Bangatan Iray Mauyamo a Manakar ed Dalan na Dios
1. Anto so nalalanor ed panggawa na saray babangatan?
1 Saray inmunan-siglon babangatan nen Kristo so asalitan kabiangan na ‘Say Dalan.’ (Gawa 9:2) Say tuan Inkakristiano so mangilalanor ed interon dalan na panagbilay na sakey. (Uli. 3:5, 6) Kanian, sano mangikokondukta na saray panangiyaral na Biblia, agmagenap so basta panginabang na suston pikakabat ed doktrina na Biblia. Nepeg tayo met a tulongan iray iyaaralan na Biblia a manakar ed dalan nen Jehova.—Sal. 25:8, 9.
2. Anto so mamakiwas ed iyaaralan na Biblia a mangunor ed saray ganggan na Dios?
2 Aro ed si Jehova tan ed si Jesus: Talagan mairap parad ag-ayadyarin totoo so pangitunos ed panagnonot, awawey, panagsalita, tan kondukta ra unong ed linawa na Dios! (Roma 7:21-23; Efe. 4:22-24) Balet, say aro ed Dios tan ed Anak to so mamakiwas ed saray mauyamo pian natalonaan iyan angat. (Juan 14:15; 1 Juan 5:3) Panon tayon natulongan iray iyaaralan tayo na Biblia a nabayuboan da iyan aro?
3. Panon tayon natulongan iray iyaaralan pian nabayuboan day aro ed si Jehova tan ed si Jesus?
3 Tulongan so iyaaralan yo a naamtaan no anton klase na persona si Jehova. Impaliwawa na sakey ya agin laki, “Agnaaro na totoo so sakey a persona ya agda kabat, kanian diad gapo ni labat na panangiyaral, ibabangat ko la ed sikara so ngaran na Dios manlapud Biblia, tan aanapen koray pankanawnawa ya idanet iray kalidad nen Jehova.” Say pangipabitar ed ehemplo nen Jesus so sakey a maabig a paraan na panggawa ed saya. (Juan 1:14; 14:9) Niarum ni, usaren so kahon parad repaso diad sampot na kada kapitulo na libron Ibabangat na Biblia pian tulongan so iyaaralan a manmolimoli ed saray kalidad na Dios tan say Anak to.
4. (a) Akin a dakel ya iyaaralan so nairapan a manpulong? (b) Panon tayon natulongan iray iyaaralan tayo ya onggapon mibiang ed Kristianon ministeryo?
4 Manbangat Panamegley na Ehemplo: Bilang managbangat tan manangiwanwan, ipapatnag tayo ed arum panamegley na saray kiwas tayo no antoy kabaliksan na panakar ed dalan na Dios. (1 Cor. 11:1) Alimbawa, maslak ya iyaaralan na Biblia so ag-apasal ya onasingger ed saray agda kabat pian inabang iray sisiaen da. Kanian, nayarin kaukolan so anos tan dunong pian natulongan iran napaaligwas day aro, pananisia, tan pakpel a nakakaukolan pian mibiang ed kimey a panangipulong tan panaggaway babangatan. (2 Cor. 4:13; 1 Tes. 2:2) Say pilalek tayon igiya iray iyaaralan tayo so mamakiwas ed sikatayon tulongan ira sano onggapo iran mibiang ed Kristianon ministeryo.
5. Panon a say maabig ya ehemplo so ontulong ed saray iyaaralan a naobserbaan no antoy nalalanor ed panumbok ed saray ganggan na Dios?
5 Say ehemplo yo so mangibangat ed saray iyaaralan ed arum niran importantin aspekto na Kristianon kabibilay. Sano ombisita kayo ed mansasakit odino ibano yo so arum diad saray pantitipon na kongregasyon, naiimano ran nipapatnag so aro. (Juan 15:12) Sano mibiang kayo ed panaglinis na Kingdom Hall odino manggawa na makatulong iran bengatla parad arum, ibabangat yo ira no panon so panlingkor. (Juan 13:12-15) Sano naobserbaan dan napansiasiansia yoy simplin istilo na bilay, natatalosan da no antoy kabaliksan na ‘pananap nin unona ed panarian.’—Mat. 6:33.
6. Antoray resulta ed panulong ed saray mauyamo a manlingkor ed si Jehova?
6 Say kimey a pangibangat na Salitay Dios ed arum tan panggawa na babangatan so mangilalanor na baleg a sagpot. Balet agaylan makapaliket so pakanengneng ed saray mauyamo a ‘manaakar ed katuaan’!—3 Juan 4.