Saray Kombension—Panaon na Panliket!
1 Saray kombension na Tastasi nen Jehova so okasyon na baleg a panliket. Diad loob la na masulok a sanlasus taon, sarayan pantitipon so akatulong la ed idaraak a nagagawa ed organisasyon tayo. Manlapud melag a gapo, naiimatonan tayo so mayaman a panamendisyon nen Jehova ed sankamundoan a kimey tayo. Diad sankaunaan a kombension tayo ed modernon panaon, diad Chicago, Illinois, nen 1893, diad dagup a 360 ya inmatendi et walay 70 ya abautismoan bilang simbolo na dedikasyon da ed si Jehova. Nen katantaon a serye na “Mananumpal na Salitay Dios” a Distrito Iran Kombension et walay dagup ya inmatendi ed sankamundoan a 9,454,055, tekep na 129,367 ya abautismoan. Agaylan lapuan na panliket!
2 Nanlapu la’d panaon na Biblia, saray pantitipon na totoo na Dios so mangitatarya na matalonggaring a paraan ed pangipasabi na instruksion manlapud si Jehova. Diad panaon nen Esdras tan Nehemias, saray totoo so dinmengel ed panangibasa ed Ganggan “manlapu ed kabkabuasan angga ed pegley-agew.” (Neh. 8:2, 3) Lapud iyaaligwas ed pakatalos ed Ganggan diad saman ya okasyon, naeksperiensya na totoo so “baleg a liket.” (Neh. 8:8, 12) Manliket tayo met ta saray kombension so mangitatarya na maabig a pankanawnawa parad sikatayo pian makaawat na maabig ya instruksion tan espiritual a tagano ed ‘manepeg a panaon’ manlapud si Jehova panamegley na “matoor tan makabat ya aripen.” (Mat. 24:45) Lapud inkuan nen Jesus a say too so nepeg a manbilay unong ed “amin ya ombesngaw ed sangi na Dios,” saray kombension so makana parad espiritual a pankaabigan tayo.—Mat. 4:4.
3 Makagunggona so Amin a Sagpot ed Iyatendi: Amin tayo et nepeg a gawaen tayon personal a kalat so iyatendi ed interon “Manangibangat na Salitay Dios” a Distriton Kombension ed sayan taon. Nepeg tayon iplano so masakbay ya isabi kada agew tan mansiansia anggad makapibiang itayo ed pangibagay “Amen!” ed pansaran pikakasi. Pian nagawaan iya et kaukolan tayon iyarunsa so eskedyul tayo. Nayarin walay kairapan na ikerew tayoy bakasyon ed trabaho pian onatendi ed kombension. Kaukolan tayoy ontalindeg a malet, ya ag-ibabagan makauley la. No kaukolan tayo iray pampundoan tan/odino panluganan, kaukolan a masakbay tayon iyuksoy. Makagunggona so antokaman a sagpot a gawaen tayo!
4 Agsusukaten na totoo nen Jehova iray bendisyon na iyatendi ed saray kombension panamegley na kuarta. Imanoen pa iray alimbawa na pigara a determinadon inmatendi ed 1958 a Divine Will International Assembly na Tastasi nen Jehova ed New York City. Sakey ya agin laki so angikapot ed negosyo to nipaakar ed konstruksion ed loob na duay simba pian manbulontaryon ontulong tan onatendi ed asamblea. Sakey met ya agin laki ed Virgin Islands so angilako na ngalngalin duaran ektarya a dalin ta pian makaatendi so interon pamilya to ya anemira iran amin. Sakey ya ugaw nin sanasawa so angilako ed motorboat da pian nipila ra’d asamblea iray taloran ananak da, a mantaon na duay bulan anggad pitoy taon. Nibaga ed taloran sanaagin lalaki a taga California a no onliwat ira ed trabaho ra, sikaray naandian lay trabaho no ompawil ira. Balet, satan so ag-angamper ed sikara ed inyatendi ed saman a makatantandan asamblea.
5 Tutumangan nen Jehova so Masimoon a Sagpot Tayo: Nanenengneng tan bebendisyonan nen Jehova iray sagpot na totoo to. (Heb. 6:10) Bilang alimbawa, diad 1950 a Theocracy’s Increase Assembly, nadngel na saramay inmatendi so makatantandan paliwawa a “Saray Balon Sistema na Bengabengatla.” Sinagyat nen Brother Frederick Franz so interes na amin diad impangitepet toy: “Kasin maliket a naamtaan na sayan internasyonal ya asamblea, a diad sayan labi, ed limog tayo, et walaray pigaran prospektibon prinsipe ed balon dalin?” Masulok a 50 taon ed saginonor, siansian panggagayagaan tayo iyan alinewan a pakatalos ed Salmo 45:16.
6 Kayari inyatendi ed katantaon a distriton kombension, insulat na sakey a maapresyan ulo na pamilya so onggendan: “Agagi, agaylan manangisalbay bilay iyan kombension. Say pamilyak so inmalis ed syudad lapud trabaho, a sengeg na inkapuy na espiritualidad mi. . . . Pinaulyanan miray obligasyon mi bilang Kristiano. Atundaan mi ni ingen so pipiaral tan panagpulong. . . . Sayan kombension so amabiskeg lamet ed sikami, tan inggapo mi lamet ya iletneg iray espiritual a kalat mi tan inyuksoy iray bengatla pian nagawaan iraya.”
7 Sikatayo so iikdan nen Jehova na espiritual a tagano a nakaukolan tayo. Itatarya toy mayaman a dulang diad saray kombension tayo. Say apresasyon tayo parad sayan probisyon so nepeg a mamakiwas ed sikatayon mangibaga ed singa imbaga nen Cornelio sanen sikatoy binisita nen apostol Pedro: “Diad sayan bekta et presente kamin amin ed arap na Dios pian ondengel ed amin a bengatlan ingganggan nen Jehova ed sika ya ibaga.” (Gawa 10:33, NW) Komon ta gawaen tayon kalat so pagmaliw a ‘presente ed arap na Dios’ diad kada sesyon na “Manangibangat na Salitay Dios” a Distriton Kombension ed sayan taon tan manliket!