Pakikiwasen Itayo na Distriton Kombension a Manakar a Kaibay Dios
Agaylan impurek na “Manakar a Kaibay Dios” a Distriton Kombension so malinew a panangidirehi nen Jehova: “Saya so dalan, ondalan kayo ed sikato”! (Isa. 30:21) Say pangiyaplika ed saray naawat tayon bilin so ontulong ed sikatayon mansiansian ‘malikas ed no panon so panakar tayo.’ (Efe. 5:15) Tan ontulong met ed sikatayo so pandalepdep ed saray naaralan tayo legan itayon ‘manaakar ed katuaan.’—3 Juan 3.
Usaren so onggendan a tepetepet tekep na saray personal a nota yo pian makapanparaan tan makapibiang ed panrepaso ed programa na kasumsumpal a distriton kombension. Nagawa so panrepaso diad Pantitipon Parad Panagserbi ed simba na Pebrero 21.
1. Panon a si Enoc so akapanakar a kaibay Dios anggaman sikatoy manbibilay nensaman diad magulon panaon? (Heb. 11:1, 5, 6; Jud. 14, 15; “Panakar a Kaiba so Dios Diad Sayan Magulon Panaon”)
2. Diad antoran pamaakaran na bilay ya onaplika so prinsipyo ed Lucas 16:10? (“Kasin ‘Matoor Kayo ed Dagdaiset?’”)
3. (a) Mamitla na apatiran praktikal iran leksion a naromog ed Oseas kapitulo 6 anggad 9 ya ontulong ed sikatayon manakar a kaibay Dios. (Os. 6:6, 7; 7:14; 8:7) (b) Anto niray kaaruman a punto manlapud Oseas kapitulo 10 ya anggad 14 so ontulong ed sikatayon manakar a kaibay Dios? (“Tutulongan Itayo na Propesiya nen Oseas a Manakar a Kaibay Dios”—Simposium)
4. Antoray praktikal a nagawaaan na saray Kristianon asawan laki tan asawan bii pian napansiansia ran malet so panamaley da? (Uli. 12:4; Efe. 5:29; “Agpansisianen so ‘Impantipon na Dios’”)
5. Panon tayon ipatnag so panagrespeto ed saray sagradon pantitipon tayo? (Ecl. 5:1; Isa. 66:23; “Panangipatnag na Respeto ed Sagrado Iran Pandaragup Tayo”)
6. (a) Anton taloran importantin aspekto na panagpulong a kimey tayo so nepeg tayon analisaen pian naseguro a makabkabaliksan so pibibiang tayo ed satan? (Isa. 52:7; Zac. 8:23; Mar. 6:34) (b) Antoran kabiangan na publikasyon a Good News for People of All Nations so aromogan yon mausa-usar? (“Maong a Balita Parad Totoo ed Amin a Nasyones”; “Panulong ed Saramay Mansasalita na Sananey a Lenguahe”)
7. Panon tayon natulongan iray balo ni pian nawalaan ira na kompiyansan mangipulong ed mensahe na Panarian? (Uko. 7:17; “Panulong ed Karaklan a Miulop ed Sikatayo Diad Ministeryo”)
8. Panon tayon ipapatnag a kombinsido itayon ‘asingger la so baleg ya agew nen Jehova’? (Sof. 1:14; “Manakar Itayo Lapu ed Pananisia, Aliwan Lapud Pakanengneng”)
9. (a) Panon kaseryoso so pakagapol tan pakapangigapol? (Mar. 9:42-48) (b) Panon tayon napaliisan so pakagapol? (Sal. 119:165) (c) Panon tayon napaliisan so pakapangigapol ed arum? (1 Cor. 10:24; “Paliisan so Antokaman a ‘Bengatlan Kagapolan’”)
10. Panon tayon napansiansia so inkabalanse tayo no nipaakar ed panag-anap na naasawa, panag-asikaso na bunigas, tan panagnegosyo? (Sal. 26:4; Mat. 6:25; 1 Tim. 6:9; “Pansiansia Yon Nagnap so Pakatebek Yo”)
11. (a) Anto so bengatlan makatantanda ed saramay pankanawnawa a si Jesus so sasankailien na arum? (Luc. 10:42; 24:32) (b) Panon tayon napenek so pankaukolan tayo parad panagligliwaan diad paraan a makarepresko ed sikatayo tan ed arum? (1 Cor. 10:31-33; “Makarepresko so Maabig Iran Aktibidad”)
12. Unong ed koma-23 a Salmo, antoray naaawat tayon bendisyon bilang karnero nen Jehova, tan antoray responsabilidad tayo? (1 Cor. 10:21; “Si Jehova so Pastol Tayo”)
13. Panon a tatalinengen na saray Kristiano so impuyan a bilin ya “anamoten so pankanawnawan panaon”? (Efe. 5:16, NW; “Panaliw ed Pankanawnawan Panaon”)
14. (a) Antoy saglawien na say “oras na panangukom” ya abitla ed Apocalipsis 14:7? (b) Panon tayon papaneknekan a talagan nisian itayo manlapud Babilonia a Baleg? (“‘Mantultuloy a Manbantay’—Sinmabi la so Agew na Pangukom”) (c) Antoran punto so nanggayagaan yo ed brosyur a Mantultuloy a Manbantay!?
15. Mamitla na taloran nakaukolan a kalidades a mangamper ed sikatayon ‘mangilingwan ed dalan a maptek.’ (2 Ped. 2:15; “Manalwar Sumpad ‘Pangilingwan ed Maptek a Dalan’”)
16. Panon a nipulisay na saray kalangweran so ‘basbas na marelmeng’? (Uli. 4:14; “Sikayoran Kalangweran—Manakar ed Basbas na Inkatunong”)
17. (a) Diad antoran dalan a si Pablo so alay abig ya ehemplo na panagsungdo? (Gawa 14:19, 20; 16:25-33) (b) Akin ya ag-itayo nepeg ya ontakot ed saray onsusumpa ed tuan panagdayew? (Drama tan say paliwawan “Sigpot a Mantasi Natan Anggaman ed Isusumpa”)
18. Antoran bendisyon so nagagamoran na saramay manaakar a kaibay Dios? (“Mangitarok na Saray Bendisyon Natan tan ed Ando lan Ando so Panakar a Kaibay Dios”)
Komon ta determinado itayon talinengen so ‘salita ed benegan tayo’ pian makapanakar itayo a kaibay mangatatawen ya Ama tayo diad ando lan ando.—Isa. 30:21; Juan 3:36.