Panon Itayon Makatulong?
1 Say tepet a “Panon itayon makatulong?” so mabetbet ya itetepet na saray Tasi nen Jehova sano nabalitaan da a walay agawan kalamidad diad arum a parte na mundo. Unong ya ipapabitar na salaysay ed Gawa 11:27-30, saray Kristiano nen inmunan siglo so angitarya na tulong ed saray agagin manaayam diad Judea lapud walay eras ya agawa diman.
2 Diad panaon tayo, aabuloyan na saray legal a totontonen ed organisasyon tayo so pangusar na kuarta diad pangitarya na tulong ed saramay naapektoan na natural odino gawa-na-too iran kalamidad tan ed arum niran panaon na pankaukolan.
3 Alimbawa, nen imbeneg a duaran taon et dakel ya agagi so tinmulong ed saramay naapektoan na tsunami diad Abalaten ya Asia, ontan met ed saramay naapektoan na bagyon Katrina diad abalaten ya Estados Unidos. Naapresyan maong iyan masimoon a kiwas da diad impandonasyon day kuarta ya inusar na organisasyon bilang pundo parad itutulong. Balet, sano iyespesipiko a saray donasyon et para labat ed saramay naapektoan na kalamidad, kapilitan ed arum iran bansa so pangusar ed saratan a pundo unong labat ed espisipikon gagala na angidonasyon tan diad loob labat na nigeter a panat na panaon, anggaman naasikaso la iray pankaukolan na agagi tayo tan sinmobra la so donasyon.
4 Kanian, irerekomenda a saray donasyon parad saray naapektoan na kalamidad so iter a parad sankamundoan a kimey. Sayan pundo so usaren ya ontulong ed saramay naapektoan na kalamidad tan parad panangiyabante met ed saray espiritual a pankaukolan na Kristianon impanaagi. No walay rason na sakey a too no akin a labay toy mandonasyon parad saray naapektoan na kalamidad nilikud ed saray kontribusyon to parad sankamundoan a kimey, siansian awaten itan tan usaren inerman a walay mankaukolan na tulong. Balet, mas maabig no agla iyespesipiko no iner tan no panon ya usaren iratan ya idonasyon.
5 No say manunan pangiteran tayo na donasyon tayo et parad sankamundoan a kimey, mas dakel a pundo so nausar ed amin a nengneng na kimey ed Panarian imbes ya ireserba labat iratan parad saramay naapektoan na kalamidad diad arapen. Mitunosan iyan awawey ed Efeso 4:16, legan itayon mankikimey a sankakaiba ya iter no anto so nakaukolan parad ‘pamabaleg ed laman diad pangipaalagey ed satan diad aro.’