Labay Yon Malaem ni so Nagawaan Yo?
1 Inyaliling nen Jesus so Panarian ed mabmabli iran kayamanan. (Mat. 13:44-46) Say kimey a panangiwakawak na balita na Panarian so mabmabli met a kayamanan. Sayan ministeryo so makanepegan ya iyuna ed bilay tayo, anggano say sigpot a pibiang ed satan et lanoren toy pakalimitaan na sakey. (Mat. 6:19-21) Labay yon malaem ni so nagawaan yo ed serbisyo nipaakar ed Panarian?
2 Konsideraen Irayan Nakaukolan: Walaray kaukolan a bengatla ta pian napalaknab tayoy personal a pibibiang tayo ed ministeryo: (1) pagmaliw a determinadon mangiyuna ed intereses na Panarian ed bilay tayo (Mat. 6:33); (2) pangagamil na pananisia tan panmatalek ed si Jehova (2 Cor. 4:1, 7); (3) ikerew na tulong ed Dios panamegley na masimoon tan mantultuloy a pikakasi (Luc. 11:8-10); (4) itumbok tan ikiwas a mitunosan ed saray pikakasi tayo.—Sant. 2:14, 17.
3 Saray Paraan a Napalaknab Tayoy Ministeryo Tayo: Amin tayo so makapangiletneg na manuna a kalat pian regular mangusar na panaon ed ministeryo kada bulan. Balet kasin ninonot yo met la so panganamot ed amin a pankanawnawa pian manpulong ya impormal, a panggugunaetan yon gawaen a mas makabaliksan iray presentasyon yo, paaligwasen so inka-epektibo na saray panagpawil yo, tan pambabanikelan so pangikondukta na progresibo iran panangiyaral na Biblia? Kasin sarag yo so man-auxiliary odino man-regular payunir odino manlingkor ed babaleg so pankaukolan? No sakey kan bautismadon agin laki, kasin nayarian moy ondampot ni pian sikay onkualipika bilang ministeryal a lingkor odino sakey a matatken? (1 Tim. 3:1, 10) Kasin napalaknab moy ministeryom diad pangaplay mo parad serbisyo ed Bethel odino diad Ministerial Training School?—Luc. 10:2.
4 Sakey ya agin laki a walaan na sigpot-panaon a trabaho tan manguusar na dakel a panaon ed saray isport ya aktibidad so apaseseg a man-regular payunir. Sikatoy ginmapon nan-auxiliary payunir insan to inyarunsa iray sirkumstansya to pian onloob ed sigpot-panaon a ministeryo. Diad saginonor et sikatoy nanaral ed Ministerial Training School, ya angiparaan ed sikato parad peles ya asainmin to bilang manangasikaso na sirkito. Sikatoy malikeliket ta kinmiwas unong ed panamaseseg a naawat to, tan matalek a sikatoy mas maliket bilang resulta na desisyon ton manggawa ni na malaem ed serbisyo nipaakar ed Panarian.
5 Bebendisyonan nen Jehova iraman so sipaparaan lawas. (Isa. 6:8) Agmo abuloyan a sikay nasebelan ed pamalaknab moy ministeryom tan ed panliket ed nagkalalon pakapenek tan pakapaseseg bilang resulta.