Nepeg Tayon Pansiansiaen so Seseg Tayo ed Ministeryo
1 Kada taon nanlapula’d 1992, maseseg a manguusar iray Tasi nen Jehova na masulok a sakey bilyon ya oras ed sankamundoan diad pangipupulong ed Panarian tan panggagaway babangatan. Malikeliket tayo ta makapipibiang itayo ed ontan ya abalbaleg a nagagawaan!—Mat. 28:19, 20.
2 Siempre, amin a pisasalamat tan dayew et kien nen Jehova, a manusuporta ed sikatayo ed ministeryo tayo legan na sarayan “panaon a maatap.” (2 Tim. 3:1) Anto so kakaukolanen ed sikatayo pian mansiansia itayon maseseg a mibiang ed sayan importantin kimey?
3 No Antoy Panlalapuan na Seseg: Say aralem a panangaro ed Dios tan ed kaparan too, ontan met ed impapuson pilalek a manumpal ed dedikasyon tayo, so mamakiwas ed sikatayon manlingkor parad Panarian. (Mat. 22:37-39; 1 Juan 5:3) Pakiwasen itayo na aro a mansakripisyo pian sigpot a makapibiang ed panagpulong.—Luc. 9:23.
4 Pampelengan a Pansiansiaen so Seseg: Gagawaen na Diablo so anggaan na nayarian to pian paleteyen so seseg tayo ed ministeryo. Say kaandian na interes na saray totoo ed teritorya tayo, saray pakaabalaan ed sayan mundo, saray desdes ed inagew-agew a bilay, tan pakakaaburido tayo ed ikakapuy na laman tayo so pigara labat ed saray uusaren to pian dismayaen itayo.
5 Kanian, nepeg tayon pankimeyan a pansiansiaen so seseg tayo. Importante a bayuboan so ‘inmunan aro’ tayo. Kalaktip ed satan so regular a panagbasa tan panagdalepdep ed Salita na Dios, say Biblia, tan panganamot ed amin ya espiritual a probisyon na “matoor tan makabat ya aripen.”—Apo. 2:4; Mat. 24:45; Sal. 119:97.
6 Unong ed malinew lan ipapabitar na saray propesiya na Biblia, maples so panasingger na agew nen Jehova a paneral to ed saray agmaridios a totoo. (2 Ped. 2:3; 3:10) Kanian, pampelengan tayo sirin a pansiansiaen so seseg tayo ed ministeryo tan sigpot a mibiang ed sankamundoan a panangipulong ed Panarian tan ed panaggaway babangatan a nagagawa natan!