Ontuan Amin so Mapropetikon Salita na Dios!
1 Interesado lawas iray Tastasi nen Jehova ed propesiya na Biblia. Kanian aliketan tayo’d impakaamtan say tema na kasumsumpal a distriton kombension tayo so nipaakar ed “Mapropetikon Salita na Dios.” Magunaet tayon naamtaan so intarya nen Jehova ed sikatayo bilang “tagano ed panaon a kinepeg to.” (Mat. 24:45) Agto itayo dinismaya.
2 Saray Pabitar ed Kombension: Say pinagkateman paliwawa ed Biernes ya “Imanoen so Mapropetikon Salita na Dios,” so angilaktip ed makaibangat a diskusyon nipaakar ed salaysay na transpigurasyon. (Mat. 17:1-9) Indanet na satan a wala itayo la natan ed tambib na sankaabigan iran panaon lapud sikatayo lay walad kasamsampotan na panaon na anggaan, ya asingsingger la so balon sistema! Say sakey ya importantin dalan a kaukolan tayon imanoen so Salita na Dios et diad pambasa ed satan a regular. Say simposium a “Panliketay Pambasa ed Salitay Dios” so angitarya na praktikal iran suhestion no panon a pagmaliwen a lalon makagungguna tan makapagayaga so pambasa ed Biblia.
3 Diad Sabado na ngarem et arepaso tayo iray rason no akin a nepeg itayon nakombinsin manbibilay itayo la ed kaunoran iran agew. Kasin nanonotan yo irayan amin? Diad Simba na kabuasan, nagmaliw a mabilabilay so propesiya nen Habacuc diad impakaamta tayon say panaon tayo et mipadparan tuloy ed panaon to tan saratan a makatantandan ebento so magano lan onsabi sano deralen nen Jehova iray marelmeng tan isalba toray matunong. Kasin atalosan yo so drama ed Biblia nipaakar ed si Jacob tan Esau? Nepeg tayon aktibon gegemtanen iray bendision a manlapud si Jehova, a resistian so awawey ya agpananginenen tan agpangingalngalep.
4 Sakey a Makapasagyat a Balon Libro: Agaylay liket tayon angawat ed balon libron, Pay Attention to Daniel’s Prophecy! Andi duaruwan babasaen yo la iyan makapasagyat a publikasyon. Inkuan na espiker ya angipaway ed satan: “Nilikud ed pigaran detalyi, amin a propesiya ed libro na Daniel so nasusumpal la.” Agta ipurek na satan so inkaganatan na panaon tayo?
5 Say programa na kombension so amabiskeg a maong ed kombiksion tayo ya amin a sipan na Dios ya agni agawa so ontua. Apaseseg itayon itultuloy ya iyabawag ed arum so mapropetikon salita na Dios!