Anton Talaga so Itsura nen Jesus?

Anggapon balot so akapanlitrato ed si Jesus. Tan agmet angupa na mangipinta ed sikato odino mangiyukit na monumento to. Pero diad nilasus lan taon et dakel ya artist so angi-drowing odino nanggaway estatua to.

Siempre, agda amta no anton talagay itsura nen Jesus. Mabetbet ya sikatoy indrowing da base ed kultura, relihyon, tan say panlabayan na nampagawa. Pero lapud sarayan painting tan estatua, naimpluensyaan so iisipen na totoo ed si Jesus tan ed saray bangat to, tan ompan aliwa ni ingen so papanisiaan da.

Wala ray artist ya say impangi-drowing dad si Jesus et makakkapuy so itsura to, andukey so buek to, maimpis so balbas to, tan maermen so lupa to. Diad arum balet et singa anghel so itsura to anggan nen wadiad dalin, walay malimpek ya sinag ed petek na ulo to, tan ngalngali agnaasinggeran na totoo. Duga kasi iratan ya deskripsion dad si Jesus? Panon tayon naamtaan no anton talagay itsura to? Nengnengen tayoy ibabaga na Biblia pian walay ideya tayo. Makatulong met itan pian duga so isipen tayod si Jesus.

“ANGIPARAAN KAY SAKEY A LAMAN PARAD SIAK”

Posiblin imbaga itan nen Jesus diad samay pikakasi to nen abautismoan. (Hebreo 10:5; Mateo 3:13-17) Antoy itsura na impanlaman to? Manga 30 ya taon antis to ’tan, impaamta nen anghel Gabriel ed si Maria: “Manlukon ka tan mangiyanak kay sakey a laki, . . . [say] Anak na Dios.” (Lucas 1:31, 35) Kanian perpekto si Jesus, ya singa si Adan, nen ginawa na Dios. (Lucas 3:38; 1 Corinto 15:45) Seguradon maong so impanlaman to, tan nayarin kalupa toy nanay ton si Maria, ya sakey ya Judio.

Walay balbas nen Jesus ta atan so apasalan na saray Judio, aliwan singa saray Romano. Pakapatnagan itan ya say sakey et walaan na dignidad tan igagalang. Maayos itan ya nengnengen tan aliwan andukdukey. Seguradon pinansiansia nen Jesus ya maayos so balbas to tan duga labat so karukey to, tan pakakatlian toy buek to. Saray Nazareo labat ya singa si Samson so agmanpapakatli na buek.​—Numeros 6:5; Ukom 13:5.

Dakel a taon ya nantrabaho si Jesus bilang karpentero, ya manu-mano iray kagawaan to. (Marcos 6:3) Seguradon mabiskeg sirin si Jesus. Diad gapo na ministeryo to, “pinapaway tod templo iramay amin a walaan na saray karnero tan baka, tan inkakalbo to iray sinsilyo na saray managsalat na kuarta tan imbabalintuag to iray lamisaan da.” (Juan 2:14-17) Nagawaan labat itan na mabiskeg ya laki. Inusar nen Jesus so laman ya imparaan na Dios parad sikato pian sumpalen so pagagawa na Dios. Imbaga to: “Kaukolan ko met ya iyabawag ed arum a syudad so maong a balita na Panarian na Dios, ta saya so angibakian ed siak.” (Lucas 4:43) Seguradon mapaot tan mabiskeg si Jesus ta inakar toy interon Palestina pian iyabawag itan ya mensahe.

“DAGO KAYOD SIAK, . . . TAN PAMPAINAWAEN TA KAYO”

Seguradon maar-aro tan maamo so itsura nen Jesus nen imbaga to itan kanian saramay “mansasagpot tan nabebelatan” et asagyat iran ondengel ed sikato. (Mateo 11:28-30) Lapud inkauyamo tan kamaongan to et amta dan tua imay impromisa to ya nainawaan ira. Anggan saray ugugaw et labalabay day Jesus, ta oniay ibabaga na Biblia: “Nilalakap to ray ugugaw.”​—Marcos 10:13-16.

Anggano mapmaermen si Jesus antis ya inatey, agto labay ya ibagan agto antay manliket. Diad tua, diad sakey ya bansal ed Cana et ginawa ton maabig ya klase na alak so danum pian tuloytuloy so panliket na saray bisita. (Juan 2:1-11) Wala ni ra ingey arum ya okasyon ya nila to tan angibangat diman na agnalingwanan iran leksion.​—Mateo 9:9-13; Juan 12:1-8.

Tan manuna ed amin, lapud panagpulong nen Jesus et naamtaan na totoo so maliket ya ilalod arapen. (Juan 11:25, 26; 17:3) Nen inreport ed sikato na 70 ya disipulo to iray agawad impanpulong da, “sikatoy aliketan a maong” tan imbaga to: “Manliket kayo lapud nisulat lad tawen so kangaranan yo.”​—Lucas 10:20, 21.

“ALIWA KAYO KOMON YA ONTAN”

Nanggaway paraan iray lider na relihyon diad panaon nen Jesus pian napansin ira tan ipanengneng ya walay autoridad da. (Numeros 15:38-40; Mateo 23:5-7) Pero binilin nen Jesus iray apostol to ya ag-ira “pakakatawan” ed saray totoo. (Lucas 22:25, 26) Diad tua et pinasakbayan ira nen Jesus: “Manalwar kayod saray eskriba a labalabay day manakar-akar ya akakawes na andurukey tan labalabay day paibano diad saray tindaan.”​—Marcos 12:38.

Duma si Jesus ed saratan ya lider na relihyon ta mimiulop ed saray totoo, tan aminsan et ag-ingen abirbir na saray manaanap ed sikato. (Juan 7:10, 11) Anggano kaiba to ray 11 ya matoor ya apostol to, agmet nibagan nikadkadumay itsura tod sikara. Ta kaukolan ni ingen ya angoban nen Judas bilang palatandaan pian saramay mangarestod si Jesus et nabirbir da.​—Marcos 14:44, 45.

Tua ya dakel so detalyin agtayo amta tungkol ed itsura nen Jesus, pero mapatpatnag ya aliwa iramay indrowing na totoo ya itsura to. Pero walay mas importante nen say itsura to, satan et no antoy pangipapasen tayod sikato natan.

“AGLA MANBAYAG ET AGAK LA NANENGNENG NA MUNDO”

Pigaran oras kayarin imbaga nen Jesus iratan, sikatoy pinatey tan imponpon. (Juan 14:19) Inter toy bilay to a “panondon ed amayamay.” (Mateo 20:28) Diad komatlon agew, binilay lamet na Dios “ed espiritu” tan “inabuloyan ton manpanengneng” ed arum ya disipulo to. (1 Pedro 3:18; Gawa 10:40) Antoy itsura nen Jesus nen nampanengneng ed saray disipulo to? Mapatnag ya duma ed datin itsura to, ta anggan saray disipulo to ya naynay ton kaiba et agda abirbir. Nen anengneng nen Maria Magdalena, say amta to et hardinero; tan ag-abirbir na duaran disipulo to ya kabansag ton nanakar ed dalan ya paonlad Emaus.​—Lucas 24:13-18; Juan 20:1, 14, 15.

Antoy dapat ya pangipasen tayod si Jesus natan? Kayari masulok ya 60 ya taon manlapud impatey nen Jesus, say inar-aro ton apostol ya si Juan et akanengneng na saray pasingawey tungkol ed si Jesus. Say anengneng ton Jesus et aliwan manpapanabos ed krus. Say anengneng to et “Ari na saray arari tan Katawan na saray katawan,” say Ari na Panarian na Dios ya asingger lan maneral ed saray kabusol na Dios, demonyo man odino too, tan iter toy tuloytuloy ya bendisyon ed saray totoo.—Apocalipsis 19:16; 21:3, 4.