Aligen so Kamaongan nen Jehova
1 Kayari tayon nanliketan so marakdakep ya iseselek na agew odino mananam a panangan, agtayo kasi pisalamatan si Jehova, say Lapuan na amin a kamaongan? Say kamaongan to so mamakiwas ed sikatayon manliket a mangalig ed sikato. (Sal. 119:66, 68; Efe. 5:1) Panon tayon nipatnag so kalidad a kamaongan?
2 Diad Saray Agmananisia: Say sakey a paraan a naalig tayo so kamaongan nen Jehova et diad masimoon a pampaga ed saramay agtayo kapananisiaan. (Gal. 6:10) Say pangipatnag na kamaongan ed praktikal iran paraan so nayarin walaan na positibon epekto ed no panon dan moriaen iray Tasi nen Jehova tan say mensahen awit tayo.
3 Alimbawa, legan a manaalagar diad sakey a klinika, akayurong so sakey ya agin lakin payunir ed unaan na sakey ya akulaw ya ompatnag a grabe so sakit to nen saray arum nin wadman. Sanen turno to la so nengnengen na doktor, pinalugaran to so akulaw. Diad saginonor et anengneng to lamet imay akulaw diad tindaan, tan malikeliket so akulaw ed impakanengneng ed sikato. Anggaman datin agmangaawat ed maong a balita, inkuanto ya amoria to la natan a saray Tasi nen Jehova so peteg a mangaaro ed kapara ran too. Nigapo so regular a panangiyaral na Biblia ed sikato.
4 Diad Saray Agagi Tayo: Aaligen tayo met so kamaongan nen Jehova sano tutulongan tayo iray kapananisiaan tayo. Diad panaon na desyang, sikatayo so manunaan ya ontutulong ed saray agagi tayo. Nipatnag tayo met so onian awawey sano tulongan tayo iramay mankaukolan na transportasyon pian makapiaral, sano bisitaen tayo iramay maletey la, tan sano inatnat tayo so panangaro tayo ed saramay agtayo ni kabkabat a maong diad kongregasyon.—2 Cor. 6:11-13; Heb. 13:16.
5 Ipapatnag met nen Jehova so kamaongan diad pagmamaliw ton ‘akaparaan a mamerdona.’ (Sal. 86:5) Bilang pangalig ed sikato, nipanengneng tayo a papablien tayo so kamaongan diad pamerdona ed arum. (Efe. 4:32) Pagmamaliwen na saya a ‘maong tan makapaliket’ so pililimog tayo ed saray kapananisiaan tayo.—Sal. 133:1-3.
6 Komon ta say daakan a kamaongan nen Jehova so mamakiwas ed sikatayon mangidayew lawas ed sikato tan manggayaga a nagkalalo. Tan komon ta mamakiwas itan ed sikatayon manbanikel a mangalig ed kamaongan to diad amin a gawaen tayo.—Sal. 145:7; Jer. 31:12.