Mangiletneg na Espiritual Iran Kalat
1 Agaylan pribilehyo so pakapandayew ed si Jehova ed andi angga! Pian natulongan itayon nagamoran itan a kalat, nayarian tayoy mangiletneg na espiritual iran kalat ed kaplesan tan pankimeyan a dampoten iratan. Saya so ontulong ed sikatayon sikakabat a nausar iray biskeg tayo. (1 Cor. 9:26) Antoray kalat a sarag mon dampoten?
2 Panagaral na Biblia: Kasin manpaparaan ka parad kada miting ed kongregasyon? No ontan, kasin ipapanaon mo so pansukimat tan pandalepdep sano manaaral ka? Alimbawa, sano manpaparaan ka parad sinimban Panagaral na Panag-Bantayan tan Panagaral na Kongregasyon ed Libro, kasin bastam labat gugulisan iray ebat odino kasin nenengnengen mo iray nisitan kasulatan tan uumamengen mo met iray rason ed walan eksplinasyon? Kasin nagawaan mon kalat so pansukimat ed pigaran punto kada simba manlapud niasain a panagbasa ed Biblia parad Teokratikon Eskuelaan Parad Ministeryo? Say ontan ya espiritual a panagsukimat so mankakaukolan na panaon tan sagpot, balet satan so mamawala na daakan iran tumang.—Uli. 2:4, 5.
3 Saray Miting ed Kongregasyon: Say sananey nin kalat et say iyatendi ed amin a limaran miting ed kongregasyon a regular. Say isabin masakbay pian makapituyaw ed saray kapananisiaan tan makapibiang ed panlukas a kanta tan pikakasi so ontulong pian napabiskeg so espiritu na kongregasyon. Nayarian tayo met a panggunaetan so pankomento ed kada miting tan pankimeyan a paaligwasen iray komento tayo. Nayarin ipanengneng mo no panon a makabaliksan so teksto ed parapo a sisingbaten odino ipabitar no panon ya onaaplika so materyal ed inagew-agew a kabibilay.—Heb. 10:24, 25.
4 Lawak na Serbisyo: Say ministeryo tayo so onaligwas a maong no mangiletneg itayo na saray kalat. Kasin walaan ka na personal a kalat ya oras, ya iplaplanom ya usaren ed panaglingkor kada bulan? Naimano na arum a satan so makatulong. Odino kasin napaaligwas mo so arum ya aspekto ed ministeryom, a singa say panangusar na Biblia diad panagkabkaabungan, panggawa na mas makabaliksan iran panagpawil, panggunaet a pangigapo na panagaral na Biblia, odino pambangat a mas epektibo ed saray iyaaralan?
5 Atateng, kasin papasesegen yoray anak yo a mangiletneg na saray kalat parad serbisyo ed si Jehova? Tulongan iran makamoria a say panlingkor bilang payunir, misionaryo, odino membro na pamilyan Bethel so ekselentin dalan pian nipanengneng so kaaralem na pisasalamat da ed si Jehova.—Ecl. 12:1.
6 Legan ya uusisaen tayo iray aktibidad tayo, mangiletneg na saray espiritual a kalat, insan pankimeyan a dampoten iratan, naeksperiensya tayo so nagkalalon liket diad panaglingkor tayo tan makapaseseg ed arum.—Roma 1:12.