Panggayagaan so Panaral Tayo ed Anto so Peteg ya Ibabangat na Biblia?
1 Sakey a makapaliket a kabiangan na “Maridios a Katutulok” a Distriton Kombension et say inkipaway na libron Anto so Peteg ya Ibabangat na Biblia? Agmabayag et usaren tayo la iya ed lawak na ministeryo, nagkalalo la sano mangikokondukta itayo na saray panangiyaral na Biblia. Kanian, kaukolan tayon kabisadoen iyan balon publikasyon. Posible itan lapud aralen tayo iya diad Panagaral na Kongregasyon ed Libro ya onggapo ed simba na Abril 17, 2006.
2 Say manangasikaso na Panagaral na Kongregasyon ed Libro so mangipaimano ed saray tepet a naromog diad gapo na kada kapitulo. Insan say panagaral so ikondukta diad pangusar ed saray tepet ed leksab na pahina. Saray manunan teksto so basaen tan singbaten, tan say kahon a “No Anto so Ibabangat na Biblia” diad sampot na kada kapitulo so makatulong ed panrepaso ed materyal lapud lugan na satan so Makasulatan iran ebat ed manangigapo iran tepet na kapitulo. Panggayagaan yo so pankomento, lapud kokobrian na sayan libro iray tema ed malinew, simpli, tan makapainteres a paraan.
3 Say apendise na sayan libro so mangitatarya na saray detalye ed nanduruman tema. Nausar tayo iyan materyal sano nakaukolan na saray iyaaralan na Biblia so malaem nin impormasyon nipaakar ed sakey a tema. Saray porsyon na apendise et sagpaminsan a nakobrian legan na Panagaral na Kongregasyon ed Libro. Amin ya apendisen materyal ed sakey a tema so basaen na managbasa ed panagaral na libro, tan saray andukdukey ya artikulo so nayarin apag-apagen a kobrian. Diad apendise et anggaporay tepet parad panagaral. Balet nayarin pakomentoan na manangasikaso ed saramay inmatendi iray manunan punto panamegley na pantepet to.
4 Maples so panagaral ed libron Ibabangat na Biblia diad Panagaral na Kongregasyon ed Libro. Balet, ag-itayo iilaloan a pelesan sano iyaral tayo iyan publikasyon ed arum, nagkalalo la no daiset odino anggapo so pikakabat da ed Biblia. (Gawa 26:28, 29) Legan na saray panangiyaral tayo na Biblia, kaukolan tayon singbaten a maong iray teksto, ipaliwawa iray ilustrasyon, tan arum nira. Kanian gawaen yon kalat so iyatendi kada simba tan sigpot a mibiang ed panaral tayo ed libron Anto so Peteg ya Ibabangat na Biblia?