Pablim so Pribilehyom ya Mikimey ed si Jehova!

1. Antoy nalilikna nen Jehova ed pankikimey to, tan antoy inter tod saray anghel tan totoo?

MALIKET si Jehova ed amin a gagawaen to. (Sal. 135:6; Juan 5:17) Labay ton nalikna met na saray anghel tan totoo so ontan ya liket, kanian inikdan to ra na balibali tan makapnek iran kimey. Singa bilang, kaiba to so panguloan ya Anak to diad impamalsa To. (Basaen so Colosas 1:15, 16.) Ibabaga na Biblia ya antis ya nambilay si Jesus bilang too, sikatoy walad abay na Dios bilang “uloen a komikimey.”​—Uli. 8:30.

2. Panon tayon amta ya iikdan nen Jehova iray anghel na importante tan makapaliket iran kimey?

² Manlapud Genesis anggad Apocalipsis, nabasa tayon nanduruman kimey so iiter nen Jehova ed saray anghel. Nen nankasalanan si Adan tan Eva tan pinataynan ira na Dios ed Paraison ayaman da, “impasen tod bandad bukig na hardin na Eden iray kerubin tan sakey a mandarlang ya espada ya ag-ontutundan ontetelek pian manbantay ed dalan a paarap ed kiew na bilay.” (Gen. 3:24, NW) Nabasa tayo met ed Apocalipsis 22:6 ya si Jehova et “angibaki ed anghel to pian ipanengneng ed saray aripen to iray magano lan nagawa.”

SARAY TOTOO EY?

3. Nen wadiad dalin si Jesus, panon ton inalig so alimbawa nen Ama to?

³ Nen wadiad dalin si Jesus, maliket ton ginawa so kimey ya inter nen Jehova ed sikato. Tan inalig toy alimbawa nen Ama to diad impangiter to met na importantin kimey ed saray disipulo to. Eksayted irad satan ya asainmin da ta oniay imbaga nen Jesus: “Tua kuan ko ed sikayo, Samay mangipapatnag na pananisia ed siak et gawaen to met iray kimey a gagawaen ko; tan gawaen to iray kimey a babaleg nen saraya, lapud onla ak la ed Ama.” (Juan 14:12) Pian nidanet tod sikara ya kaukolan dan apuraen iyan kimey, imbaga to: “Nepeg tayon gawaen iray kimey na samay angibaki ed siak legan ya agew ni; onsabi so labi sano anggapo lay toon makapankimey.”​—Juan 9:4.

4-6. (a) Akin et misalsalamat tayo ya ginawa di Noe tan Moises so kimey ya inter nen Jehova ed sikara? (b) Antoy duaran resulta na saray kimey ya iiter na Dios ed totoo?

⁴ Antis nin linmad dalin si Jesus, inikdan la nen Jehova na makapaliket a kimey iray totoo. Ag-agawaan nen Adan tan Eva so asainmin ya inter ed sikara, balet wala ray totoon tinmulok ed Dios. (Gen. 1:28) Singa bilang, inikdan nen Jehova si Noe na espisipiko iran instruksion ed pampaalagey na biong pian sikato tan say pamilya to et makaliktar ed baleg a Delap. Inunor to so amin ya ingganggan nen Jehova. Misalamat tayod impasyan impankimey to ta lapud satan et mabilay tayo natan!​—Gen. 6:14-16, 22; 2 Ped. 2:5.

⁵ Inikdan met nen Jehova si Moises na espisipiko iran instruksion ed pampaalagey na tabernakulo tan pangorganisa na saray saserdote. Inunor ton amin iratan. (Exo. 39:32; 40:12-16) Anggad natan et siansia nin makakaaral tayod impansagpot tan intulok nen Moises. Akin? Impaliwawa nen apostol Pablo ya irerepresenta na saratan a kabiangan na Ganggan iray “maabig ya onsabi.”​—Heb. 9:1-5, 9; 10:1.

⁶ Manguuman-uman so kimey ya iiter na Dios ed saray lingkor to, depende ed panaon tan unong ed pakakasumpal na gagala to. Balet saratan et lanang ya parad kigloriaan nen Jehova tan pakabendisyonay totoo, singa ed saray ginawa nen Jesus antis ya linma diad dalin tan legan ya wadia. (Juan 4:34; 17:4) Diad panaon tayo, saray kimey tayo et mangiglogloria met ed si Jehova. (Mat. 5:16; basaen so 1 Corinto 15:58.) Akin ya nibaga tayon ontan?

MANSIANSIAN POSITIBO ED ASAINMIN MO

7, 8. (a) Deskribien so kimey ya niiter ed saray Kristiano. (b) Antoy nepeg ya reaksion tayo ed saray uksoyan nen Jehova?

⁷ Talagan baleg ya kagalangan ya anggano agtayo perpekto et iimbitaan itayo nen Jehova ya mikimey ed sikato. (1 Cor. 3:9) Saramay kaibad panagpaalagey na Assembly Hall, Kingdom Hall, tan pasilidad na branch et mitutulongan ed literal ya panagpaalagey, a singa si Noe tan Moises. Balanglan ontutulong kad pan-renovate na Kingdom Hall odino diad pangipapaalagey ed headquarters diad Warwick, New York, pablim so pribilehyom. (Nengnengen so litratod gapo na artikulo.) Sagradon serbisyo itan. Balet tandaan, amin tayon Kristiano et kaibad espiritual ya panagpaalagey​—say panagpulong a kimey. Para met itan ed kigloriaan nen Jehova tan pakabendisyonay totoo. (Gawa 13:47-49) Panamegley na organisasyon na Dios, makakaawat tayo ray instruksion no panoy sankaepektiboan ya panggawad satan. Bilang resulta, no maminsan et nayarin manguman so asainmin tayo.

⁸ Saray matoor ya lingkor nen Jehova et akaparaan ya manpasakop ed teokratikon uksoyan. (Basaen so Hebreos 13:7, 17.) Nayarin diad gapo et agtayo natalosan ya tampol no akin ya manguuman iray uksoyan. Balet amta tayo ya no mikoopera tayo, maabig so resulta ta si Jehova so nanlapuan na saratan.

9. Anton alimbawa so ipapanengneng na saray elder ed kongregasyon?

⁹ Labalabay na saray elder ya gawaey linawa nen Jehova. Nanengneng itan ed paraan na pangidadaulo dad kongregasyon. (2 Cor. 1:24; 1 Tes. 5:12, 13) Mabulos iran mansakripisyo tan ontumbok ed saray pananguman ed uksoyan. Akaparaan dan aralen iray balon paraan na panagpulong. Anggano diad gapo et wala ray agagin manaalangan ya manpulong diad telepono, pier, o publiko iran lugar, amta na saray elder ya maabig so resulta na saratan. Singa bilang, nandesisyon so apatiran payunir ed Germany ya manpulong ed lugar na negosyo ed teritorya da ya agnakikimeyan. Say sakey ed sikara et si Michael ya manlilingkor met bilang elder. Oniay imbaga to: “Pigaran taon lan agmi ya gagawaen, kanian mannerbiyos kami. Seguro amta itan nen Jehova kanian benendisyonan toy impanpulong mid saman ya kabuasan. Malikeliket kami lapud tinumbok mi may instruksion ed Ministeryo Tayo ed Panarian tan nanmatalek kamid tulong nen Jehova!” Kasin labay mon salien ed teritorya yo iray balon paraan na panagpulong?

10. Anto ran pananguman ed organisasyon so agawa ed apalabas iran taon?

¹⁰ No maminsan, wala ray pananguman diad organisasyon. Diad apalabas iran taon, pigaran branch office so pinankasakey. Anggaman kaukolan ya man-adjust iray agagin manlilingkor ed sarayan branch, atalosan da lanlamang so pankaabigan na saratan ya pananguman. (Ecl. 7:8) Talagan maliket irayan komikimey ta walay betang da ed modernon history na totoo nen Jehova!

11-13. Anto ray naeksperiensya na arum lapud saray pananguman ed organisasyon?

¹¹ Makaaral tayod saramay direktan naapektoan na pananguman ed saratan ya branch. Say arum et pigaran dekada lan manlilingkor ed Bethel diad bansa ra. Walay sanasawan manlilingkor ed melag ya Bethel diad Central America ya inyalis ed Bethel ed Mexico a ngalngali mamin-30 so karakel na Bethelite. Inkuan nen Rogelio: “Mair-irap ya taynan so pamilya tan kakaaro.” Oniay imbaga nen Juan ya inyasain met ed Mexico: “Singa ginmapo lamet so bilay ko; kaukolan moy mananap lamet na balon kakaaro. Man-adjust kad balon kultura tan paraan na panagnonot.”

¹² Ontan met so naeksperiensya na saray Bethelite ya nanlapud pigaran bansa ed Europe ya inyasain ed branch office diad Germany. Saramay nanlapud Switzerland et naiiliw day balibalin kapalandeyan na Alps. Tan saramay nanlapud Austria et naiiliw day mas relaks ya kabibilay ed melag ya pamilyan Bethel.

¹³ Sarayan agagi ya niasain ed arum a bansa et kaukolan ya man-adjust ed balon ayaman, balon katrabaho, tan balon asainmin da. Man-adjust met irad balon kongregasyon, balon teritorya, tan ompan kaukolan day manaral na sananey ya lenguahe. Aliwan mainomay iratan ya pananguman. Balet maliket dan inawat itan. Akin?

14, 15. (a) Panon ya impanengneng na dakel ya agagi ya papablien day pribilehyo dan mikimey ed si Jehova anggan iner so asainmin da? (b) Akin et maabig iran alimbawa parad sikatayo?

¹⁴ Imbaga nen Grethel: “Inawat koy imbitasyon pian nipanengneng kon say panangarok ed si Jehova et ag-akadepende ed kawalaan kon bansa, bilding, o diad pribilehyo.” Inkuan nen Dayska: “Nen inisip kon nanlapud si Jehova so imbitasyon, malikeliket kon inawat itan.” Ontan met so alikna di André tan Gabriela: “Inisip mi ya pankanawnawa min mas lingkoran si Jehova diad agmi pangiyunad labay mi. Say kuan mi, ‘No umanen nen Jehova so siplog na dagem, mas maabig no mila ka nen say kontraen mo.’”

¹⁵ Nen impankasakey iray branch, say arum ya Bethelite et inyasain ya payunir. Ontan so agawa nen pinankasakey so branch ed Denmark, Norway, tan Sweden tan pinorma so Scandinavia branch office. Oniay imbaga nen Florian tan Anja: “Inisip min eksayting ya eksperiensya iyan balon asainmin mi. Parad sikami, maliket so manpausar ed si Jehova anggan iner so panlilingkoran mo. Talagan nibaga min abendisyonan kamin maong!” Ompan agtayo la nasali iratan ya pananguman, balet agta balibalin aligen irayan agagi ta mabulos dan iyuunay Panarian? (Isa. 6:8) Lanang ya bebendisyonan nen Jehova iramay papablien day pribilehyo dan mikimey ed sikato, inerman so asainmin da.

ITULTULOY MON PANLIKETAN SO PRIBILEHYOM YA MIKIMEY ED SI JEHOVA!

16. (a) Antoy nepeg tayon gawaen unong ed Galacia 6:4? (b) Anto so sankabalgan ya pribilehyo ya walad sikatayon amin?

¹⁶ Lapud agtayo perpekto, walay tendensia tayon ikomparay sarili tayod arum. Balet ibabaga na Salita na Dios ya manpokus tayo ed no antoy sarag tayon gawaen. (Basaen so Galacia 6:4.) Aliwan amin et nayarin magmaliw ya elder, payunir, misionero, o Bethelite. Tua, balibali iratan ya pribilehyo! Balet agtayo lilingwanan ya walad sikatayon amin so sankabalgan ya pribilehyo​—say pikimey ed si Jehova diad pangipulong ed maong a balita. Nepeg tayon pabpablien itan!

17. Antoy agnapaliisan anggad agni aderal so mundo nen Satanas, balet akin et agtayo nepeg ya nadismaya?

¹⁷ Anggad agni aderal so mundo nen Satanas, nayarin agtayo napanlingkoran si Jehova ed paraan ya labay tayo. Wala ray bengatlan agtayo kontrolado, singa say responsabilidad ed pamilya, no mansakit tayo, odino arum ni. Balet agtayo nadidismaya. Antokaman so probleman onsabi, sarag tayo nin siansia ya ipulong so ngaran nen Jehova tan say Panarian to. Say importante, gagawaen moy anggaay nayarian mo diad pikikimey mod sikato, tan ipipikasim ya tulongan to ray agagim ya lapud kipapasen da et mas dakel so nagawaan da nen say sika. Tandaan, balang sakey ya mangidadayew ed ngaran nen Jehova et mabmablid pakanengneng to!

18. Antoy agtayo iyuuna, tan akin?

¹⁸ Anggano agtayo perpekto tan wala ray kakapuyan tayo, maliket si Jehova ya usaren itayo bilang kakimeyan to. Talagan papablien tayoy pribilehyon mikimey ed Dios ed sarayan kaunoran ya agew! Kanian agtayo iyuunay labay tayo, lapud amta tayon diad balon mundo et seguradoen nen Jehova ya na-enjoy tayoy “peteg a bilay”​—say andi-anggaan a bilay ya maliket tan mareen.​—1 Tim. 6:18, 19.

19. Antoy ipaparaan nen Jehova ed sikatayo diad arapen?

¹⁹ Natan ya asingsingger lay balon mundo, isipen pa imay imbaga nen Moises ed saray Israelita nen asingger la ran onloob ed Insipan a Dalin: “Paaligwasen kayon maong nen Jehova a Dios yo diad amin a kimey na saray lima yo.” (Deu. 30:9, NW) Kayari Armagedon, saramay ginawa day anggaay nayarian da ya mikimey ed Dios et tawiren day dalin ya insipan tod sikara. Ditan et pasyaen tayo lamet so balon kimey​—gawaen tayon marakdakep ya paraiso so interon dalin!