“Aaroen na Dios so Maliket a Mangiiter”

Anton klase na regalo so talagan napablim? Seguradon maliket ka no walay manregalo ed sika ta inad-aro to ka, aliwan lapud apilitan odino obligadon mangiter. Diad pangiter, importante so motibo. No importante itan ed sikatayo, di nagkalalo lad Dios. Nengnengen tayo pa imay impuyan iran salita ya insulat nen apostol Pablo diad 2 Corinto 9:7.

Diad satan a sulat, binilin nen Pablo iray Kristiano ed Corinto ya tulongan da ray kaagian dan mankaukolan diad Judea. Pinasoot to kasi ray taga Corinto ya mangiter? Andi. Imbes, oniay insulat to: “Gawaen komon na kada sakey so unong ed ginetma to ed puso to, ya aliwan ambelat ed liknaan to odino lapud napapasootan, ta aaroen na Dios so maliket a mangiiter.” Nengnengen ti pan maong iyan bilin to.

“Unong ed ginetma to ed puso to.” Say tuan Kristiano et mangiter lapud atan so desisyon to “ed puso to,” so kuan nen Pablo. Ontan met, nononoten ton maong no anto ray pankaukolan na saray kapananisiaan to. Diad orihinal ya lenguahe, samay salitan nipatalos ya “ginetma” et “mankabaliksay implano,” so kuan na sakey ya scholar. Kanian nepeg sirin ya isipen na sakey a Kristiano iray pankaukolan na kapananisiaan to tan tepetan toy sarili to no antoy nagawaan to pian makatulong.—1 Juan 3:17.

“Aliwan ambelat ed liknaan to odino lapud napapasootan.” Imbaga nen Pablo so duaran klase na panangiter ya agnepeg ed saray tuan Kristiano—amay ambelat ed liknaan tan napapasootan. Samay Griegon salita ya “ambelat ed liknaan” et literal a mankabaliksay “naeermenan.” No say sakey et ambelat ed liknaan toy mangiter, “maermen so puso to ta ngalngali agto labay so mangipaway na kuarta,” so kuan na sakey a reperensya. No say sakey met et apasootan, mangiter ta pinilit labat na arum. Labay mo tay makaawat na regalo ya nanlapud toon ambelat ed liknaan toy mangiter odino apilitan labat?

“Aaroen na Dios so maliket a mangiiter.” Imbaga nen Pablo ya no say sakey a Kristiano et mandesisyon ya mangiter, gawaen to itan ya maliket. On, maliket itayon mangiter no duga so motibo tayo. (Gawa 20:35) Sankaimano no say sakey et maliket a mangiter. Diad tua, dugaruga so salitan “maliket” pian deskribien so liknaan tan ekspresyoy lupa na angiter. Makakaliket so puso tayo no maliket imay angiter. Tan napapaliket to met so puso na Dios. Oniay impangipatalos na sakey a bersion na Biblia: “Inaro na Dios iramay labalabay day mangiter.”—Contemporary English Version.

Tandaan tayo sirin imay insulat nen apostol Pablo ya impuyan na Dios ed sikato. Antokaman so iter tayo—panaon, biskeg, o materyal—gawaen tayo komon itan ya bulos ed linawa tan lapud maliket tayon mangiter, lalo lad saramay mankaukolan. No ontan, agti labat maliket noagta iyaapit tayo met so sarili tayo ed Dios, ta “aaroen na Dios so maliket a mangiiter.”