Parte 1—Pangikondukta na Progresibo Iran Panagaral na Biblia
Anto so Panagaral na Biblia?
1 Diad sankamundoan, manga anemiran milyon a panagaral na Biblia so ikokondukta na totoo na Dios ed kada bulan. Diad pangusar na epektibo iran metodo ed panagbangat, natulongan tayo irayan iyaaralan na Biblia ya onaligwas angga ed dedikasyon tan bautismo tan magmaliw a “manepeg a mangibangat met ed saray arum.” (2 Tim. 2:2) Kasin kaliktan yon tulongan so iyaaralan yo pian nadampot to itan ya ibubulaslas? Onggapo ed sayan isyu, iparungtal na Ministeryo Tayo ed Panarian so serye na saray artikulo a mangipapaliwawa ed manuna iran aspekto na panangikondukta na progresibo iran panagaral na Biblia.
2 No Kapigan ya Ireport so Panangiyaral na Biblia: No regular tan sistematiko yon sisingbaten so Biblia, anggaman antikey labat, ya uusaren so Biblia tan say nirekomenda iran publikasyon, mangikokondukta kayo la na panagaral ed Biblia. Panangikondukta la itan anggano diad puerta gagawaen so panagaral odino diad panamegley na telepono. Nayari lan ireport so panangiyaral sano amidua lan inkondukta itan manlapu nen indemostra so uksoyan na panagaral tan no ompatnag a mantultuloy itan.
3 Say brosyur a Kakaukolanen tan say libron Pikakabat so uusaren iran publikasyon ed panangikondukta na dakel a panagaral ed Biblia. Kasumpal na saraya, no napatnagan ya onaaligwas so too, anggaman kalkalna, tan nababayuboan toy panamabli ed nanaaralan to, nayarin ituloy so panagaral ed libron Dayewen so Dios. Nayarin usaren so brosyur a Nayarian Yoy Magmaliw a Kaaro na Dios! ed totoon abebay aral da tan nairapan a manbasa.
4 Say kimey a panangiyaral na Biblia so epektibo ed impanulong ed minilyon a magmaliw a tuan babangatan nen Jesu-Kristo. (Mat. 28:19, 20) Diad pangiyaplika ed saray suhestion ya iparungtal ed onsaginonor iran artikulo na sayan serye, makapangikondukta kayo na progresibon panagaral na Biblia.