Kasin Antam La?

Duga kasin tawagen ya “matatakew” iray negosyante ya manlalako na ayayep diad templo ed Jerusalem?

BASE ed salaysay na Ebanghelyo nen Mateo, “linmoob si Jesus ed templo tan pinapaway to so amin a managlako tan managsaliw diman, tan imbabalintuag to ray lamisaan na saray managsalat na kuarta tan saray yurongan na saray manlalako na malapati. Tan inkuan tod sikara: ‘Walan nisulat, “Say abung ko et natawag ya abung a panagpikasian,” balet gagawaen yo iyan ungib na matatakew.’”​—Mat. 21:12, 13.

Base ed history na saray Judio, sasamantalaen na saray negosyante iray mangasaliw ta mabmabli so panaglako da. Singa bilang, inrekord na Mishnah (Keritot 1:7) so sakey ya agawa nen inmunan siglo C.E. sanen inmabot ed sakey a balitok a denario so presyo na sakey paris a malapati, ya say sakey ya ordinaryon trabahador et kaukolan toy mantrabaho na 25 agew parad satan. Saray malapati et sarag ya ibagat na sakey no mairap-bilay; balet anggan say presyo na saratan et nagmaliw ya mabmabli. (Lev. 1:14; 5:7; 12:6-8) Sinmanok so Rabbi ya si Simeon ben Gamaliel lapud sayan nagagawa, kanian binawasan to so bilang na saray kaukolan ya ibagat, ya say presyo na sakey paris a malapati et inmabeban maong tan mantrabaho labat lay taloy oras so sakey a trabahador pian nasaliw to itan.

Base ed saratan ya impormasyon, duga labat ya tinawag nen Jesus a “matatakew” iramay negosyante ya manlalako diad templo lapud sasamantalaen tan sasaolen day totoo.