‘Sikatoy Mangiiter na Pakayari ed Makapuy’
1 Amin tayo so nakekesawan a sagpaminsan. Satan so aliwa labat a lapud trabaho odino arum nin kimey noag ontan met ed saray problema ya aarapen tayo ed sarayan “panaon a maatap.” (2 Tim. 3:1) Bilang lingkor nen Jehova, panon tayon nagamoran so nakaukolan tayon espiritual a biskeg ta pian ag-itayo ontayam ed panagministeryo tayo? Nagawaan tayo iya diad isaral ed sakey a “mabiskeg ed pakayari,” salanti, si Jehova. (Isa. 40:26) Amta to iray pankaukolan tayo tan talagan interesadon ontulong ed sikatayo.—1 Ped. 5:7.
2 Saray Probisyon nen Jehova: Pabibiskegen itayo nen Jehova panamegley na masanton espiritu to, a satan met imay sankabiskegan a puersa ya inusar to ed impamalsa ed talba. Ontutulong ed sikatayo so espiritu na Dios pian “pasimbaloen to so biskeg” tayo no onleletey itayo. (Isa. 40:31) Tepetan yoy inkasikayo, ‘Kapigan so unor ya espisipikon impangipikasik ed masanton espiritu pian napabiskeg ak a manumpal ed saray obligasyon ko bilang Kristiano?’—Luc. 11:11-13.
3 Diad inagew-agew a pambasa tan pandalepdep ed impuyan a Salita na Dios tan katatagano ed espiritual panamegley na regular a panaral ed saray publikasyon tayo bilang Kristiano, magmaliw itayon singa mabunan “kiew a nitanem ed abay na saray ag-agus na danum, a mamapaway na bunga to no panaon to, say bulong to met agnamaga.”—Sal. 1:2, 3.
4 Uusaren met nen Jehova iray kapananisiaan, a “mamabiskeg ed sikatayo.” (Col. 4:10, 11, NW) Pabibiskegen da itayo diad saray pantitipon ed kongregasyon panamegley na makapaseseg a pitongtong da ed sikatayo, saray komento ra, tan saray parte ra. (Gawa 15:32) Saray Kristianon mamatatken so nagkalalo lan mangitatarya na espiritual a tulong tan makapabiskeg a panamaseseg.—Isa. 32:1, 2.
5 Say Ministeryo: No nalilikna yon onleletey kayo, ag-ontutundan manpulong! Aliwan singa ed maslak a kimey, say regular a pibibiang ed ministeryo so peteg a mangiter na pakainawaan tayo. (Mat. 11:28-30) Say panangipulong ed maong a balita so ontutulong ed sikatayon akasentro ed Panarian na Dios tan akaapasakey so nonot tayo ed inkamagnayon tan ed alay abig iran iilaloan tayo.
6 Pinasya ni so kaukolan tayon gawaen antis a naderal iyan mauges a sistema. Kanian dakel so rason pian mansiansia itayon agnagiing ed panaglingkor tayo, a maniilalo ed ‘pakayari ya iiter na Dios.’ (1 Ped. 4:11) Diad tulong na Dios, nasumpal tayoy kimey tayo, lapud si Jehova so ‘mangiiter na pakayari ed makapuy.’—Isa. 40:29.