Panagpulong ed Saray Kakanayon—Panon?
1. Akin a nakaukolan so pakatebek sano manpupulong ed saray kakanayon?
1 Anggapo lay mas maliket nen say iloob tayo ed balon mundo kaiba iray inad-aro tayo, a kaulop tayo iran mandayew ed si Jehova! Diad pampulong tayo ed saray kakanayon, magmaliw a posible iyan makapaliket ya ilalo. Balet, pian nagawaan itan ed makapaligsan paraan, nakaukolan so pakatebek. Onia so naobserbaan na manangasikaso na sirkito: “Saray sankaabigan a resulta so agamoran na saramay angisaletsalet na tongtongan ya anagyat ed inkamaupapet na kakanayon da.” Panon tayon nagawaan iya?
2. Panon a say masimoon ya interes ed saray kakanayon tayo so ontulong ed sikatayon naliing so inkaupapet da?
2 Liingen so Inkaupapet Da: Nonoten a maong no panon yon sagyaten so interes na kakanayon yo. (Uli. 15:28) Antoray kapagaan da? Antoran problema so aarapen da? Nayarin nipanengneng yo ed sikara so sakey ya artikulo odino salambiten so makapa-interes a teksto nipaakar ed tema a nagkalalo lan paninteresan da. No arawi so panaayaman na kakanayon yo, nayarin nagawaan yo iya diad pansulat odino itawag yo. Kalkalnan itanem so bukel na katuaan ed sikara, tan manilalo ed si Jehova a pabalegen to iratan a bukel.—1 Cor. 3:6.
3. Panon a say interes ed sikatayo na kakanayon tayo so mangilukas na pankanawnawa pian napulongan ira?
3 Binilin nen Jesus so sakey a too ya amapawayan toy dakel a demonyo: “Onla ka ed abung mo ed saray kakaarom [odino kakanayon], tan ibagam ed sikara no panon kabaleg so bengabengatla a say Katawan ginawa to nipaakar ed sika, tan no panon so panangasi to ed sika.” (Mar. 5:19) Isipen pa so nayarin epekto na saya ed saray kakanayon to! Anggaman agkayo makakaeksperiensya na ontan, nayarin saray kakanayon yo so interesado ed saray kimey yo odino ed kimey na ananak yo. Say panalambit ed impansalita odino betang yo diad Teokratikon Eskuelaan Parad Ministeryo, diad kombension ya inatendian yo, imbisita ed Bethel, odino sakey a makatantandan agawa et nayarin mangilukas na pankanawnawa pian ninabang yon nagkalalo ed sikara so nipaakar ed si Jehova tan say organisasyon to.
4. Antoran patit so nepeg tayon paliisan sano manpupulong ed saray kakanayon?
4 Magmaliw a Makatebek: Sano manpupulong ed saray kakanayon, paliisan so tampol a pangibaga na dakerakel ed sikara. Onia so inaksobi na sakey ya agin laki sanen nononoten to so agawa nen sikatoy ginmapon nanaral na Biblia: “Insan ko impaliwawa ed si inak so amin lawarin naaralan ko ed Biblia, tan mabetbet a saya so angitonton ed sangsangan, nagkalalo la ed si amak.” Anggano ipatnag na sakey a kanayon so interes to ed mensahe na Biblia, ebatan ed paraan a nasagyat so interes ton amtaen ni so dakel. (Uli. 25:7) Lawas ipanengneng so respeto, kaabigan, tan inkaanos, a singa ed pitotongtong yo ed saray agyo ni kabat diad ministeryo.—Col. 4:6.
5. Anto so kaukolan tayon gawaen no agmangawat iray kakanayon sano pupulongan tayo ira?
5 Aminsan, abaloan na saray kakanayon nen Jesus a sikatoy natatapis la. (Mar. 3:21) Balet, diad saginonor et arum so nagmaliw a mananisia. (Gawa 1:14) No diad primero et ag-inawat na kakanayon yo so impansagpot yon manginabang na katuaan, ag-ontutunda. Nayarin manguman iray sirkumstansya tan awawey da. Itultuloy yon talaranan so sananey a pankanawnawa pian inabang ed sikara so sakey a punto a nayarin mamaliing na inkaupapet da. Makagamor kayo na liket diad panulong ed sikaran onggapo ed dalan a mamaarap ed bilay ya andi-anggaan.—Mat. 7:13, 14.