Jehova. Aaralen toy kada isyu na Say Panag-bantayan tan gagawaen toy anggaay nayarian ton regular a makapiaral. Balet, wala ray ginawa na arum ya agagi ed kongregasyon ya lapud satan et adismaya tan asakitan. Dinmengel ya maong so elder tan tinalosan toy liknaan to. Agto hinusgaan tan impaseguro to ya samay brother tan say pamilya to et inad-aro na saray agagi. Amoria met lanlamang na samay brother ya sikatoy tinmundan nanlingkor ed inad-aro ton Dios lapu labat ed makapuy ya ginawa na arum. Sikatoy intagar na elder ya manpulong. Lapud tulong na sayan elder, nagmaliw ya aktibo lamet iyan brother tan asabi panaon et nanlingkor la lamet bilang elder.

15. Antoy naaralan tayod si Jehova nipaakar ed pamaseseg ed saray onkakapuy so liknaan da?

¹⁵ No nadidismaya so sakey ya too, nayarin agton tampol awaten so tulong tayo tan agbastabasta naekal so pakakadismaya to. Kanian itultuloy tayo labat a suportaan. Imbaga nen Pablo: “Agyon balot iikbanan iray makapuy, anosan so amin.” (1 Tes. 5:14, An American Translation) Imbes ya maganggano tayon onsawa, ‘agtayon balot iikbanan’ iray makapuy tan itultuloy tayo ran tulongan. Nensaman, maan-anos si Jehova ed saray lingkor ton onkakapuy. Alimbawa, tinalosan toy liknaan nen Elias. Inter toy nakaukolan na sayan propeta pian makapantultuloy ya manlingkor. (1 Ara. 19:1-18) Maaro ton pinerdonay David sanen nagbabawi. (Sal. 51:7, 17) Tinulongan met na Dios imay nansulat na Salmo 73 sanen ngalngali la ontundan manlingkor. (Sal. 73:13, 16, 17) On, maan-anos tan maaro si Jehova, lalo lad saray nadidismaya tan onkakapuy so liknaan da. (Exo. 34:6) Say panangasi to et “balo a kinabuasan” tan “ag-onkulang.” (Tag. 3:22, 23) Labay nen Jehova ya aligen tayoy alimbawa to tan maaro tayod saray naeermenan.

MANPAPASESEGAN PIAN MANSIANSIAD DALAN YA OMPUGTAD BILAY

16, 17. Legan ya manasingger so anggaan na sayan sistema, antoy determinado tayon gawaen, tan akin?

¹⁶ Diad 33,000 ya prison nanlapud Sachsenhausen, nilibo so inatey. Balet, anggapoy anggan sakey ed saramay 230 ya Tasi nen Jehova so inatey. Baleg so agawaan na panamaseseg tan suporta rad sakey tan sakey kanian asarag da iman ya death march.

¹⁷ Manaakar tayo natan ed “dalan ya ompugta ed bilay.” (Mat. 7:14) Asingsingger la ya amin a mandadayew ed si Jehova et mankakasakey ya onloob ed balon mundo na inkatunong. (2 Ped. 3:13) Komon ta determinado itayon tulongan so sakey tan sakey pian mansiansia itayon amin ed dalan a paarap ed andi-anggaan ya bilay.