No Anto so Ibaga Nipaakar ed Saray Magasin

Say Panag-Bantayan Hunyo 15

“Agta onabobon kayo a diad sayan modernon mundo et mairap so panangipasal ed ananak? [Abuloyan ya onebat.] Imanoen pa iyan garantiya a matalonan nagawaan itan na atateng. [Basaen so Uliran 22:6.] Iyoopresi na sayan isyu na Say Panag-Bantayan so praktikal a simbawa ya ontulong ed atateng a pidenengan iyan angat.”

Awake! Hunyo 22

“Ipasen na arum ya agmitunosan ed siensia so panisia ed Dios. Balet amta yo ta a walaray sientista a mangibabagan say siensia et onsusuporta a mismo ed panisia ed Manamalsa? [Abuloyan ya onebat.] Sisingbaten na sayan isyu na Awake! so pigaran paneknek no akin a nibaga da itan.” Basaen so Roma 1:20.

Say Panag-Bantayan Hulyo 1

“Sano walay nagawan trahedya, dakel so manuumameng no kasin talagan iyaansakit na Dios iray totoo tan naiimano to so paniirap da. Naisip yo ta met la itan? [Abuloyan ya onebat.] Sisingbaten na sayan magasin no panon ya ipapatnag na Dios so panangiyansakit to ed sikatayo natan tan no panon ya angitarya na basiyan ed pangekal na amin a paniirap.” Basaen so Juan 3:16.

Awake! Hulyo 8

“Parad maslak a totoo, agta say inkatobonbalo so panaon na likeliket tan subsubok? [Abuloyan ya onebat.] Sayan magasin so manisingbat ed saray pananguman a naeeksperiensya na saray katayatdang. Uusisaen met na saya so pigaran makabat a simbawa ya ontulong ed sikaran gawaen so sankaabigan legan na inkatobonbalo ra.” Basaen so Eclesiastes 12:1.