Usaren ed Makabat a Paraan Iray Nibase ed Biblian Literatura Tayo
1, 2. Anto so liknaan na dakel a totoo nipaakar ed literatura tayo, tan anton tepet so palesaen na saya?
1 “Manlapud 1965 et manbabasa ak la na saray publikasyon yo. Bubukayen koy Biblia sano manbabasa ak, tan amin a walad literatura yo et mipakna ed Biblia. Abayag ko lan labay a naamtaan so peteg a katuaan nipaakar ed Dios tan si Jesus, tan matuak a nibagan naroromog ko iray ebat ed saray publikasyon yo tan ed Biblia.” Ontan so insulat na sakey a laki ed hedkuarter na saray Tasi nen Jehova. Diad satan lanlamang a sulat, kinerew ton sikatoy iyaralan na Biblia.
2 Singa satan a misalsalamat a laki, minilyon ed sankamundoan so mangaapresya ed saray katulongan ed Biblia ya itatarya na “matoor tan makabat ya aripen.” (Mat. 24:45) Kada taon et amayamay so pawawalaen a literatura pian natulongan iray matuan impanpuso ya ‘ondago ed pakapikabat ed katuaan.’ (1 Tim. 2:4) Panon tayon nausar ed makabat a paraan iray nibase ed Biblia a literatura tayo?
3. Panon tayon napaliisan so pakadarak na saray literatura?
3 Paliisan so Pandarak: Diad ilabas na panaon, nayarin nabuntonan itayo na dakel a literaturan onsulok ed talagan nausar tayo. Anto so nagawaan tayo pian agnadarak iray mablin publikasyon tayo? Kaukolan so pakatebek sano mangala na literaturan usaren ed ministeryo. Imbes a mangala na amayamay a kopya na sakey a publikasyon ya iyopresi tayo, nayarin sakey odino duaran kopya ni labat so alaen tayo insan tayo mangala lamet sano niyopresi la iratan. Napaliisan ed saya so pakatipon na dakerakel a suplay na literatura ed abung tayo. Ontan met, no wala ni dakdakel ya agnipaliman magasin tayo, maabig no bawasan tayo so order tayo.
4. Anto so nayarin gawaen no say kongregasyon et walaan na sobran suplay?
4 Saray Sobran Suplay: No say kongregasyon et walaan na sobran suplay na pigaran publikasyon, ompan nayarin amtaen na coordinator na literatura no nayarin usaren na kabangibang iran kongregasyon so sobran literatura. Saray publikasyon so nayarin iyopresi na saray manangipalapag ed agmananisia iran kapamilyaan, iyaaralan na Biblia, tan ed arum ni. Ompan labay na saramay balo ni ed kongregasyon ya iyan irayan daan a literatura ed personal a teokratikon librarya ra.
5. Panon tayon nipatnag so apresasyon ed saray literatura tayo?
5 Labay tayon nausar iray literatura tayo ed no antoy inggetma parad saratan, salanti, pian tulongan iray masimoon a totoo a makaaral ni nipaakar ed alay abig iran gagala nen Jehova. No panon a kinawanan nen Jesus iray akeran nakan kayari mamilagron impamakan to ed amayamay, nepeg a kalat tayo so sankaabigan a pangusar ed mabalor a nibase ed Biblian literatura a nitatarya. (Juan 6:11-13) Agnatenyeg na manangisalbay bilay a mensahe a lugan na saray publikasyon tayo iray kapusoan na totoon nikiling ed katunongan no mansiansia labat iratan ed istante odino bag tayo. Kanian, nepeg a magmaliw itayon makatunongan sano mangaala na literatura parad ministeryo tan usaren iratan ed makabat a paraan pian minabang so arum.—Fil. 4:5.