Kasin Sigpot Mon Susumpalen so Ministeryom?
1 Diad libro na Saray Gawa, nibabaga ed sikatayon sinumpal na saray babangatan nen Jesus so ministeryo ra panamegley na “sigpot ya impantasi” ra ed totoo. (Gawa 2:40; 8:25; 28:23, NW) Peteg ya ontan so gagala nen apostol Pablo. (Gawa 20:24) Agta satan so kalat mo bilang ministro na maong a balita? Panon mon nagawaan iya?
2 Iparaan so Presentasyon Mo: Pian naseguro a makapanpulong kan epektibo ed ministeryo, importante so panagparaan. Saya so nagkalalo lan tua sano mangiyoopresi na saray magasin, lapud aliwan apasakey iray tema. Pian nakinlongan itayon maong, ipaparungtal na sayan isyu na Ministeryo Tayo ed Panarian so balon kabiangan—say egpang ed kawigi, ya akalistaan na pangaligan iran presentasyon parad peles iran magasin a Panag-Bantayan tan Awake! Say nipanpanaon a tema a managyat ed dakel a totoo so ipabitar ed kada isyu. Panon mon palaknaben irayan antikey a presentasyon?
3 Mamili na sakey a suhestion a liknaen mon sankaepektiboan ed teritorya yo. Basaen a maong so niparungtal ya artikulo, tan imanoen iray espesipikon punto a maseguron managyat na interes. Mananap na nisitan teksto ed magasin a misiglaotan ed sisingbaten tan nayarian mon ibasa ed unabung. Mangiyarum na antikey a konklusyon pian pasesegen so ondedengel ed sika a basaen so magasin tan antikey ya ibalikas, no matukoy, a nayarin mandonasyon so unabung parad sankamundoan a kimey na Tastasi nen Jehova. Natan, ipasal so presentasyon mo.
4 Iplanon Usaren so Biblia: Tekep na maabig a panagplano, say teksto so nayarin mabetbet ya itekep ed presentasyon mo. Alimbawa, saray eksperiensyadon manangipalapag ed dakel a paspasen so matalona diad pankakabkaabungan da a sankaegnaan so Biblia, ya ibano so unabung, tan ikuan da:
◼ “Itetepet mi ed saray totoo no kasin manisia ira ed saya . . .” Basaen so Genesis 1:1, insan tepetan: “Kasin onabobon ka ed sayan balikas?” No onabobon so too, insan ibaga: “Onabobon ak met. Balet, kasin moriaen mo a lapud pinalsa na Dios so amin a bengatla, et sikato met so responsable ed karelmengan?” Kayarin dengelen so ebat na too, basaen so Eclesiastes 7:29. Ilukas so libron Pikakabat ed pahina 71, tan basaen so parapo 2. Pasesegen so too a basaen toy libro. No say unabung et ag-onabobon ed balikas a walad Genesis 1:1, pasesegen ya usisaen toy libron Creation.
5 Bayuboan so Amin ya Interes: Agmo sigpot a nasumpal so ministeryom no agmo bayuboan so aromog ya interes. Sano maabig so impitongtong mo, balanglan akapangipalima ka na saray magasin odino arum a literatura, irekord so ngaran tan address na too. Panseetan a bayuboan so interes na too diad ipawil a tampol. Nagkalalo ed amin, iyopresi so panangiyaral na Biblia.
6 Amta na saray inmunan-siglon babangatan ya ingganggan ira nen Jesus “pian sigpot a mantasi.” (Gawa 10:42, NW) Onaaplika met itan a ganggan ed sikatayo, lapud satan so alenleneg a paraan pian makapanggawa itayoy babangatan. (Mat. 28:19, 20) Gawaen tayo sirin so anggaay nayarian tayo pian sigpot tayon nasumpal so ministeryo tayo.—2 Tim. 4:5.