Kasin Niparaan Moy Inkasika?

¹ Agaway nikadkaduman ebento nen taon 778 K.K.P. Diad pasingawey, anengneng nen propeta Isaias “[si Jehova,] a manyudyurong ed sakey a trono, ya atagey tan nitandoro.” Insan arengel nen Isaias iray serapin a mangipapaimano ed gloria nen Jehova, a kuanda: “Santo, santo, santo, si Jehova na saray ehersito.” Agaylan makapakelkelaw itan! Diad satan ya eksena, ipapaarap nen Jehova so makaangat a tepet: “Siopa so ibakik, tan siopa so onla a nipaakar ed sikatayo?” Agnisalaysay no anto itan a klase na asainmin odino no kasin nagunggonaan ed satan so toon manboluntaryo. Ingen, agmasuyat ya inmebat si Isaias: “Wadia ak, ibaki moak.”​—Isa. 6:1, 3, 8.

² Sayan mabulos ya awawey a gawaen so antokaman a pagawa nen Jehova so pakabidbiran ed totoo to. (Sal. 110:3) Tan natan et walay tawag parad saraman so niparaan day inkasikara. Kasin akaparaan kan onkiwas tekep na mabulos ya espiritu, a singa si Isaias?

³ Wala so peles a pankaukolan parad saray agagin lalaki a manlingkor diad Bethel. Mankaukolan iya ed sikara na pirmin pilalek ya iyuna iray intereses na Panarian tan mabulos a manggawa na antokaman a kakaukolanen pian suportaan so sankamundoan a panagpulong a kimey. (Mat. 6:33) Diad tua, say panlingkor bilang membro na pamilyay Bethel so mangiter ed sakey na nikaduman pankanawnawa ya intiron-kamarerwan makapanlingkor ed si Jehova. Panon ya ontan?

⁴ Say Kimey a Gagawaen Diad Bethel: Isipen pa so amin a regular a nagagawaan diad taloran complex na Bethel diad Estados Unidos, a walad Brooklyn, Patterson, tan Wallkill, New York. Say 5,730 ya agagin lalaki tan bibii a manugyop ed pamilyay Bethel ed sarayan taloran lugar so walaan na pribilehyon direktan pakapibiang ed pamapawala na saray Biblia tan saray literatura na Biblia ya usaren parad sankamundoan a lawak tan parad personal a panagaral. (Mat. 24:45) Alimbawa, nen imbeneg a serbisyon taon, walay apawala a 24,364,670 iran libro, 39,813,464 iran bokleta tan brosyur, 270,528,000 iran magasin, tan 1,271,041 iran audiocassette tan nipatulor bilang resulta na nankakasakey a sagpot na pamilyay Bethel diad Estados Unidos. Diad Pilipinas, say 360 a membro na pamilyay Bethel diad Quezon City so aglabat akibiang ed impamawala na masulok a 10,000,000 iran magasin legan na apalabas a serbisyon taon, noagta say ulop na masulok ya 60 ed departamento na panagpatalos so mangipapatalos na saray libro tan brosyur ed pitoran lenguahe ta pian saya so nauksoy tan nipawit ed sanga diad Hapon parad kiimprinta. Diad sankamundoan wala so masulok a 1,900 iran managpatalos tan napapawala iray literatura ed masulok a 300 a lenguahe. Dakel iran mabulos a boluntaryo so nakakaukolan a mangasikaso ed panag-imprinta tan panangipatulor ed saray literatura, panaglinis, panagmintena, panangiparaan na tagano, panagsaliw, panangasikaso ed bunigas, tan dakel niran trabaho ed Bethel.

⁵ Say panggawa ed sayan amin a kimey so pakapatnagan na baleg ingen ta makapenek ed espiritual a kimey. Manreresulta ed baleg a gayaga so pakaamta a say biskeg tan kasil tayo et nauusar pian suportaan so panagpulong tan panagbangat a kimey. Say serbisyo ed Bethel so ontulong ed sikatayo pian naamtaan a maong so organisasyon nen Jehova. Napapanonotan itayo a pinaseseg na salmista iray Israelita ya amtaen dan maong so mangaraldalin a sentro na teokratikon uley diad panaon da.​—Sal. 48:12, 13.

⁶ Saray Bendision Diad Serbisyo ed Bethel: Panoy liknaan na saramay manlilingkor ed Bethel nipaakar ed saray pribilehyo ra ed serbisyo? Imanoen so onggendan iran komento na saray agano ni tan abayag laran membro na pamilyay Bethel. Onia so inkomento na sakey a membro na pamilyay Bethel a panggagayagaan toy taloy taon lan panlilingkor ed Bethel: “Mamapaelet na relasyon ko ed si Jehova so inkiwalak diad Bethel. Diad lalon ibabayag ko dia tan diad lalon pakakaaral ko no panon ya onkukurang so Bethel, lalon nababangatan ak nipaakar ed personalidad nen Jehova. Say serbisyo ed Bethel so mangipapamoria met ed siak ya uusaren nen Jehova so totoo​—amin a klase na totoo. Tan agmo kaukolan so magmaliw a naspot pian abobonan to.”

⁷ Natandaan ni na sakey a kalangweran ya agin laki: “Nanonotan kon manmomolimoli ak ya, ‘Alay abig so pakaloob ed balon mundo tan ibaga ed saray napaolin matoor nensaman a nanlingkor ak ed dakel a taon diad Bethel, imbes a nampayaman.’”

⁸ Sakey a kalangweran ya agin laki so mandadalepdep ed panangipasal a naawat to: “Baleg a bendision so pakakaaral ko nipaakar ed inkasiak tan ed kaukolan kon paaligwasen insan bayuboan iratan a kalidad. Liknaen ko a nagkalalon napanlingkoran koy Jehova natan. Naiimanok a naaruman so inkaanos ko, naaruman so inka-dangkak, tan nipanengneng koy arok ed malalaknab a paraan.”

⁹ Sakey ya agin bii so manmomorekdek ed saray bendision a nagagamoran to anggad natan: “Lalon nababangatan ak nipaakar ed si Jehova tan no panon a nagkalalon naalig koy kanonotan, liknaan, tan kiwas to lapud saray espiritual a programa dia. Tan lapud mantultuloy so panangipasal, tuloytuloy met itan a bendision.”

¹⁰ Onia met so inkuan na sakey ya agin laki ya angideboto lay 59 a taon ed sigpot-panaon a ministeryo, a masulok a 43 ed saratan a taon et diad Bethel: “Aliwan singa sakey a monasteryo so Bethel, a singa nayarin isipen na arum. Dakel so nagagawaan mi lapud aka-eskedyul lan paraan na bilay mi. . . . Amin ya agew a nantrabaho ak et nanggayagaan ko so ginawak. Akin? Lapud ta no intiron-kamarerwa ya iyapay tayoy inkasikatayo ed si Jehova, napenek itayo lapud pakaamta a ‘gagawaen tayo so nepeg tayon gawaen.’”​—Luc. 17:10.

¹¹ Oniay kuan na sananey nin agin laki, a manlilingkor ed Bethel ed loob la na 62 taon: “Mapekder a sisiaen kon say Bethel et sankaabigan a pasen ed dalin antis ya onsabi so mangaraldalin a Paraiso. Agkon balot pagbabawian so impamilik ed sigpot-panaon a serbisyo bilang legay-bilay a karerak. Agaylan gayaga so pakaimaton tan pakapibiang ed malaknab ya ibubulaslas na mangaraldalin ya organisasyon nen Jehova! Diad tulong nen Jehova et determinasyon kon itultuloy a pinagka-abung so Bethel tan usaren koy intiron bilay ko diad iyaabante na intereses na Panarian.”

¹² Sinalambit na sarayan membro na pamilyay Bethel so pigara labat ed dakel iran bendision a napanggayagaan mo no iparaan moy inkasika ed serbisyo ed Bethel. Balet singa met ed pakaawat na dinanman a pribilehyo ed serbisyo, unona et nepeg mo nin kapeten iray kualipikasyon. Antoray pigaran kakaukolanen diad panlingkor bilang membro na pamilyay Bethel?

¹³ Saray Kakaukolanen Parad Serbisyo ed Bethel: Nanengneng ed akatekep a kahon iray manunan kakaukolanen parad saraman so mangaplay parad serbisyo ed Bethel. Kaaruman ni, importante a mabulos iran manseet, aliwan “maaro ed saray likeliket.” (2 Tim. 3:4; 1 Cor. 13:11) Saray membro na pamilyay Bethel so nepeg a maespiritual a lalaki tan bibii ya abayuboan da lay maabig ya ugali ed personal a panagaral tan nipasal da lay pakayari ran makatebek pian ‘nibiig so maong tan mauges.’ (Heb. 5:14) Kaukolan a nipapanengneng da la so inkatatken bilang Kristiano ed amin a pamaakaran na bilay, pati diad panangawes, panag-ayos, tan panagpili ra ed musika tan panagligliwaan. Saray mabulos-impanpuson membro na pamilyay Bethel so manlingkor inerman so pankaukolan ed sikara. Saray malalangwer nin membro so kaslakan a naiikdan na saray asainmin a saglawien toy pisikal a kimey, kalaktip so panag-imprinta, panangiparaan tan panangipatulor na literatura, panagmintena, panaglinis, panagpesak, tan panangitarya na tagano. (Uli. 20:29) Balet, aliwan singa say sekular a trabaho, balang asainmin so mangitarok na baleg a kapenek lapud satan so sagradon serbisyo a mangitatarok na gloria ed si Jehova.​—Col. 3:23.

¹⁴ Sakey taon so minimum a pansiansia na saraman so naimbitaan parad serbisyo ed Bethel. Saya so mangipasal ed sikara pian magmaliw iran produktibon komikimey. Iilaloan a sarag dan ipasen a pinagka-abung da so Bethel. Lapud panangaro ed si Jehova et napapakiwas iray membro na pamilyay Bethel a mangiyuna ed kimey na Panarian a makapaliket ed si Jehova, nen say personal iran pankaabigan.​—Mat. 16:24.

¹⁵ Peles Iran Pankaukolan: Lapud klase na trabaho a gagawaen diad Bethel ed Pilipinas, say peles a pankaukolan et manunan parad saray walad kasuloan ya agagin lalaki. Naikdan na prayuridad iray regular payunir, lapud wala la ra’d sigpot-panaon a kimey. Panapanaon et nayarin wala met so pankaukolan parad saray walad kasuloan ya agagin bibii tan sanasawa a mantaon na 19 anggad 35 a nayarin walaan na saray dunong a nakaukolan ed Bethel. Sakey ni, arum ya agagin lalaki tan bibii a manedad na masudsulok lan 35 tan walaan na nikaduman dunong tan inkipasal a nayarin nausar ed Bethel so papasesegen a mangaplay. Diad pamitla ed pigara labat ya alimbawa, saraya so mangisakop ed saray doktor, enhinyero, rehistrado iran nars, odino saray mekaniko. Balet, agmi ipapaseseg ed saray indibidual so pangala na nikaduman edukasyon odino panangipasal, a nonoten dan satan so lalon mangiter ed sikara na pankanawnawan natawag ed Bethel. Saramay akaawat la na nikabiig a panangipasal, a nayarin sakbay dan akabatan so katuaan, so nayarin malabay a mangisulat na detalyadon résumé ra tan itekep itan ed Bethel Information Sheet sano ipawit iya.

¹⁶ No kaliktan yoy manlingkor ed Bethel, nayarin onkerew kayo na Bethel Information Sheet ed sangan opisina. Kaukolan a sulatan iya tan iter ed service committee na kongregasyon a mangipawit ed sangan opisina. Sano walay pankaukolan diad Bethel, pampilian iray akasimpen ya Information Sheet tan nipawit so Bethel Application ed saraman so ontukoy ed pankaukolan. No agkayo naimbitaan kayari sakey odino duaran taon, maabig no pasimbaloen yo lamet so aplikasyon yo ta pian amta mi no kasin wala kayo ni’d kipapasen a natawag ed Bethel. Aliwan amin et natawag ed Bethel, kanian no agkayo natawag, itultuloy yo labat so pampapayunir yo, a manmatalek a kabat nen Jehova no iner so kausaran yon maong.

¹⁷ Nikaduman pribilehyo parad saramay mankikimey ed Bethel so panlingkor ed si Jehova diad maapit a pililimog ed saray abayag lan manlilingkor ed sikato. Aapresiaen na Mananguley ya Ulop so dilin-panagsakripisyon awawey na amin a gagawaen day inkasikaran akaparaan ed panaglingkor ed saray pankaukolan na sankamundoan ya impanaagi tayo.​—Fil. 2:20-22; 2 Tim. 4:11.

¹⁸ Sikayoran Kalangweran​—Iparaan Yo lay Inkasikayo Natan Parad Serbisyo ed Bethel: Onggapoy panparaan parad serbisyo ed Bethel sakbay nin nasabi so minimum a kakaukolanen ya edad a 19. Antoy nayarin gawaen na saray kalangweran pian niparaan day inkasikara parad serbisyo ed Bethel? Inkuan nen Jesus: “Siopa ed sikayo so, anta labay to so mamaalagey na sakey ya ilang, ag-onyurong ya unona tan bilangen to so bili?” (Luc. 14:28) Lapud makana so preparasyon tan panagplano ed italona na dinanman a proyekto ed panagpaalagey, agaylan importante a saray kalangweran so mangimanon maong ed no panoy pangileletneg day arapen da diad serbisyo ed si Jehova! Nepeg ya iletneg la so malet a pundasyon diad masasakbay a taon na bilay da ta pian nadampot daray espiritual a kalat. Bilang kalangweran, panoy pangileletneg mo na pundasyon mo? No labay moy manlingkor ed Bethel, nagunggonaan ka diad maalwar a pangonsidera ed onggendan.

¹⁹ “Ilugar” Iyan Espisyal a Pribilehyo ed Serbisyo: Singa nikurit diad Mateo 19:12, unong ed New World Translation, pinaseseg nen Jesus iray babangatan to ya “ilugar” so kurso na inka-walad kasuloan. Akin? Aliwan lapud personal iran rason, noagta “nisengeg ed panarian na katawenan.” Impaseseg met nen Pablo itan diad pagmaliw a “lawas a manlilingkor ed Katawan ya anggapoy pakasebelan.” (1 Cor. 7:32-35, NW) Makapaermen, dakel so makakasaew ed pribilehyon panlingkor ed Bethel bilang walad kasuloan a lalaki lapud asakbay iran angasawa. Labay tayon pasesegen iray agagi tayon lalaki a mangusar na saray biskeg da diad pangemtan na sigpot-panaon a ministeryo legan ya anggapo niray responsabilidad da ed pamilya. Insan, no diad ilabas na panaon et desidien day mangasawa, sikaray magmaliw a lalon maong ya asawan lalaki lapud impakagamor da na malaem ya eksperiensia ed bilay tan ed Kristianon ministeryo. Kayari na impanlingkor ed loob na pigaran taon diad Bethel, arum so angasawa tan akapantultuloy iran nanlingkor ditan bilang sanasawa. No diad saginonor et awalaan ira na arum iran pribilehyo, a singa say panagbiahen manangasikaso odino panagmisionaryo, talagan agda pagbabawian so panaon ya inggana ra pian ilugar so serbisyo ed Bethel.

²⁰ Agpapaamper ed Materyal Iran Gegemtan: Maabig no itepet na balang kalangweran: ‘Kasin say kalat ko kayarik a mangraduar ed high school et say pangemtan na sigpot panaon a sekular a karera odino say sigpot panaon a panlingkor ed si Jehova?’ On, mankaukolan na panagsakripisyo so sigpot-panaon a panaglingkor ed si Jehova. Balet ta ontan met ed pangegemtan na sekular a karera! Diad kaunoran, dinan a kurso so talagan walaan na manbayag tan makagunggonan resulta? Inter nen Jesus so malinew ya ebat. Unong ed Mateo 6:19-21, inkuanto: “Agkayo mantipon a nipaakar ed sikayo na kaykayamanan ed tapew na dalin, a sikaray deralen na saray bokbok tan lati, tan sikaray kotkoten tan takewen dia na saray matakew. Noag say mantipon kayo a nipaakar ed sikayo na kaykayamanan ed tawen, a diman agderalen na saray bokbok tan lati, tan diman agkotkoten tan agtakewen na saray matakew. Ta no iner so kawalaay kayamanan mo, diman met so kawalaay pusom.” Komon ta say kapusoan tayo so agbalot mangitonton ed sikatayo ed pangemtan na minumundon karera odino ed materyal iran bengatla noagta say intiron-kamarerwa a serbisyo ed si Jehova. Amin tayo so nepeg a mamidbir a say alenleneg a walay kablian a kalat a gegemtanen et say maabig a relasyon ed si Jehova, ta pian napaliket tayoy puso to. (Uli. 27:11) Diad pangiyuna ed si Jehova ed bilay tayo legan a wala ni’d kalangweran, nipatnag tayo no iner so akateenan na saray maabig a kalidad tayo tan no panon kaimportante so Panarian ed sikatayo. Tandaan, “say bendision nen Jehova makapayaman; tan agmangarum na ermen.” (Uli. 10:22) Saray kalangweran so walaan na ekselentin pankanawnawan mangipanengneng no antoy ipapapuso ra diad pangipawil na bengatlan walay kablian ed si Jehova lapud amin ya ipapagamor to ed sikara. Say serbisyo ed Bethel so mangiter na ontan ya alay abig a pankanawnawa parad saraman so makakapet ed saray kualipikasyon. Say sakey a kundang ed saya et say igapo ed payunir a serbisyo.

²¹ Nepeg a Malinis ed Moral Iramay Manlilingkor ed Bethel: Intepet na salmista: “Anto so pamalin na sakey a malangwer a too na dalan to?” Inyebat to: “Say panangimano unong na salita [nen Jehova].” (Sal. 119:9) Laktipen na satan so ipaliis ed antokaman a walay pisiglaotan ed makaderal ed moral a sistema na bengabengatla nen Satanas. Say pornograpiya ed Internet, agmanepeg a kondukta ed agkapara ed sekso, mabanday a musika, makaderal a panligliwaan, tan agni manepeg a panag-inum na alak so pigara labat ed saray patit nen Satanas ya uusaren to pian amperen iray kalangweran tayo ed pakadampot da na espiritual iran kalat. Nakaukolan so mabiskeg a determinasyon pian naresistian irayan taktika to. Bilang kalangweran, no nalalanor ka la ed dinanman ed sarayan bengatla, mitongtong ed saray mamatatken ed kongregasyon a kawalaan mo tan resolbien irayan isyu sakbay kan mangaplay parad serbisyo ed Bethel. Importante so pakawalaan na malinis a konsiensia ed sigpot a panlingkor ed si Jehova.​—1 Tim. 1:5.

²² Aralen so Pibagay ed Arum: Sakey ya importantin kakaukolanen pian matalona so serbisyo ed Bethel et say panaral a mibagay ed arum. Say pamilyay Bethel ed Pilipinas so tugyopen na nilasus ya agagin lalaki tan bibii a nanlapud amin a nengneng na bilay. Anggaman sarayan nanduruman personalidad so mangaarum ed espiritual a karakpan na Bethel, no maminsan et mangipaarap met itan na saray angat. No nononoten moy serbisyo ed Bethel, maabig no tepetan moy inkasika: ‘Kasin mainomay ak a naopendi sano ag-onabobon so arum ed opinyon ko? Kasin mainomay ak a pibagayan na arum?’ No kaukolan mon paaligwasen irayan pamaakaran, igapom la natan a pankimeyan iratan. Say panggawam ed satan so ontulong ed sika pian lalon mainomay kan onadapta a manayan tan mankimey a kaiba iray membro na pamilyay Bethel.

²³ Panggunaetan so pagmaliw a maespiritual a too diad pamayubo ed maapit a relasyon ed si Jehova. Bayuboan so maabig a programa na personal a panagaral, a laktipen toy inagew-agew a panagbasa na Biblia. Magmaliw ya aktibo ed panangipulong na maong a balita ed arum. Diad panggawa ed sarayan bengatla, nipatnag moy espiritual ya iyaaligwas mo. (1 Tim. 4:15) Agaylan maabig iran iilaloan so manatalaran ed saraman so manpaparaan natan parad kareran sigpot-panaon a serbisyo!

²⁴ Atateng, Ipasal Yoy Ananak Yo: Antoy nagawaan na saray atateng pian napaseseg iray ananak da a gemtanen so sigpot panaon a ministeryo? Inkuan nen Jesus: “Balang sakey no nayadyari mipara ed managbanga’to.” (Luc. 6:40) Say nipasal a maong ya eskuela so mangipatnag na maabig iran kalidad na dedikadon managbangat to. Saray Kristianon atateng so nepeg a lawas mannonot ed sayan prinsipyo legan a panggugunaetan dan ipasal so ananak da “tekep na maridios a debosyon bilang kalat [da].” (1 Tim. 4:7, NW) Lapud say ananak so onkiling a mangipatnag ed saray awawey na atateng da nipaakar ed espiritual iran bengatla, oniay maabig ya itepet na atateng ed inkasikaran dili: ‘Kasin personal min papablien so kimey a gagawaen diad Bethel pian iyalibansa so intereses na tuan panagdayew ed si Jehova? Kasin momoriaen miray bendision nen Jehova diad uksoyan na Bethel? Kasin sisiaen mi a say bilay ed serbisyo ed si Jehova et sankaabigan a karera a pilien na ananak mi? Kasin ipapaseseg mi so sigpot-panaon a serbisyo diad salita tan alimbawa?’ Say mismon impapuson apresasyon tayo ed serbisyo ed Bethel tan say kimey a gagawaen ditan so ontulong ed sikatayo pian nipaslep ed ananak tayo so ontan met a panamabli.

²⁵ Walaan si Elkana tan Ana na aralem a panamabli parad tuan panagdayew. Angipanengneng ira na ekselentin ehemplo parad Kristianon atateng natan. Diad kadaanan ya Israel, saray Israelitan lalaki labat so kinaukolan ya ‘ompatnag ed Katawan a Jehova’ a mamitlo ed sakey taon diad tabernakulo. Anggaman ontan, “tinaon” a nambiahe si Elkana na manga 30 kilometro, ya akaran, kaibay intiron pamilya to pian manbagat diad sayan sentro na panagdayewan ed si Jehova. (Ex. 23:17; 1 Sam. 1:3, 4, 9, 19; 2:19) Mapatnag a kaliktan na sayan ulo na pamilya a say intiron pamilya to so mibiang ed personal a kapagaan to parad espiritual iran bengatla.

²⁶ Akibiang si Ana ed interes nen masiken to ed tuan panagdayew. Pinabli ton tuloy so obligasyon to a makasuporta ed tuan panagdayew diad tabernakulo. Nansamba si Ana a no sikatoy pagamoran nen Jehova na anak a laki, sikatoy itarya to parad serbisyo ed tabernakulo. (1 Sam. 1:11) Iyaabuloy na Mosaikon Ganggan so kanepegan na asawan laki ya ibaliwala so agmatukoy a samba na akulaw to. (Num. 30:6-8) Balet, mapatnag ya inmabuloy si Elkana ed samba nen Ana, a pakapatnagan a sinuportaan to met itan a balikas na tuan panagdayew!​—1 Sam. 1:22, 23.

²⁷ Kasin say anak dan si Samuel so naimpluensiaan ed makagunggonan paraan lapud panamabli tan maabig ya awawey ya impatnag na atateng to? On. Bilang kalangweran, mabulos tan matoor ya inasikaso nen Samuel iray kimey a nipabtang ed sikato tan sikatoy nipasal parad kaaruman a papablien iran pribilehyo ed serbisyo ed Dios. Ag-anampot so interes ya impatnag nen Elkana tan Ana ed serbisyo nen Samuel diad tabernakulo kayari ton inawat iray kimey to diman. Sikatoy intultuloy dan binisita a maparanay pian pasesegen tan suportaan legan ton gegemtanen so sigpot-panaon a serbisyo.​—1 Sam. 2:18, 19.

²⁸ Agaylan matalonggaring ya ehemplo so impanengneng nen Elkana tan Ana parad saray Kristianon atateng natan! Sano narengel na ananak tayo so impapuso iran balikas na panamabli tayo ed pribilehyon serbisyo ed Bethel tan nanengneng da so dilin-panagsakripisyon espiritu ya ipapatnag tayo diad pangiyaalibansa na intereses na Panarian, sikara met so mamayubo na puson nikiling a manserbi ed arum. Dakel ya atateng so matalonan angipaslep ed sayan maabig ya inklinasyon ed ananak da. Onia so insulat na sakey a mantaon na pitora: “Sano ombaleg ak, labay koy manayam diad Bethel, tan walay labay kon gawaen diman. (1) Manmakinilya na Panag-Bantayan tan Awake! iran magasin, (2) mantrabaho diad art section yo, (3) mantupi na impesak. Anggan dinan a kimey a wala. Agak manpili.” Agaylan makapaliket so pakanengneng ed ontan a mabulos ya espiritu a nababayuboan ed puso na ananak tayo!

²⁹ Sikayoran kalangweran, tandaan a “say mundo mangangga, tan saray penel to: sabalet so mangunor ed linawa na Dios onsiansia lawas.” (1 Juan 2:17) Itultuloy a gegemtanen iray espiritual a kalat, pati say espisyal a pribilehyo na serbisyo ed Bethel. Atateng, alig yo so ehemplo na saray matoor nensaman ya amaseseg ed ananak da a mamayubo na maridios a debosyon. (2 Ped. 3:11) Tan komon ta gawaen tayon amin so biang tayo diad panulong ed saray kalangweran ya agagi tayon lalaki tan bibii a manlingkor ed Matalonggaring a Manamalsa tayo diad sankalaknaban no nayadyari, unong a saya so ‘walaan na sipan na sayan bilay a peles, tan say onsabi.’​—1 Tim. 4:8; Ecl. 12:1.

[Kahon ed pahina 4]

Manuna Iran Kakaukolanen Parad Serbisyo ed Bethel

● Sakey taon lan abautismoan

● Maespiritual a too a walaan na aralem a panangaro ed si Jehova tan ed organisasyon to

● Walaan na maabig ya espiritual, mental, emosyonal, tan pisikal a bunigas

● Mas pilien iramay manlilingkor bilang payunir

● Mibabaley odino legal a permanentin residente ed Pilipinas

● 19-35 ed edad