Pawilen so Amin Ya Angipatnag na Samet ya Interes
1 Dakel ed sikatayo so wala ed katuaan natan lapud walay angimano ed paborablin inkiwas tayo ed mensahe na Panarian tan nananos a pinmawil—a nayarin aminpigapiga ni—pian nabayuboan itan ya interes. Nepeg tayo met a pampelengan a pawilen so amin ya angipatnag na samet ya interes. On, say panagpawil et kabiangan ed kimey tayon ‘panaggawa na saray babangatan.’—Mat. 28:19, 20.
2 Tebeken so Interes: Anggano ag-angawat na literatura so sakey ya indibidual, ompan ipapatnag na lupa to, tono’y boses to, odino saray ibabaga to so samet ya interes ed mensahe na Panarian. Lapud satan, sikatoy nayari tayon pawilen. Walay sakey ya agin laki ya aminlima ton pinawil so sakey ya indibidual ed loob na nantutumbokan a limaran simba, ya agto anggan akapangipalima na literatura. Diad mikanem ya impawil to, angawat na literatura so laki, tan diad kaunoran et agapoan na panagaral ed Biblia.
3 No walay alikas yon interes ed sakey a too, pawil yon tampol, nayarin kayari pigara labat ya agew. Agyo papalungkitan so “mauges” a manamsam ed nitanem ed puso na satan a too. (Mat. 13:19) Pawil kayon pawil ed espisipikon oras ya imbaga yo.—Mat. 5:37.
4 Panagpulong Diad Karsada: Kasin panggugunaetan yon bayuboan so interes ya aromog yo legan yon manpupulong diad karsada odino diad impormal a panagtasi? Kayari pantongtong yo, oniay nayari yon ibaga: “Nanliketan koy impantongtong ta. Iner kasi pakabisitaan ko ed sika ta pian makapantongtong ta lamet?” Sano matukoy, dedesidien na arum a manangipalapag ya iter so numeroy telepono ra ed sakey ya interesado odino man-iteran iray numeroy telepono. No maparanay kayon nanenengneng na saray totoo a manpupulong ed apasakey a pasen diad karsada, nayarin mabulos dan iter ed sikayo so numero na telepono odino address da. Anggano agda labay ya iter so impormasyon no panon iran nakontak, siansia nin nayarian yon napaaralem so interes da no nanengneng yo ra lamet ed karsada.
5 Naliliketan itayo sano nanengneng tayon ombubuna so tantanaman a sinasalog tan binabayuboan tayo. Mipadpara, naliketan itayon maong diad panggawa na saray panagpawil tan itulong ed saray indibidual ya onaligwas ed espiritual. (1 Cor. 3:6) Gawa yon kalat so pamawil ed amin ya angipanengneng na samet ya interes.