Magmaliw a Maong a Katulongan ed Panagpulong
1. Antoran bendisyon so nagamoran diad pankimey a kaiba na sakey ya agi ed ministeryo?
1 Aminsan et imbaki nen Jesus so 70 a disipulo to pian manpulong, tan “imbaki to ra a sanderwa.” (Luc. 10:1) Lapud sayan uksoyan, seguradon makapantulongan tan makapanpapasesegan ira legan dan manpupulong. No ibaan tayo so sakey ya agi ed lawak na kimeyan, panon itayon makatulong?
2. Sano mitotongtong so kaiba tayo, panon tan akin a kaukolan tayoy ondengel?
2 Panamegley na Idengel: Ondengel a maong legan a mitotongtong so kaiba yo. (Sant. 1:19) No walay basaen ton teksto, tumbok yo itan ed dilin Biblia yo. Imatonan yoy mansasalita, balanglan samay kaiba yo odino say unabung. No ondedengel kayon maong ed tongtongan, nayarin napaseseg imay unabung ya ondengel met.
3. Kapigan so nayarin pansalita tayo?
3 Panebek no Kapigan so Pansalita: Sano mitotongtong so kaulop tayo, nipanengneng tayoy respeto diad pangiyabuloy tayon sikato labat so mansalita. (Roma 12:10) Agtayo onsasalet-salet. No alingwanan toy ibaga to, walay isusumpa odino tepet na unabung, tan onkerew na tulong so kaiba tayo, panggunaetan tayon suportaan so imbaga to imbes a mangigapoy sananey a tongtongan. (Uli. 16:23; Ecl. 3:1, 7) No mansalita tayo, nepeg a say ibaga tayo et mitunosan ed ipupulong na kaiba tayo.—1 Cor. 14:8.
4. Panon a magmaliw a maliket tan matalona so ministeryo tayo?
4 Sanen asumpal lan nampulong so 35 a paris na saray disipulo, ‘malikeliket iran pinmawil.’ (Luc. 10:17) Magmaliw met a maliket tan matalona so ministeryo tayo no dengelen tan tebeken tayo no kapigan so manepeg a pansalita sano tulongan tayoy kaiba ed panagpulong.