Sankamundoan a Kampanya na Panangiyanunsio ed “Asingger la so kililiktar!” A Distriton Kombension
Ibunog na Saray Manangipalapag ed Kada Kongregasyon so Espisyal a Handbill
1 Diad sayan taon et walay gawaen a kampanya pian iyanunsio so 2006-2007 a serye na distrito iran kombension diad manga 155 a daldalin panamegley na sakey ya espisyal a handbill.
2 Lapud wala itayo la’d sampot a parte na kaunoran iran agew, saray kombension a mangipapabitar ed insipan na Dios a kililiktar manlapud sayan marelmeng a sistema so nepeg a mabiskeg a managyat ed saray maptek-impanpuson totoo. Say mensahe so nepeg a mamakiwas ed sikaran mannonot no anto so nagawa ed arapen. Ta pian naikdan so minilyon a totoo na pankanawnawan makadngel ed mensahe na ligliwa tan ilalo, masulok a 98,000 a kongregasyon na saray Tasi nen Jehova ed sankamundoan so papasesegen ya aktibon mibiang diad pangiyanunsio ed kombension ya angiyasainan ed sikara.
3 Saray kongregasyon so napawitan na malaem iran handbill pian naikdan na tunggal 20 a kopya so kada manangipalapag. Saray sobran kopya et usaren na saray payunir ed kongregasyon. Say kampanya so igapo na kada kongregasyon taloran simba sakbay na petsa na kombension ya akaasainan da.
4 Maabig no bisitaen so amin ya iyaaralan na Biblia tan saray pamilya ra, ontan met ed arum niran interesadon totoo diad teritorya, ta pian ikdan ira na imbitasyon ed distriton kombension. Saray handbill so nepeg met ya iyopresi ed kabkaabungan diad niasain a teritorya yo, anggad naupot so suplay yo. Nepeg a pansagpotan so pangibunog ed amin a handbill diad loob na taloran simba.
5 Matalek kami a nagawa so malaknab a panagtasi bilang resulta na sayan impasyan sagpot ed sankamundoan a panangiyanunsio ed “Asingger la so Kililiktar!” a Distriton Kombension. Ipikasi mi so daakan a panamendisyon nen Jehova ed personal iran sagpot yo legan kayon mibibiang ed sayan sankamundoan a kampanya.