Panagpaalagey na Kingdom Hall—Sakey ya Importantin Aspekto na Sagradon Serbisyo
1. Anto so agawaan la ed panagpaalagey na Kingdom Hall, balet anto nin siansia so nakaukolan?
1 Legan na apalabas a talora tan kapalduan taon, wala lay 150 a Kingdom Hall a nipaalagey ed teritorya na sanga ed Pilipinas. Masimoon min aapresyaen so impasyan kimey na saray Kingdom Hall Construction Group tan amin ya ontutulong ed sikara. Anggaman abalbaleg a kimey so agawaan la, siansian baleg ni so gawaen ed panagpaalagey na Kingdom Hall. Panon tayon amin a nasuportaan iyan importantin aspekto na sagradon serbisyo tayo ed si Jehova?—Apoc. 7:15.
2. Panon itayon direktan makasuporta ed kimey a panagpaalagey na Kingdom Hall?
2 Magmaliw a Mabulos: No sakey kayon bautismadon manangipalapag, imbitaan mi kayon manbulontaryon mankimey a kaibay Kingdom Hall Construction Group diad pansulat yo ed Application for Kingdom Hall Construction Volunteer Program (A-25). Sayan porma so naala ed kongregasyon yo odino nayarin nakerew ed sangan opisina na saray mamatatken. No naaprobaan, naimbitaan kayon mankimey ed sakey a proyekto a Kingdom Hall ed loob na talora anggad anem bulan. Say sananey nin dalan pian makatulong kayo anggano agmansulat na aplikasyon et diad pamboluntaryon sanagew odino duay agew odino anggan sakey simba diad dinanman a nagagawan proyekto a Kingdom Hall ed sirkito yo odino ed asingger a sirkito. Amin a manboluntaryo so nepeg a mabulos a mankimey tan walaan na espiritu na pikokoopera. (Sal. 133:1) Anggano andian kayo na saray dunong ed panagpaalagey, siansian baleg so nitulong yo ed italona na panagpaalagey a proyekto. Nayarin makaawat kayo met na panangipasal pian nagkalalo kayon nausar ed arapen.
3. Anto niray arum a paraan a nipanengneng tayoy suporta tayo ed sayan uksoyan?
3 No agyo sarag so manboluntaryo, nipatnag yoy suporta yo diad pamaseseg ed arum a nayarian da so mibiang ed uksoyan. Makatulong kayo diad panggawa ed saray asainmin ed kongregasyon na saramay mankikimey ed proyekton Kingdom Hall. Diad panplano lan masakbay, makaseguro iray mamatatken a say kongregasyon so naasikason maong sano walaray pigaran mankikimey ed proyekto a Kingdom Hall. Andi-duaruwan naliliketan si Jehova sano mankakasakey itayon mankikimey parad kiyabanti na intereses na Panarian.—Heb. 13:16.
4. Panon tayon nipatnag so positibon awawey ed saramay mibibiang ed saray proyekton panagpaalagey na Kingdom Hall?
4 Magmaliw a Positibo: Say pangipaalagey na saray pasen na panagdayewan so mangilalanor ed baleg a panaon tan impasyan kimey. Natalosan sirin a saramay naimbitaan ya ontulong ed panagpaalagey na saray proyekto so makaarawi ed kawalaan daran kongregasyon no maminsan. Komon ta alisto itayon mangomenda tan mamaseseg ed saray boluntaryo ed panagpaalagey, a mansasakripisyo pian asikasoen iyan importantin kimey.—Gawa 6:3; Roma 14:19.
5. Panon a nipanengneng na saray boluntaryo ed panagpaalagey so inkabalanse?
5 Magmaliw a Balanse: Say pangipulong nipaakar ed Panarian na Dios so manunan teokratikon kimey tayo. (Mar. 13:10) Diad pannodnonot ed saya, say Kingdom Hall Construction Desk tan Regional Kingdom Hall Offices so magunaet a mangi-eskedyul na saray proyekto ta pian saray boluntaryo so makapibiang a regular ed lawak na ministeryo. Ontan met, saray boluntaryo ed panagpaalagey so manggunaet a magmaliw a balanse ed pangasikaso ed espiritual iran responsabilidad da.
6. Antoy nagawaan sano amin ed kongregasyon so mantutulongan pian ombulaslas so tuan panagdayew?
6 Deneskribe nen apostol Pablo iray membro na kongregasyon bilang mankakaiban mankikimey parad ‘ibaleg na laman parad pangipaalagey ed sikaton dili ed aro.’ (Efe. 4:16) Say aro tayo ed si Jehova tan ed tuan panagdayew so mamakiwas ed sikatayon mantutulongan pian nipulong so maong a balita tan pian suportaan so panagpaalagey na Kingdom Hall.