“Say Salita na Dios et . . . Makapanyari”

“Say salita na Dios et mabilay tan makapanyari.”—HEB. 4:12.

1. Akin ya kombinsido ka ya makapanyari so Salita na Dios? (Nengnengen so litratod gapo na artikulo.)

BILANG totoo nen Jehova, kombinsido tayo ya say salita na Dios, say mensahe to ed totoo, “et mabilay tan makapanyari.” (Heb. 4:12) Napruebaan na dakel ed sikatayo ya walay pakayari na Biblia ya umanen so bilay. Arum ed saray agagi tayo et datin matakew, adik, odino imoral. Saray arum et nayarin sikat odino mayaman ed sayan mundo pero singa walay kulang ed bilay da. (Ecl. 2:3-11) Wala ray totoo ya singa anggapo lay ilalo ra o direksion na bilay da balet aromog day dalan na bilay lapud pakayari na Biblia. Nayarin wala ray onian abasam tan agustoan mon eksperiensya ed Say Panag-bantayan diad saray serye na artikulon “Uumanen na Biblia so Bilay.” Tan anengneng mo ya anggan inawat da la so katuaan, kaukolan da nin itultuloy ya paaligwasen so espiritualidad da diad tulong na Biblia.

2. Panon ya apaneknekan nen inmunan siglo ya makapanyari so Salita na Dios?

² Pankelawan tayo kasi ya dakel natan so akapanggawa na baleg a pananguman lapud panaaral day Salita na Dios? Andi! Nanonotan tayo ed saratan ya eksperiensya iray Kristiano nen inmunan siglo ya say ilalo ra et diad tawen. (Basaen so 1 Corinto 6:9-11.) Kayarin binitla nen apostol Pablo iramay totoon agda natawir so Panarian na Dios, oniay inyarum to: “Ontan so arum ed sikayo nensaman.” Balet anguman ira diad tulong na Biblia tan say masanton espiritu na Dios. Anggan sanen inawat da lay katuaan, arum ed sikara et akagawa na seryoson kasalanan. Binitla na Biblia so sakey ya alanaan a Kristiano nen inmunan siglo ya adispelo, balet akapawil lanlamang. (1 Cor. 5:1-5; 2 Cor. 2:5-8) Agta makapaseseg ya naamtaan ya anggano nanduruman problema so inarap na saray agagi tayo et asarag da iratan diad tulong na Salita na Dios?

3. Antoy aralen tayo ed sayan artikulo?

³ Lapud makapanyari so Salita na Dios tan wala itan ed sikatayo, labay tayon usaren itan ed sankaabigan ya paraan. (2 Tim. 2:15) Diad sayan artikulo, aralen tayo no panon tayon usaren ya maong so pakayari na Salita na Dios (1) diad mismon bilay tayo, (2) no mibibiang tayo ed ministeryo, tan (3) no manbabangat tayo ed kongregasyon. Makatulong irayan panonot pian nipanengneng tayoy panangaro tan pisasalamat ed maaron Ama tayo ed tawen, ya mangibabangat ed sikatayo pian nagunggonaan tayo.—Isa. 48:17.

DIAD MISMON BILAY TAYO

4. (a) Antoy kaukolan tayon gawaen pian walay epekto ed sikatayo na Salita na Dios? (b) Panon mon ipapanaon so panagbasa na Biblia?

⁴ Pian walay epekto ed sikatayo na Salita na Dios, kaukolan ya regular tayon basaen itan—no nayari et inagew-agew. (Jos. 1:8) Tua ya busy so maslak ed sikatayo. Balet agtayo nepeg ya abuloyan ya walay antokaman ya mamatunda ed regular ya panagbasa tayo na Biblia, anggan saray importantin responsabilidad tayo. (Basaen so Efeso 5:15, 16.) Dakel ed saray lingkor nen Jehova et manggagaway paraan pian nipanaon day inagew-agew ya pambasa na Biblia, balanglan diad kabuasan, diad kaagwan, odino diad labi. Miparay nalilikna da ed salmista ya oniay insulat to: “Ontan lay panangarok ed ganggan mo! Naynay kon dadalepdepen itan.”—Sal. 119:97.

5, 6. (a) Akin ya importante so panagdalepdep? (b) Antoy gawaen tayo pian magmaliw ya epektibo so panagdalepdep tayo? (c) Panon kan nagugunggonaan diad pambabasam tan pandadalepdep mod Salita na Dios?

⁵ Aliwan say pambasa labat na Biblia so importante, noagta pati say pandalepdep ed nababasa tayo. (Sal. 1:1-3) No gawaen tayo itan, nayarian tayon iyaplika ed mismon bilay tayo so agmanganggan karunongan na satan. Kanian balanglan babasaen tayoy Salita na Dios ed inimprinta odino electronic format, say gagala tayo et pian talosan itan ya maong tan onsabi ed puso tayo.

Sakey ed saray Tasi nen Jehova ya manbabasa na Biblia

⁶ Antoy gawaen tayo pian magmaliw ya epektibo so panagdalepdep tayo? Makakatulong ed dakel so itundan magano kayari ran basaen so sakey ya kabiangan na Kasulatan tan itetepet dad sarili da: ‘Antoy naaralan kod saya nipaakar ed si Jehova? Diad anto ran paraan ya niyaaplikak la so prinsipyo ed sayan kabiangan na Salita na Dios? Anto ni ray kaukolan kon paaligwasen?’ Diad pampikasi tan pandalepdep tayo ed Salita na Dios, mas napakiwas itayon iyaplika so simbawa na satan. Diad ontan, lalo tayon nausar so pakayari na satan diad mismon bilay tayo.—2 Cor. 10:4, 5.

DIAD MINISTERYO

7. Panon tayon nausar ya maong so Salita na Dios diad ministeryo?

⁷ Antoy makatulong pian nausar tayon maong so Salita na Dios diad ministeryo? Say sakey ya paraan et no lanang tayon usaren itan diad pampupulong tan pambabangat tayo. Oniay imbaga na sakey ya brother, “No bilang ta kaibam si Jehova ya manpupulong ed kaabungan, kasin sika lan lanang so mansalita odino abuloyan mon mansalita?” Say punto to: No ibabasa tayoy Salita na Dios diad ministeryo, aabuloyan tayon si Jehova so mitongtong ed unabung. Say pinilin maong ya teksto et mas makapanyari nen say antokaman ya ibaga tayo. (1 Tes. 2:13) Tepetan moy sarilim, ‘Kasin manaanap ak na pankanawnawan makapangibasa na teksto ed Biblia diad saray napupulongan ko?’

8. Akin et agtayo labat la basta basaen so teksto no manpupulong tayo?

⁸ Siempre, wala ni kaukolan tayon gawaen nen say basta pangibasa na teksto ed Biblia ed saray nakakatongtong tayo. Akin? Lapud maslak ya totoo et daiset so natatalosan da ed Biblia odino anggapo ni ingen. Ontan so situasyon nen inmunan siglo, tan anggad natan. (Roma 10:2) Kanian agtayo iisipen ya natalosan lan tampol na unabung so teksto lapud binasa tayo itan. Nayari tayon ipaimano iray importantin salita diad bersikulo—ompan sarag tayon basaen lamet—tan ipaliwaway kabaliksan da. Makatulong itan pian say mensahe na Biblia et natalosan tan makasabid puso na saray ondedengel.—Basaen so Lucas 24:32.

9. Panon ya say ibaga tayo antis tayon ibasa so teksto et makatulong pian respetoen na katongtong tayo so Biblia? Mangiter na alimbawa.

⁹ Say ibaga tayo antis tayon ibasa so teksto et nayarin mamakiwas ed unabung ya respetoen so Biblia. Singa bilang, nayari tayon ibaga, “Nengnengen tayo no antoy ibabaga na Amalsa nipaakar ed saya.” No say katongtong tayo et aliwan Kristiano, sarag tayon ibaga, “Imano yo no antoy ibabaga na Masanton Sulsulat.” Odino no say pupulongan tayo et aliwan relihyoso, nayarin itepet tayo, “Arengel yo la yan makabat a salita nensaman?” Kanian nepeg tayon nonoten so kipapasen na kada too tan itukoy tayoy introduksion tayo.—1 Cor. 9:22, 23.

SarayTasi nen Jehova ya manguusar na Biblia diad ministeryo da

10. (a) Isalaysay so eksperiensya na sakey ya brother. (b) Panon mo lan apaneknekan so pakayari na Salita na Dios diad ministeryom?

¹⁰ Apaneknekan la na dakel ya say pangusar na Salita na Dios ed ministeryo et baleg so epekto to ed saray napupulongan da. Imanoen so sakey ya alimbawa. Sakey a brother so binmisita lamet ed lakin maedad la ya pigay taon lan manbabasa na saray magasin tayo. Imbes ya iderew to labat so sankabaloan ya isyu na Say Panag-bantayan, imbasa na brother so sakey ya tekston wadtan. Binasa toy 2 Corinto 1:3, 4, ya oniay ibabaga to: “Say Ama na maaron panangasi tan say Dios na amin a ligliwa [so] manliligliwa ed sikatayo diad amin a subok a dadalanen tayo.” Atenyeg so liknaan na samay laki, kanian impabasa to lamet ed brother so teksto. Imbaga to ya kakkaukolan da nen asawa to so ligliwa, tan nagmaliw ya interesado ed mensahe na Biblia. Agta talagan walay pakayari na Salita na Dios no usaren tayo itan diad ministeryo?—Gawa 19:20.

NO MANBABANGAT ED KONGREGASYON

11. Anto so responsabilidad na saray brother ya manbabangat ed kongregasyon?

¹¹ Malikeliket tayon amin no onaatendi tayo ed saray aral, ontan met ed saray asemblea tan kombension. Say manunan gagala tayo et pian idayew si Jehova. Nagugunggonaan itayo met ed saray nanaaralan tayo ditan. Kanian saray brother ya manpapaliwawa ed arap et walaan na baleg a pribilehyo. Tan nepeg dan bidbiren ya ambelat itan a responsabilidad. (Sant. 3:1) Nepeg ya lanang dan seguroen ya say ibabangat da et akabase ed Salita na Dios. No walay onian pribilehyom ya manbangat ed kongregasyon, panon mon usaren so pakayari na Biblia diad panagbangat mo?

Brother ya manguusar na Biblia diad pambabangat to ed kongregasyon

12. Panon ya naseguro na espiker ya say Kasulatan so sankaimportantian ya kabiangan na paliwawa to?

¹² Seguroen ya say Kasulatan so sankaimportantian ya kabiangan na paliwawam. (Juan 7:16) Panon mon nagawaan itan? Say sakey ya paraan et alwaran mo ya anggapoy antokaman—balanglan eksperiensya, ilustrasyon, odino anggan say paraan na panagpaliwawam—ya ompaway a mas importante odino mangalay atension nen saray usaren mon teksto ed Biblia. Tandaan met ya no manbabasa ka na dakdakel ya teksto et agto labay ya ibagan manbabangat ka la manlapud Biblia. Diad tua, no amayamay so usaren mon teksto, anggapo laingen so natandaan na saray dumerengel. Kanian pilim ya maong iray importantin teksto, tan ikdan moy panaon so pambasa, pangipaliwawa, pangiyilustra, tan pangiyaplika ed saratan. (Neh. 8:8) No say paliwawa et base ed outline ya intarya na organisasyon, aralen itan tan saray tekston inusar ditan. Talosan mo no panon ya mankokonektaan iray punto ed outline tan saray teksto. Insan usaren iray apilin teksto pian ipaliwawa iray punto ed outline. (Naromog iray praktikal ya suhestion diad saray aralen 21 anggad 23 na Minabang ed Edukasyon na Teokratikon Eskuelaan Parad Ministeryo.) Manuna ed amin, kerew moy tulong nen Jehova diad pikakasi pian nipasabim iray mabmablin kanonotan to ya walad Salita to.—Basaen so Esdras 7:10; Proverbio 3:13, 14.

13. (a) Antoy epekto ed sakey ya sister na panguusar na saray teksto diad aral? (b) Panon kan nagugunggonaan ed panguusar na Biblia diad saray aral tayo?

¹³ Say panguusar na saray teksto diad aral et baleg so epekto to ed sakey ya sister ed Australia. Anggano aliwliway naeksperiensya to ed impanugaw to, inawat toy mensahe na Biblia tan indedika toy bilay to ed si Jehova. Balet mairap ton panisiaan ya sikatoy inaro nen Jehova. Pero sinmabi panaon et akombinse lanlamang ya sikatoy inaro na Dios. Antoy akatulong ed sikato? Anguman so panmoria to nen dinalepdep toy sakey ya tekston inusar ed aral tan inkonekta to itan ed arum nin teksto ed Biblia.a Kasin wala met so epekto ed sika na panguusar ed Salita na Dios diad saray aral, asemblea, tan kombension?—Neh. 8:12.

14. Panon tayon nipanengneng ya aapresyaen tayo so Salita nen Jehova?

¹⁴ Agta misalsalamat tayo ed si Jehova lapud Salita to, say Biblia? Agto labat inter itan ed totoo lapud panangaro to noagta sinumpal to met so promisa to ya mansiansia itan. (1 Ped. 1:24, 25) Kanian kaukolan ya regular tayon basaen so Salita na Dios, iyaplika itan ed mismon bilay tayo, tan usaren itan pian tulongan so arum. No gawaen tayo itan, ipapanengneng tayo ya talagan aaroen tan aapresyaen tayo iyan espiritual a kayamanan tan nagkalalo la say Autor to, si Jehova a Dios.

a Nengnengen so kahon ya “Anguman so Panmoriak.”

“Anguman So Panmoriak”

Anggano pigapigaran taon lay linmabas kayarin naamtaan nen Victoria so katuaan, siansia nin mairap ton panisiaan ya sikatoy inaro na Dios. Panon ya atulongan pian nalikna ton talagan inaro na Dios? Oniay insalaysay nen Victoria:

“Anguman so panmoriak manga 15 taon kayari na bautismok. Legan na sakey ya paliwawa diad Kingdom Hall . . . , binasa na espiker so Santiago 1:23, 24. Ditan et inkompara so Salita na Dios ed sakey ya espiho, ya nanengneng tayoy sarili tayo ya singa pakanengneng nen Jehova. Inisip ko no kasin say pakanengneng kod sarilik et duma ed pakanengneng nen Jehova. Nen unaan, mairap kon awaten itan. Pakaliknak et agak naaro nen Jehova.

“Kayari pigay agew, walay abasak ya tekston akapanguman ed bilay ko. Say Isaias 1:18, ya imbaga nen Jehova: ‘Dago kayo natan, tan pantongtongan tayo ray kaukolan ya ipetek ed baetan tayo. . . . Anggano saray kasalanan yo et ambalbalanga, napaputi iratan a singa niebe.’ Singa mitotongtong si Jehova ed siak, ya ibabaga to: ‘Gala, Vicky, pantongtongan ta ray kaukolan ta’n ipetek. Kabat ta ka, amtak iray kasalanan mo, pero amtak so walad pusom—tan inar-aro ta ka.’

“Agak makaugip ed saman ya labi. Agko nin siansia napanisiaan ya inaro ak nen Jehova, pero ninonot koy dondon bagat nen Jesus. Biglan naisip ko ya abayag lan manaanos si Jehova ed siak, ya diad dakel ya paraan et ipapanengneng ton inaro to ak. Pero singa ibabagak ed sikato: ‘Kulang ni panangarom ed siak. Agnasakbongan na bagat na Anak mo so kasalanan ko.’ Singa ipapawil kod si Jehova so dondon. Pero natan, lapud dadalepdepen ko iyan regalon dondon, naliliknak la ya inaro ak nen Jehova.”