Say Ministeryo Tayo—Pakapatnagay Aro Tayo ed Dios
1. Lapud aro nen Jesus ed Dios, sikatoy apakiwas a gawaen so anto?
1 Say aro so amakiwas ed si Jesus pian sumpalen so ministeryo to. Amin ya aspekto na ministeryo nen Jesus et talagan paneknek na panangaro to ed si Jehova. Inkuan nen Jesus: “Pian nakabatan na mundo ya inarok so Ama, tan unong a say Ama initdan to ak na ganggan, ontan so gawaen ko.” (Juan 14:31) Bilang papatumbok nen Jesus, pribilehyo tayo met ya ipatnag ed ministeryo tayo so baleg a panangaro tayo ed Dios.—Mat. 22:37; Efe. 5:1, 2.
2. Panon a say panangaro tayo’d si Jehova et mangapekta ed ministeryo tayo?
2 “Nagalang Komon so Ngaran Mo”: No aanamoten tayo so amin a pankanawnawa ya itongtong ed arum so nipaakar ed si Jehova tan say Panarian to, nipapanengneng tayoy panangaro ed Dios, diad ontan et makakapibiang tayo ed panamasanto ed ngaran to. (Sal. 83:18; Eze. 36:23; Mat. 6:9) Singa ed ministeryo nen Jesus, nitultuloy tayon nipanengneng so masimoon a pilalek tayon pasantoen so ngaran nen Jehova tan gawaen so linawa to panamegley na ministeryo tayo.—Mat. 26:39.
3. Panon a makatulong so panangaro tayo ed si Jehova pian natalonaan iray problema?
3 Pakiwasen Itayo na Aro a Talonaan Iray Problema: Lapud panangaro ed si Jehova, natalonaan so amin a babeng. (1 Cor. 13:4, 7) Walaray naeksperiensya nen Jesus ya angamper komon ed sikaton sumpalen so ministeryo to. Balet, sanen nipaarap ed saraya, say akatulong ed sikaton ontalona et say baleg a panangaro to tan say pilalek ton gawaen so linawa nen Jehova. (Mar. 3:21; 1 Ped. 2:18-23) Nipapaarap itayo met ed dakel a problema, tan makatulong met so panangaro tayo ed Dios pian natalonaan iratan. Diad pangalig tayo ed ehemplo nen Kristo, makapanmatalek itayo tan ag-itayo naamper a manumpal ed ministeryo tayo. Anggaman apektado itayo na isusumpa na pamilya, makapuy a bunigas, inkatatken, odino kaandiay interes na totoo, ag-itayo napatunda na saratan ya ipatnag so panangaro tayo’d si Jehova panamegley na panggugunaet tayon sumpalen so ministeryo tayo ed epektibon paraan.
4. Anton pribilehyo so niwala ed sikatayo lapud panangaro tayo ed si Jehova?
4 Baleg so nagawaan na aro, tan maliket tayo lapud sarag tayon ipatnag so interon puson panangaro ed Dios diad ministeryo tayo. (1 Cor. 13:13) Legan a maples a manasingger so panaon sano sigpot lan napasanto so ngaran nen Jehova, komon ta ‘lalo ya ondaak so aro tayo.’—Fil. 1:9; Mat. 22:36-38.