Panumpal ed Dedikasyon Tayo
1 Balanglan sikayo so agano ni odino abayag lan abautismoan, maseguron nanonotan yo ni itan ya importantin ebento ed bilay yo. Say bautismo tayo et aliwan sampot, noagta, gapoan na legay-bilay a dedikadon panaglingkor a lawas mansiansia. (1 Juan 2:17) Anto so nalalanor ed panumpal ed dedikasyon tayo?
2 Tumboken so Ehemplo nen Kristo: Sanen abautismoan si Jesus, sikatoy “ginmapo ed kimey to,” a mangiyabawag ed “ebanghelyo na panariay Dios.” (Luc. 3:23, NW; 4:43) Mipadpara, diad impangisimbolo tayo na dedikasyon tayo ed si Jehova panamegley na bautismo, nagmaliw itayon ordinadon ministro na maong a balita. Anggaman nakakaukolan so dakel a panaon tan sagpot pian nagamoran so materyal iran pankaukolan ed bilay, say manunan kimey tayo et say Kristianon ministeryo. (Mat. 6:33) Imbes a pambanikelan day igamor na kayamanan odino inkabantog, saramay dedikado ed Dios so manggugunaet a ‘mamaaligwas ed ministeryo ra,’ a singa ginawa nen apostol Pablo. (Roma 11:13, NW) Kasin papablien mo so pribilehyom a lingkoran si Jehova tan mamapasya kan mamaaligwas ed serbisyom ed sikato?
3 Singa ed ginawa nen Jesus, nepeg tayon ‘sumpaen so Diablo.’ (Sant. 4:7) Tinukso nen Satanas si Jesus kayari na bautismo To, tan pupuntiryaen to met iray dedikadon lingkor nen Jehova natan. (Luc. 4:1-13) Lapud apaliberan itayo na mundo nen Satanas, nepeg tayon disiplinaen so inkasikatayo, a paliisan so antokaman a makadutak ed nonot odino makaderal ed puso tayo. (Uli. 4:23; Mat. 5:29, 30) Nasisimbawa iray Kristiano ya ‘agda nayarian so minabang ed dulang na Katawan tan say dulang na saray demonyo.’ (1 Cor. 10:21) Kakaukolanen na saya a manbantay itayo sumpad makapuy a panliliket, mauges iran pililimog, tan saray kapeligroan ed Internet. Kakaukolanen met na saya so pangipulisay tayo ed apostatan materyal. Say pagmaliw ya alerto ed saraya tan ed arum niran taktika nen Satanas so ontulong ed sikatayo pian nasumpal tayo so dedikasyon tayo.
4 Anamoten Iray Probisyon na Dios: Pian natulongan itayon manumpal ed dedikasyon tayo, si Jehova so ontutulong panamegley na Salita to tan say Kristianon kongregasyon. Gawaen a kabiangan na inagew-agew a rotina yo so panagbasa ed Biblia tan panagpikasi ed si Jehova. (Jos. 1:8; 1 Tes. 5:17) Panggayagaan iray miting ed kongregasyon. (Sal. 122:1) Milimog ed saramay ontatakot ed si Jehova tan manguunor ed bilibilin to.—Sal. 119:63.
5 Diad tulong nen Jehova et nasumpal yo so dedikasyon yo ed sikato tan panggayagaan yo so magnayon a panlingkor ed sikato.—Sal. 22:26, 27; Fil. 4:13.