Balon Uksoyan ed Panrepaso ed Saray Programa ed Asamblea
Legan ya ompapalaloy iyuuges na mundo nen Satanas, pabibiskegen itayo nen Jehova ‘ya ibeneg so ag-inkamaridios tan saray ibibeg a mangaraldalin, a manbilay itayo komon ed sayan panaon a sidarangka tan situtunong tan sisasalamsam.’ (Tito 2:12) Arum ed saray probisyon ya itatarya na “matoor tan makabat ya aripen” et saray programa ed tinaon a sirkiton asamblea tan agew na espisyal ya asamblea. (Mat. 24:45) Agaylan makapabiskeg irayan espiritual a pantitipon!
Pian natulongan itayon natandaan tan niyaplika so bilin a nitatarya, sakey a balon uksoyan ed panrepaso ed sarayan programa na asamblea so gawaen legan na 2005. Diad pahina 5-6 na sayan insert et wadtan iray artikulo a mangipagamor ed sikatayo na pauna lan impormasyon ed no anto so iparungtal ontan met ed repason tepetepet ed kada programa na asamblea. Singbaten na saray kongregasyon iyan impormasyon diad Pantitipon Parad Panagserbi antis tan kayari na iyatendi ra ed saray asamblea da. Panon iyan iyuksoy?
Sakey odino duaran simba antis ya onatendi so kongregasyon ed sirkiton asamblea, walay samploran-minuto a paliwawa ed artikulon “Balon Programa ed Sirkiton Asamblea” ya iparungtal ed Pantitipon Parad Panagserbi pian sagyaten so pantalaran ed programa. Ipaimano met na espiker so repaso iran tepet tan pasesegen to so amin a mangisulat na nota bilang preparasyon ed panrepaso kalabas na pigaran simba kayari na asamblea.
Diad loob na pigaran simba kayari na asamblea, walay 15-minuto a repaso ed unonan agew na programa na asamblea ya ilaktip ed Pantitipon Parad Panagserbi. Diad ontumbok a simba, say 15 minuto so usaren ed panrepaso ed komaduan agew na programa. Saray repason tepet a nitarya ed sayan insert so onkanan basiyan parad saratan a diskusyon. Say repaso so nepeg a niyapasakey ed praktikal a kablian na impormasyon. Nayarin iyuksoy na saray mamatatken a patikeyan, bawasen, odino iyeskedyul lamet so arum a parte na Pantitipon Parad Panagserbi pian nisalet irayan panrepaso.
Parehon uksoyan so tumboken parad panrepaso ed agew na espisyal ya asamblea, balet ta sakey labat a 15-minuto a betang so panrepaso ed interon programa. Labay tayon amin ya isinop iyan insert tan usaren itan pian sigpot itayon nagunggonaan ed maabig a bilin ya itatarya nen Jehova.—Isa. 48:17, 18.