Ag-ontutundan Manpulong
1 No maminsan, nayarin ipasen tayon paulit-ulit lan nakikimeyan so teritorya tayo tan daiset lay ondengel. Balet, walaray makakombinsin rason no akin a mantultuloy itayon manpulong.—Mat. 28:19, 20.
2 Bilang Pantasi: Impasakbay nen Jesus a say panangipulong ed Panarian et importantin kabiangay tugyop na tanda na “anggaan na sistema na bengabengatla” tan nagawa itan “bilang pantasi ed amin a nasyones.” (Mat. 24:3, 14, NW) Sano nanenengneng itayo na totoo a mangipupulong ed maong a balita na Panarian, makapantatasi itayo. Kaalis tayo ed sakey a lugar, nayarin pigay oras odino pigay agew a pantongtongan na arum a totoo so imbisita tayo, anggano ag-ira dinmengel ed mensahe tayo. No natatalosan tayo iray rason ed ministeryo tayo, ontulong itan ed sikatayo a manseet. Napapaliket tayoy Jehova diad panusumpal tayo ed propesiya na Biblia panamegley na pangiiter tayo na pantasi tan pasakbay.—2 Tes. 1:6-9.
3 Nakaukolan so Panseet: Lapud dakel so makakasbel tan mangaalay panaon na totoo, kaukolan tayoy manseet sano panggugunaetan tayon bayuboan so interes da. Sakey taon a sinimban ontotoktok iray Tasi ed abung na sakey a bii, antis ton pinaloob iray Tasi ed abung to pian pantongtongan so Biblia. Agusgustoan toy nadngel to kanian inawat to so panangiyaral na Biblia, tan onaatendi la ed saray pantitipon, ag-abayag et labay to lay manpabautismo.
4 Maples a manguuman iray kipapasen na mundo, ontan met ed totoo. Nayarin dakel ed saray agmalabay ya ondengel ed sikatayo ed apalabas et labay da la natan so ondengel ed maabig ya ilalon inanabang tayo. Anggano sakey labat a too so nawalaan na interes ed mensahe na Panarian, nabawbawi tayoy panseet tayo.
5 Diad sankamundoan, ondarakel so totoo a “mansibek tan manakis lapu ed amin a kadimlaan a nagagawa.” (Eze. 9:4) Say resulta na panagpulong tayo so mamapaneknek a saramay matunong so onkikiwas ed mensahe na Panarian. (Isa. 2:2, 3) Kanian, ag-itayo ontutundan manpulong panamegley na maaron panseet a ‘pangiyakar na saray maong a balita na kaabigan.’—Isa. 52:7; Gawa 5:42.