Sakey a Probisyon Parad Saray Kristianon Ministro
1. Anton balon uksoyan so inggapo nen 1938, tan parad anton gagala?
1 Nen 1938, angigapo so organisasyon nen Jehova na balon uksoyan. Saray piga-pigaran kongregasyon so naimbitaan ya onatendi ed saray zone assembly, natan et tatawagen a sirkiton asemblea. Parad anton gagala? Onia so ebat na Enero 1939 ya isyu na Informant (natan et Ministeryo Tayo ed Panarian): “Sarayan asemblea et kabiangan na Teokratikon Organisasyon nen Jehova parad pangidaulo na kimey na Panarian to. Say nitataryan instruksion ditan et makana pian suston nagawaan na balang sakey so nipabtang a kimey to.” No isipen tayo so indakel na saray manangiyabawag na Panarian a nen 1938 et 58,000 labat, balet diad 2010 et masulok lan 7,000,000, mapatnag a nasusumpal na sarayan sirkiton asemblea so angigagalaan ed saratan ya tulongan iray ministro a nagawaan so “nipabtang a kimey” da!
2. Anton impormasyon so ipresenta ed sirkiton asemblea tayo diad ontumbok a taon?
2 Tema Parad Ontumbok a Taon: Pitalaran tayo so programa ya onggapo ed Pebrero tan say panamaseseg ya itarya na satan. Say teman “Agkayo Kabiangan na Mundo” so inala ed Juan 15:19. Antoy arum ed saray paliwawa a seguradon pakagunggonaan na saray Kristianon ministro? Diad Sabado narengel tayoy paliwawan “Panon Itayon Salimbengan na Sigpot-Panaon a Serbisyo?” Panggayagaan tayo met so taloran parte na simposium ya “Agyo Aabuloyan so Inkasikayo a Nakontamina na . . . ” “Atap ya Ayep,” “Say Bantog a Balangkantis,” tan “Saray Ombiabiahen Negosyante.” Diad Simba narengel tayoy simposium a say tema to et “Aroen si Jehova, Aliwan say Mundo.” Saray arum nin paliwawa et “Mansiansian ‘Sangkaili tan Miaayam ed Sayan Mundo’” tan “Manpakpel Kayo! Sarag Yon Taloen so Mundo.”
3. Antoray naawat tayon gunggona diad iyatendi tayo ed sirkiton asemblea?
3 Kayarin naatendian so apalabas a sirkiton asemblea, sakey ya agin biin agla manpupulong so nansulat a say programa so amakiwas ed sikaton usisaen lamet so kipapasen to tan determinado lan “manpulong tan agla manbaraan!” Seguradon say programa ed sirkiton asemblea ed ontumbok a taon so ontulong ed sikatayon amin a mangaro ed si Jehova imbes a say mundo. (1 Juan 2:15-17) Seguroen yoy onatendi tan ondengel a maong pian sigpot a minabang ed sayan maaron probisyon parad saray Kristianon ministro!