MANUNAN ARTIKULO | AKIN YA MAGMALIW A MATUA?

No Panon Kan Naapektoan na Ag-inkamatua

“Wala ray problema ya nasolusyonan diad daiset ya pantila.”—Samantha, South Africa.

Manisia kad satan? Singa si Samantha, amin tayo et nipapaarap ed nanduruman problema. No wala ray situasyon ya mantuksod sikatayon mantila, napatnagan ed reaksion tayo no anto ray prinsipyo tayod bilay. Singa bilang, no agtayo labay so napabaingan, ompan isipen tayon kaukolan so mantila. Balet no ompaway so tua, mabetbet ya makapuy iray resulta na satan. Imanoen pa iraya.

DERALEN NA AG-INKAMATUA SO PANAGMATALEK

Importante so panagmatalek pian napaelet so relasyon. No say duaran too et walay talek dad sakey tan sakey, anggapoy paga da. Balet agniwala ya tampol so panagmatalek. Nawalaan iray talek no naynay iran maniiba, ag-ira mantitilaan tan ag-ira makasarili. Balet anggan diad maminsan labat ya pantila, naderal so talek. Tan no aderal itan, mairap lan ipawil.

Asalim lay tinilaan na ipapasen mon kaarom? Antoy aliknam? Nayarin asakitan ka, ya singa ka trinaidor. Natural labat itan. Agla pankelawan ya deralen na ag-inkamatua so malet a relasyon.

MAKAALIS SO AG-INKAMATUA

Diad impanaral nen Robert Innes, sakey a propesor ed economics diad University of California, naamtaan to ya “talagan makaalis so ag-inkamatua.” Kanian say ag-inkamatua et singa virus—no lanang mon kaulop so toon agmatua, mainomay kan “naalisan.”

Antoy ontulong pian agka naalisan na ag-inkamatua? Makatulong so Biblia. Imanoen iray pigaran prinsipyod Biblia.

Saray Kagagawan Aliwan Matua

Panagtila

ANTO IYA? Pangibagay aliwan tua ed sakey a kanepegan ton naamtaay tua. Kaibad saya so agpangibagay duga odino pamikewet ed katuaan pian naloko so sakey a too, agpangibagad importantin impormasyon pian napalikdo so sakey, pangibagay sobran detalye pian manisia so arum anggano aliwa.

NO ANTOY IBABAGA NA BIBLIA: “Kabusol nen Jehova so sakey a mapalikdo, balet Sikatoy maapit a kaaro na maptek a too.” (Uliran 3:32, NW) “Natan ta nilakseb yo lay katilaan, kada sakey ed sikayo so mansalita na katuaan ed kapara ton too.”—Efeso 4:25.

Panagpauges

ANTO IYA? Pangibagay aliwan tua tan mauges iran salita a maneral ed reputasyon na sakey.

NO ANTOY IBABAGA NA BIBLIA: “Samay managgaway gulo et pansesengegay agpantatalosan, tan say managpauges et pansisianen toy maapit a sankakaaro.” (Uliran 16:28, NW) “No anggapo lay kiew, naerep so apoy, tan no anggapoy managpauges, ontunday kolkolan.”—Uliran 26:20, NW.

Panagsaol

ANTO IYA? Panloko ed sakey a too pian makala na kuarta odino kayarian to.

NO ANTOY IBABAGA NA BIBLIA: “Agyo sasaolen so mairap-bilay tan walad pankaukolan a miuupan aripen.” (Deuteronomio 24:14, 15, Maung a Balita) “Say manasaol ed pakaskasi et iinsultoen toy Manamalsa to, balet siopaman a mangipapatnag na panangabagey ed mairap-bilay et mangiglogloria ed Sikato.”—Uliran 14:31, NW.

Panagtakew

ANTO IYA? Pangalay kayarian na arum ya ag-impatanir.

NO ANTOY IBABAGA NA BIBLIA: “Say managtakew et agla mantakew, noagta sikatoy mansagpot, a gawaen toy maong a kimey diad panamegley na saray lima to, ta pian walay inabang to ed siopaman a mankaukolan.” (Efeso 4:28) “Agkayo patitilaan. . . . Saray matakew, odino saray maagum, odino saray managbuanges, odino saray manag-ayew, odino saray managkatkat et agda natawir so panarian na Dios.”—1 Corinto 6:9, 10.