Kasin Nadidismaya Kad Dios?

“AKIN ET SIAK NI? Akin et inabuloyan na Dios ya nagawa yad siak?” Ontan so intepet nen Sidnei ya taga Brazil, 24 años. Manlapu la nen naaksidente ed pakaruskosan na danum, wala labat lad wheelchair.

Nadidismaya iray totood Dios no mansasakit ira, inateyan ira, no walay aksidente, kalamidad o guerra. Aliwa la yan balo ta anggan si Job ya nambilay nensaman et nantutumbokan iray trahedya ya agawad sikato. Alingo nen pinalsaan toy Dios, kuan to: ‘Ontatawag ak ed sika, et agka onebat ed siak: Onalagey ak, et sankanengneng mo ak labat. Nagmaliw kan maruksa ed siak; ed pakapanyari na limam usilan mo ak.’​—Job 30:20, 21.

Ag-amta nen Job so lapuan na saray problema to tan no akin ya agawa iratan ed sikato. Maong labat ta ipapaamta na Biblia ed sikatayo no akin ya nagagawa iraya tan no antoy gawaen tayo.

GINAGALA KASI NA DIOS YA MANIRAP IRAY TOTOO?

Ibabaga na Biblia nipaakar ed Dios: “Ayadyari so gawa to; ta kaptekan so saray amin a dalan to: Sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:4) No say Dios et “matunong tan maptek,” ginagala to kasin manirap iray totoo odino usaren to ray trahedya pian dusaen tan suboken ira?

Diad tua, oniay ibabaga na Biblia: “Sano nasusubok so sakey, agto komon ibabagan: ‘Susuboken ak na Dios.’ Ta agnayarin suboken so Dios tan agto suboken so siopaman ed panamegley na mauges iran bengatla.” (Santiago 1:13) Ibabaga na Biblia ya pinalsa na Dios so inmunan too ya perpektoy bilay da. Inikdan toy Adan tan Eva na balibalin panayaman, inter toy amin ya kaukolan da, tan walay makapaliket ya kimey da. Imbaga na Dios ed sikara: “Manbunga kayo tan ondakel kayo, tan makmakan yo so dalin, tan sikato so patuloken yo.” Kanian anggapoy rason nen Adan tan Eva ya nadismaya irad Dios.​—Genesis 1:28.

Balet arawin dalin so situasyon tayo natan! Grabe ray nagagawa manlapu la nensaman. “Amin a pinalsa et saniiban oneey-ey tan nasasakitan anggad natan.” (Roma 8:22) Antoy agawa?

AKIN YA MANIIRAP TAYO?

Pian natalosan no akin ya maniirap tayo, importantin amta tayoy agawa nensaman. Inggapo itan na rebelden anghel, ya tinawag ya Satanas a Diablo. Imbaliwala nen Adan tan Eva so prinsipyo na Dios ed duga tan aliwa, ya irerepresenta na ganggan ya ag-ira mamangan ed bunga na ‘kiew na pakaamtaan na maong tan mauges.’ Imbaga na Diablo ed si Eva ya ag-ira ompatey anggano agda unoren so Dios, kanian inakusaan toy Dios ya matila. Inakusaan to met so Dios ya isisiblet tod totoo so kanepegan dan amtaen so duga tan aliwa. (Genesis 2:17; 3:1-6) Singa ibabaga nen Satanas ya mas maong no aliwan Dios so manuley. Kanian ginmapo so importantin isyu: Kasin makanepegan so Dios ya manuley?

Walay sakey nin isyu ya pinapaway nen Satanas. Inakusaan to ray totoo ya manlilingkor labat irad Dios ta walay naala ra. Oniay imbaga na Diablo ed Dios nen tutukoyen toy matoor ya toon si Job: “Agka ta nanggawa na alar ed liberliber to, tan dia ed liberliber na abung to, tan dia ed liberliber na amin a wala ed sikato? . . . Balet yunat mo so limam natan, tan diwiten mo so amin a wala ed sikato, et ikaindan to ka ed lupam.” (Job 1:10, 11) Anggano say tutukoyen dia nen Satanas et si Job, singa to papapawayen ya amin a too et makasarili so motibo ra ed panlilingkor dad Dios.

NO PANON YA INEBATAN NA DIOS IRAY ISYU

Antoy sankaabigan ya paraan pian maminpinsan ya naebatan iraman ya importantin isyu? Walay solusyon na sankarunongan ya Dios—agtayon balot nadismaya ed satan. (Roma 11:33) Pinaulyanan to ray totoo ya uleyan day sarili da pian naamtaan ed saray resulta no siopan talagay mas maong ya manuley.

Say aliwliwan situasyon na mundo natan et malinew ya ebidensya ya aga nayarian na totoo so manuley. Likud ed anggapoy kareenan, seguridad, tan liket, dederalen da met so dalin. Prueba ya tua may imbaga na Biblia: “Amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” (Jeremias 10:23) Say uley na Dios labat so seguradon makapangiter ed totoo na kareenan, liket, tan inkaaligwas, lapud atan so gagala na Dios.​—Isaias 45:18.

Panon sirin ya sumpalen na Dios so gagala tod saray totoo? Tandaan ya imbangat nen Jesus iray papatumbok to ya ipikasin: “Onsabi komon so panarian mo. Nagawa komon so linawam, a singa ed tawen, ontan met diad dalin.” (Mateo 6:10) On, onsabi panaon ya usaren na Dios so Panarian to pian ekalen so amin ya lapuan na kairapan. (Daniel 2:44) Naekal lan amin so kairapan, sakit, tan patey. Ibabaga na Biblia ya say Dios et ‘iyagel to ray mairap-bilay ya ontatawag ed sikato.’ (Salmo 72:12-14, Maung a Balita) Anggapo met lay mansakit ya singa promisa na Biblia: “Say manaayam agto naani ikuan, Mabeblay ak.” (Isaias 33:24) Imbaga nen Jesus ya ombilay iray inaatey ya walad nonot na Dios: “Onsabi so oras a saray amin a walad pakanodnonotan iran lubok et narengel day boses to tan ompaway ira.” (Juan 5:28, 29) Balibali irayan promisa na Dios!

LABANAN SO PAKAKADISMAYA

Kayari na 17 taon nen naaksidente si Sidnei, ya abitlad gapo, inkuan to: “Agko tinetel so Dios ya Jehova ed samay aksidente, balet aminen ko ya nen unaan et adismaya ak ed sikato. Wala ray panaon ya maer-ermen ak, tan onaakis ak no iisipen koy kipapasen ko. Balet, atalosan kod Biblia ya amay agawan aksidente et aliwan dusa na Dios. Ta ibabaga na Biblia ya wala ray onsabin ‘panaon tan ag-iilaloan a nagawa’ ed amin. Ombibiskeg so linawak tan pananisiak ed Dios lapud pampipikasik ed si Jehova tan pambabasak na Biblia.”​—Eclesiastes 9:11, NW; Salmo 145:18; 2 Corinto 4:8, 9, 16.

Pian nalabanan tayoy pakakadismaya tayod Dios, makatulong no isipen tayo ray rason no akin ya aabuloyan na Dios ya manirap tayo tan isipen ya asingger lan manampot iratan. Agtayo lilingwanan ya say Dios et “tumangan to iramay masimoon a manaanap ed sikato.” Amin ya walay pananisia ed sikato tan ed Anak to et agan balot nadismaya.​—Hebreos 11:6; Roma 10:11.