Panon Tayon Manparaan Parad Pantitipon Parad Panagserbi
1. Anto so gagala na Pantitipon Parad Panagserbi, tan panon itayon nagunggonaan a maong ed satan?
1 Say gagala na Pantitipon Parad Panagserbi et pian tulongan itayon magmaliw ya epektibo ed ministeryo. Say manunan tema a sisingbaten et say pangipulong ed maong a balita na Panarian, panggawa na saray babangatan, tan pangiyabawag ed manasingger lan panangukom na Dios. (Mat. 28:20; Mar. 13:10; 2 Ped. 3:7) Nagunggonaan tayon maong ed sayan importantin pantitipon no namparaan itayo tan mibiang ed panagkomento.
2. Panon itayon manparaan ya ontalineng ed paliwawa?
2 Paliwawa: Kaslakan a say reperensya ed sakey a paliwawa so nipapaimano ed saray instruksion ed espiker. Nayarim a repasoen so niasain a reperensya, pati nisitas iran teksto, tan nonoten no panon mon iyaplika so impormasyon ed ministeryom.
3. Anto so nayarin gawaen tayo pian iparaan so tepet tan ebat a betang?
3 Singbaten ed Tepet tan Ebat: Sayan betang so mipadpara ed pangikondukta ed Panagaral na Panag-Bantayan, ya antikey labat so introduksion tan konklusion. Gulisan iray manunan punto ed kada parapo, tan manparaan a mangiter na antikey a makabaliksan iran komento.
4. Panon tayon manparaan parad betang a pibiangan na saray dumerengel?
4 Singbaten a Mibiang Iray Dumerengel: Sayan betang so ipresenta bilang paliwawa, balet walay katekep ton pankomento na saray dumerengel. No ginulisan mo iray manunan punto tan binasam iray nisitas a teksto, makapankomento ka no mantepet so espiker. Panggunaetan na akanbetang ya ipibali iray dumerengel sano kokobrian iray manunan punto.
5. Anto so ontulong pian minabang itayon maong ed saray demostrasyon?
5 Saray Demostrasyon: Arum a betang et walay katekep ton realistiko iran demostrasyon no panon ya iyaplika ed teritorya so impormasyon a nantongtongan. Saray elder odino eksperiensyadon manangipalapag odino payunir so nakerew a mangidemostra. Say pamparaan mo ed sayan betang et saglawien toy pannonot no panon iyan ipresenta. No idemostra so pangaligan a presentasyon, nonoten no panon mon ibaga itan ed nanduruman unabung. Seguroen ya awit mo iray literatura odino magasin ya usaren ed demostrasyon. Legan na labi a Panagdayew na Pamilya yo, naimano yon makagunggona so pangipasal na pigara ed sarayan presentasyon.
6. Antoray pigaran rason parad pamparaan ed Pantitipon Parad Panagserbi?
6 Lalon panggayagaan so Pantitipon Parad Panagserbi no akaparaan tayo tan sano dinalepdep tayo la iratan antis na pantitipon. No gawaen itan, lalo itayon makapanpapasesegan. (Roma 1:11, 12) No mangigana itayo na panaon pian iparaan so Pantitipon Parad Panagserbi, lalo tayon napaaliwas so ministeryo tayo.—2 Tim. 3:17.