Matalonan Panagpulong Panamegley na Telepono

¹ Say gagala tayo bilang Tastasi nen Jehova et aliwa labat lan mibiang ed panangipulong na maong a balita noagta pian ipasabi met ed balang sakey no posibli so mensahe na Panarian. (Gawa 10:42; 20:24) Anggaman say panagkabkaabungan a kimey et mantutultuloy a manunan paraan pian nasabi so totoo, namomoria tayo ya anggan sayan sistematikon metodo et agtayo nakatongtong so amin. Kanian pian ‘sigpot a nasumpal tayoy ministeryo tayo,’ manguusar itayo na arum niran metodo​—kalaktip so panagpulong panamegley na telepono​—pian anapen iray kinmarneron totoo.​—2 Tim. 4:5, NW.

² Diad dakel a paspasen, manaayam iray totoo ed saray guardiadon apartment, saray bilding a panaayaman na dakel iran pamilya, odino walay gate iran komunidad, a mairap so panagkabkaabungan a metodo pian nakatongtong iray totoo. Balet, dakel a manangipalapag so matalona ed panabi ed sarayan totoo panamegley na telepono. Anggaman nayarin aliwan mainomay iya diad Pilipinas, nayarin posibli so pakala na pigaran numero na telepono manlapud directory na telepono parad saray address a teritorya na kongregasyon yo. Ontan met, dakel so mibibiang ed panagpulong diad karsada, diad saray parki, odino diad saray shopping mall a matalona ed pakala na saray numero na telepono na saramay nakakatongtong da.

³ Kasin masuyat kayon mangilaktip ed panagpulong panamegley na telepono diad ministeryo yo? Inaksobi na sakey ya agin laki: “Agko labay a walay onla ed abung ko a lakoan toak na nambabangil, kanian dati et agko labay iyan nengneng na panagpulong.” Balet, kayari amidua labat ya intawag to, inkuanto: “Labalabay ko la itan! Agkon balot inisip a magmaliw ya ontan, balet labalabay ko la itan! Relaks iray totoo ed telepono, tan walan amin so bengatlan nakaukolan mo. Epektibon maong iya!” Ontan met so reaksion na sakey ya agin bii: “Talagan agko panliketan so panagpulong panamegley na telepono. Diad katuaan to, agko labay a gawaen itan. Balet sinalik tan naimanok a mabungan tuloy. Walaan ak na 37 a panagpawil ya apulongan ko ed telepono tan dakel a panangiyaral nen say nagawaan ko!” No mabulos mon salien so panagpulong panamegley na telepono, ontalona ka met.

⁴ Pangorganisa ed Panagpulong Panamegley na Telepono: Say panagpulong a kimey na kongregasyon so nagagawa diad panangimaton na manangasikasoy serbisyo. Dependi ed pankaukolan, saray ulop na mamatatken so nayarin manuro na sananey a matatken odino sakey a kualipikadon ministeryal a lingkor pian mikimey a maapit ed sikato ed pangorganisa’d panagpulong panamegley na telepono.

⁵ Iner so pakalaan yo na saray numero na telepono? No walay listaan na telepono so guardiadon ayaman, nayarin naala yo iray numero ditan. No andi, ompan posibli a kopyaen so kangaranan na saray residenti diad directory a walad lobby tan anapen iratan diad maslak ya uusaren a directory na telepono.

⁶ Sano manpastol iray mamatatken ed saramay agla makaalis ed ayaman da odino ed saray agla makayari, alisto ira komon a mamaseseg ed sarayan manpulong panamegley na telepono. Nayarin gawaen nin unona na sakey a matatken so itawag legan a manoobserba so manangipalapag. Insan panggayagaan na manangipalapag so pankanawnawa ya ontawag. Dakel a ginmapo ed ontan a paraan so angusar na pigaran minuto kada agew ed sayan aktibidad, tan talagan labalabay da itan.

⁷ Saray Suhestion Pian Matalona: Sanen imbaki nen Jesus iray babangatan to pian manpulong, “imbaki tora a sanderwa.” (Luc. 10:1) Akin? Amta to a diad pankimey a mankaiba et makaaral ira tan makapanpasesegan ira. Ontan met ed panagpulong panamegley na telepono. Diad pankimey a mankaiba, makaaral kayo ed sakey tan sakey, napantongtongan yoray resulta, tan makapangiter na saray suhestion ed ontumbok a pitongtong. Anggan legan na pantetelepono, makapantulongan kayon mananap na matukoy ya impormasyon.

⁸ Pian niwalay malinew a panagnonot tan konsentrasyon, onyurong ed lugar a nayarian yon igaton ed arap yo iray uusaren ed panagpulong​—Biblia, libron Reasoning, brosyur a Kakaukolanen, saray magasin, tan arum nira. Isulat iray pigaran presentasyon, tan igaton iratan ed sankanengneng yo. Paraanan so pakala na susto tan kompleto iran rekord, pati say petsa tan oras ta pian amta yo no kapigan so itawag yo lamet ed aromog ya interesado.

⁹ Mabetbet a maalwar iray totoo no narengel da ya aliwan pamilyar ed sikara so bosis ed telepono. Kanian magmaliw a maligsa, makaaro, tan mataktika. Say tonaday bosis yo so pakadeterminaan na onabung ed walna tan inkasimoon yo. Magmaliw a relaks tan impapuson mansalita. Mansalita a matantan tan malinew tan dugaruga ed kasil pian narengel. Abuloyan so pankanawnawa na onabung a mansalita. Ibaga yoy kompleton ngaran tan panaayaman yo. Agtayo labay ya isipen na totoo a manlalako tayo panamegley na telepono. Imbes ya ibagan tatawagan yon amin iray manaayam ed sakey a bilding odino ayaman, gawaen yon personal so tawag yo.

¹⁰ Saray Presentasyon ed Telepono: Dakel ed saray introduksion ed pahina 9-15 na libron Reasoning so nayarin itukoy ed panagpulong panamegley na telepono. Nayarin ikuan yo: “Tinawagan ta ka lapud agta ka nakatongtong a personal. Say gagala na intawag ko et pian amtaen so opinyon mo nipaakar ed sakey a makapainteres a maong a tepet.” Insan ibaga so tepet.

¹¹ Say unonan presentasyon ed silong na subtitulon “Crime/Safety” so nayarin usaren ed onian paraan: “Hello. Siak si ․․․․․․․․. Manaayam ak ed sayan komunidad. Labay kon ipaseguro ed sikayo ya agak manlalako na nambabangil odino mansusurbi. Ontatawag ak lapud kapagaan ko nipaakar ed personal a kaligenan tayo. Dakerakel iray nagagawan krimen ed kaliberliber tayo, tan mangaapekta itan ed kabibilay tayo. Kasin isipen yon onsabi so panaon sano amin a totoo so makapanakar la diad saray karsada ed labi tan liknaen dan maligen ira? [Abuloyan ya onebat.] Abuloyan yo ak pan ibasa ed sikayo no anto so insipan na Dios a gawaen.”

¹² Walaan na maabig iran resulta so direktan pangiyopresi na panangiyaral na Biblia panamegley na telepono. Nayarin idemostra so panagaral ed pigaran minuto. Iyopresi a bisitaen so indibidual diad abung to pian ituloy so panagaral, odino no masuyat so too, iyopresi so pangituloy ed panagaral panamegley na telepono ed arum ya agew.

¹³ Sano sampotan yoy tongtongan, lawas nonoten so bengatlan mangitonton ed pamawil yo ed too diad abung to odino ed pangipawit na sakey a literatura panamegley na koreo. No say too et masuyat a mangiter ed address to, iyopresi a tawagan yo lamet. Nayarin mankaukolan itan na maminpigan tawag sakbay ya imbitaan to itayo la ed abung to.

¹⁴ Manbulon la: Sakey a mantaon na 15 ya agin bii so ginmapon nampulong ed kabuasan panamegley na intawag ed telepono. Akatongtong toy sakey a bii ya inmabobon a mangawat na libron Pikakabat. Sanen intulor na agin bii so libro ed abung to, labay ya amtaen na saman a bii no panon a naamtaan na agin bii so numero na telepono to, lapud anggapo itan ed listaan. Sikatoy basta labat atawagan na agin bii! Saman a bii so impaiyaralan tan natan et sakey lan agbautismadon manangipalapag.

¹⁵ Sakey ya agin bii so awalaan na teritorya a tawagan ed telepono balet ta agto akimeyan itan ed loob na taloy simba lapud takot. Antoy amatepel ed sikato ya onggapo? Anonotan to so Enero 22, 1997 ya artikulo na Awake! ya apauloan na “When I Am Weak, Then I Am Powerful.” Nipaakar itan ed sakey a Tasi a manpupulong panamegley na telepono anggaman ed saray pisikal a limitasyon to. Inkuan na agin bii: “Nampikasi ak ed si Jehova tan kinmerew ak na biskeg. Impikasik ed sikato a susto komon iray ibalikas ko a presentasyon.” Antoy resulta na inmunan agew ya impanpulong to panamegley na telepono? Inreport to: “Inebatan nen Jehova so pikakasik. Dinmengel iray totoo ed siak, tan inyuksoy koy pamawil ed sikara.” Diad saginonor et nansumpal ed sakey a panagaral na Biblia so impanpulong to panamegley na telepono. Inkuanto: “Binangatan ak lamet nen Jehova a manmatalek ed sikato tan aliwan ed dilik.”​—Uli. 3:5.

¹⁶ Say pangiparungtal ed katuaan panamegley na telepono so matalonan metodo ed panangipulong na maong a balita. Manparaan a maong, tan sigpot-puson mibiang. Agnadidismaya no anggapoy paborablin ebat ed pilimero iran intawag. Ipikasi so panangidirehi nen Jehova, tan ikompara iray nagagawaan na arum a manpupulong ed onian makapaliket a paraan. Tekep na pilalek ya anggapoy nasaew ed teritorya tayo, komon ta sigpot tayon sumpalen so ministeryo tayo tekep na inkaganatan.​—Roma 10:13, 14.