Sabien so Puso na Iyaaralan Mo
1 Sakbay a tinmokotok ed tawen si Jesus, binilin toray babangatan to ya ibangat day arum a “mangunor” ed amin a bengatlan ingganggan to. (Mat. 28:19, 20) Pian ‘naunor’ na sakey a too iray ganggan nen Kristo, kaukolan ya ontanek ed puso to so nanaaralan to. (Sal. 119:112) Panon mon pakiwasen so puso na iyaaralan mo na Biblia?
2 Ipikasi so Panangiwanwan nen Jehova: Say panggawa na babangatan et kimey na Dios. Kaukolan so panamendision to pian ontalona, ya aliwan saray abilidad tayo. (Gawa 16:14; 1 Cor. 3:7) Kanian, importante so pangipikasi ed tulong nen Jehova diad pangibangat na katuaan ed arum.—Isa. 50:4.
3 Tebeken No Antoy Sisisiaen na Iyaaralan: Natebek tayo no antoy ibaga tayo pian nasabi kapusoan na totoo no amta tayo so sisiaen da tan no akin a sisiaen da itan. Akin a makapasagyat ed sakey ya iyaaralan so partikular a bangat? Antoy akakombinsian to a napanisiaan itan? Say ontan a pikakabat so makatulong ed sikatayo a mansalita tekep na pakatebek.—Gawa 17:22, 23.
4 Mangiletneg na Makatunongan tan Makasulatan ya Argumento: Say katuaan so kaukolan a natalosan na iyaaralan. (Gawa 17:24-31) Kaukolan itayon mangiter na mabiskeg a rason parad ilalo tayo. (1 Ped. 3:15) Balet, lawas gawaen itan diad mapangasi tan maanos a paraan.
5 Tekepan na Saray Ilustrasyon so Panagbangat Tayo: Aglabat mamainomay iray ilustrasyon ed pantalos na iyaaralan noagta pakiwasen met na saratan so liknaan to. Apektaen na saratan so nonot tan puso. Mabetbet ya inusar nen Jesus iratan. (Mar. 4:33, 34) Siempre, pian epektibo, say ilustrasyon ya usaren so nepeg ya ontukoy ed punton sisingbaten, tan kaukolan a mitukoyan itan ed bilay na iyaaralan.
6 Ipaamta Iray Gunggona ed Pangawat na Katuaan: Labay na totoo a naamtaan iray gunggona ed pangiyaplika na nanaaralan da. Tulongan moy iyaaralan mo pian natalosan toy kakabatan na saray salita nen Pablo diad 2 Timoteo 3:14-17.
7 Agnadidismaya no walaray ag-onkiwas unong ed ibabangat mo. Aliwan amin a puso et mangawat. (Mat. 13:15) Anggaman ontan, walaray indibidual a talagan magmaliw a mananisia. (Gawa 17:32-34) Komon ta dakel ni so natulongan na saray sagpot yo ed panabi ed kapusoan tekep na maong a balita pian mangawat tan “mangunor” ed ingganggan nen Jesus.