Tulong Parad Saray Pamilya
1. Panon ya akagunggona so Sabaton ed saray Israelitan pamilya?
1 Say panagngilin na Sabaton so maaron probisyon nen Jehova ya akagunggona ed saray pamilya. Nampainawa iray Israelita ed saray inagew-agew a kimey da ta pian walay panaon dan mandalepdep ed kaabigan nen Jehova tan ed relasyon da’d sikato. Sarag na saray ateng ya anamoten iyan pankanawnawa pian ipurek so Ganggan ed puso na saray anak da. (Deu. 6:6, 7) Say Sabaton so angiter ed totoo na Dios na panaon kada simba pian nisentro so imano ra ed espiritualidad da.
2. Antoy ibabangat ed sikatayo na Sabaton nipaakar ed si Jehova?
2 Siempre, agla kekerewen nen Jehova ed saray pamilya natan ya ngilinan so Sabaton. Balet, walay ibabangat na satan a ganggan ed sikatayo nipaakar ed Dios. Sikatoy lawas ya interesadon maong ed espiritual ya pankaabigan na saray totoo to. (Isa. 48:17, 18) Natan, say sakey ya paraan ya ipapatnag nen Jehova iyan maaron interes et diad panamegley na Panagdayew na Pamilya ed labi.
3. Anto so gagala na Panagdayew na Pamilya ed labi?
3 Anto so Gagala na Panagdayew na Pamilya ed Labi? Nen Enero 2009, say Panagaral na Kongregasyon ed Libro so gagawaen la kaiba na Teokratikon Eskuelaan Parad Ministeryo tan Pantitipon Parad Panagserbi ed sakey ya labi. Say sakey a rason ed sayan pananguman et pian naikdan iray pamilya na pankanawnawan pabiskegen so espiritualidad da diad pangiskedyul na sakey labi kada simba parad panagdayew na pamilya. Pinaseseg so kada pamilya ya iyalis so panagaral na pamilya ra ed datin eskedyul na panagaral na libro, no praktikal. Tan usaren iyan panaon parad aliwan apuraan ya pantotongtong nipaakar ed Biblia tan iyadapta so panagaral unong ed pankaukolan na pamilya.
4. Kasin kaukolan ya limitaan na pamilya so pantotongtong da ed sakey oras labat? Ipaliwawa.
4 Ta pian makaatendi ed Panagaral na Kongregasyon ed Libro, kaukolan tayoy panaon pian manpales, manbiahe, tan arum ni. Parad dakel ed sikatayo, aliwa labat ya sakey oras so nauusar ed iyaatendi’d satan. Natan, lapud sayan pananguman et nausar tayo la itan ya labi ed panagdayew ed si Jehova bilang pamilya. Kanian agkaukolan ya limitaan so Panagdayew na Pamilya tayo ed sakey oras labat. Imbes, nonoten tayo iray pankaukolan tan limitasyon na pamilya tayo, insan tayo desidien no pigaran oras so usaren parad satan.
5. Kasin pantotongtong labat lan amin bilang grupo so gawaen diad Panagdayew na Pamilya? Ipaliwawa.
5 Kasin Pantotongtong Labat ya Amin? Sano pantotongtongan na sanasawa, tan na saray pamilyan walay ananak so Makasulatan iran tema, manpapasesegan ira. (Roma 1:12) Mas onapit so pamilya ra. Kanian saray Makasulatan a pantotongtong so nepeg ya sankaimportantian a kabiangan na Panagdayew na Pamilya. Balet, nayari met ya manpersonal study so kada membro na pamilya. Singa bilang, kayari na pantotongtong bilang grupo, nayarin mansiansia ni ran sankakaiba legan ya itutuloy na balang sakey so personal ya panaral, nayarin isumpal toy pampaparaan parad aral odino pambasa na saray magasin. Say arum a pamilya et akaerep so TV da ed interon labi.
6. Panon so nayarin pangikondukta ed pantotongtong?
6 Panon so Nayarin Pangikondukta ed Pantotongtong? Agmet kaukolan a naynay a tepet tan ebat so pantotongtong. Pian mabilabilay tan makapainteres so Panagdayew na Pamilya, dakel a pamilya so walaan na programa a mipara ed midweek ya aral tayo. Aapagen da so pantotongtong tan gagawaen da iratan ed nanduruman paraan. Singa bilang, nayarin basaen dan saniiba so Biblia, say sakey ni et iparaan so parte na saray aral, odino manpasal parad ministeryo. Diad pahina 6 et walaray pigaran suhestion.
7. Anto so Panggunaetan na Atateng a Niwala?
7 Anto so Panggunaetan na Atateng a Niwala? Makaaral a maong so pamilya yo no nalikna day aro tan no relaks ira. No maminsan et nayari kayon manaral diad paway na abung no maabig so panaon. Sarag yo met so man-break no kaukolan. Say gagawaen na arum a pamilya et manmerienda ira kayari to. Anggaman ag-uusaren na saray atateng so labin Panagdayew na Pamilya pian mantami odino mandisiplina, nayarin mangigana iray panaon pian itongtong so problema ya naimano ra. Balet mas maabig no itongtong so sensitibo a personal iran problema na sakey ya ugaw a bukor to ed arum ya agew ed satan a simba, pian agnabaingan ed agagi to. Nepeg a say Panagdayew na Pamilya ed labi et aliwan boring odino setseryoso noagta kaukolan a napatnagan ed satan a say Dios a dadayewen tayo et maliket.—1 Tim. 1:11.
8, 9. Anton panagparaan so kaukolan a gawaen na saray ulo na pamilya?
8 Panon a Makapanparaan so Ulo na Pamilya? Nagunggonaan a maong so pamilya no manparaan a masakbay so ulo na pamilya parad kada labin Panagdayew na Pamilya diad pandetermina to no anto so nepeg a pantongtongan tan no panon so sankaabigan a panggawa ed satan. (Uli. 21:5) Maabig no tepetan na asawan laki so asawa to nipaakar ed saya. (Uli. 15:22) Sikayoran ulo na pamilya, akin ta no sagpaminsan et tepetan yo met iray ananak yo no antoray suhestion da? Magmaliw itan a makana lapud naamtaan yo no antoray pan-interesan tan pampapagaan da.
9 Kaslakan et agmet kaukolan ya andukdukey so pamparaan na ulo na pamilya. Seguradon panliketan na pamilya no walay regular a kabiangan na panagaral da kada simba, tan agkaukolan a salatan na ulo na pamilya so programa a sinimba. Ompan mas makagunggona no manparaan kada kayari panaral, legan ya wala ni’d isip to iray espiritual a pankaukolan na pamilya to. Say arum ya ulo na pamilya et manggagaway antikey ya listaan no antoray pantongtongan tan ipepeket da itan ed pasen ya sankanengneng na pamilya, a singa diad refrigerator. Saya so mangarum na liket tan lalon pitalaran na pamilya itan. Mangiter met iya na panaon pian makapanparaan so pamilya no nakaukolan.
10. Panon ya usaren na saramay bukbukor da so labi na Panagdayew na Pamilya?
10 Panon to no Bukbukor Ko? Saramay bukbukor da’d abung odino bukbukor dan Tasi et nayarin usaren da so Panagdayew na Pamilya ed labi parad personal study. Say maong a panagaral et laktipen toy pambasa na Biblia, pamparaan parad saray aral, tan pambasa na Say Panag-Bantayan tan Awake! Say arum et wala ni proyekto da ed personal study. Nayarin no maminsan et labay day mangimbita na arum a manangipalapag odino pamilya a mibiang ed sikara diad makapabiskeg a Makasulatan a pantotongtong.
11, 12. Anto so arum ya gunggona no walay regular ya Panagdayew na Pamilya ed labi?
11 Antoray Gunggona no Walay Regular a Panagdayew na Pamilya? Saramay sigpot puson mibibiang ed tuan panagdayew et napapaapit ed si Jehova. Niarum ni, saray pamilyan mandadayew a saniiba et oneelet so pankakasakey da bilang pamilya. Oniay insulat na sakey a sanasawa nipaakar ed saray bendisyon ya nanggayagaan da: “Bilang sanasawan payunir ya anggapoy anak, talagan pitalaran mi so Panagdayew na Pamilya mi ed labi. Liknaen min onaapit kami’d sakey tan sakey tan ed say Ama tayon walad tawen. Natan kabangon mi ed samay agew ya ineskedyul mi ya manaral, itetepet mi: ‘Anto la may eskedyul ta naani labi? Panagdayew na Pamilya!’”
12 Say uksoyan ya panagdayew na pamilya so ontutulong met ed saray pamilyan okupado. Insulat na sakey ya mansusulon ina a mamapabaleg ed duaran ananak ton lalaki tan manpapayunir: “Dati, say panagaral na pamilya mi et makapuy. Tubat-tubat tan manguman-uman so eskedyul mi lapud naknaksawan ak ya naynay. Agko la amta no panon kon isalet itan. Kanian nansulat ak ed sikayo pian misalamat na baleg ed Panagdayew na Pamilya ed labi. Wala lay regular a panagaral na pamilya mi tan naeeksperiensya mi iray gunggona.”
13. Iner akadepende so pakagunggonaan a maong na pamilya yo ed sayan uksoyan?
13 Singa say Sabaton, say Panagdayew na Pamilya ed labi et sakey ya regalo manlapud Ama tayo ed tawen ya ontulong ed saray pamilya. (Sant. 1:17) Napatnagan ed impangusar na saray Israelitan pamilya ed Sabaton no panon iran agunggonaan a maong ed espiritual. Ontan met, nagunggonaan a maong so pamilya tayo, depende ed no panon tayon usaren so labi ya niiter ed sikatayo parad panagdayew bilang pamilya. (2 Cor. 9:6; Gal. 6:7, 8; Col. 3:23, 24) Diad panganamot ed sayan uksoyan, nayarin nibaga met na pamilya yo so singa imbaga na salmista: “Bangbalet ta maong ed siak so ondere ed abay na Dios: inyan ko so panagmatale’ko ed Jehova a Dios.”—Sal. 73:28.
[Blurb ed pahina 5]
Nepeg a say Panagdayew na Pamilya ed labi et aliwan boring odino setseryoso noagta kaukolan a napatnagan ed satan a say Dios a dadayewen tayo et maliket.
[Kahon ed pahina 6]
ISINOP
Arum ya Ideya Parad Panagdayew na Pamilya ed Labi
Biblia:
• Manbasan saniiba na sakey ya kabiangan na sinimban babasaen ed Biblia. No matukoy ed materyal, nayarin basaen na sakey so salaysay, tan basaen na arum so imbaga na nanduruman karakter.
• Iyakto so sakey a kabiangan na babasaen ed Biblia.
• Mangiasain lan masakbay ed kada membro na pamilya na basaen ton kapitulo na Biblia tan mangisulat na sakey o duaran tepet to ed satan. Insan i-research yon saniiba so tepet na balang sakey.
• Kada simba, mangiparaan na flash card ya walay akasulat ya teksto ed Biblia tan imemorya tan ipaliwawa itan. Tiponen iray card tan repasoen iratan kada simba pian naamtaan yo no kaunongan karakel ya teksto so natandaan yo.
• Ondengel ed nirekord ya babasaen ed Biblia legan ya susubaybayan yo itan ed Biblia.
Saray Aral:
• Saniban iparaan so sakey ya kabiangan na saray aral.
• Ipraktis iray Kingdom song ya kansionen ed ontumbok ya aral.
• No walay betang na sakey ed Teokratikon Eskuelaan Parad Ministeryo, odino demostrasyon ed Pantitipon Parad Panagserbi, pantongtongan iray ideya no panon ya ipresenta itan, odino i-rehearse itan ed arap na pamilya.
Saray Pankaukolan na Pamilya:
• Konsideraen so sakey a materyal manlapud libron Young People Ask odino Manaral Manlapud Sankamaongan a Managbangat.
• Manggawa na saray panagpasal no panon ya arapen iray situasyon ya nayarin onlesa diad eskuelaan.
• Manggawa na saray panagpasal ya onakton atateng iray anak tan saray anak et onakton atateng. Man-research iray anak nipaakar ed sakey a tema insan ipaliwawa da’d atateng da.
Ministeryo:
• Manggawa na saray panagpasal ed panangiparaan na saray presentasyon parad weekend.
• Pantongtongan iray realistikon kalat a nayarin iplano na pamilya pian palaknaben so pibibiang da ed ministeryo diad panaoy Memoryal odino bakasyon.
• Ikdan so kada membro na pamilya na pigaran minuto pian manresearch no panon ya ebatan iray nikaduman tepet ya nayarin naabet ed ministeryo, insan manpraktis.
Kaaruman Iran Suhestion:
• Basaen ya saniiba so sakey ya artikulo na balon magasin.
• Masakbay lan ipabasa ed kada membro na pamilya so artikulo ed balon magasin ya makapainteres ed sikato, tan paisalaysay itan.
• Sagpaminsan, mangimbita na sakey a manangipalapag odino sanasawa ya mibiang ed Panagdayew na Pamilya yo ed labi, tan nayarin interbioen ira.
• Bantayan tan pantongtongan so sakey ed saray video tayo.
• Pantongtongan so “Young People Ask” odino “For Family Review” manlapud Awake!
• Pantongtongan so “Ibangat Yo Iray Anak Yo” odino “Parad Saray Kalangweran” manlapud Say Panag-Bantayan.
• Basaen tan pantongtongan so sakey a kabiangan na kaplesan ya Yearbook odino sakey ed saray balon paway ed distriton kombension.
• Kayari iyatendi ed kombension odino asemblea, repasoen iray manunan punto.
• Obserbaan iray palsa nen Jehova, tan pantongtongan no antoy ibabangat na satan ed sikatayo nipaakar ed si Jehova.
• Manggawa na proyekto a saniiba, singa say panggawa na mapa, tsart, odino representasyon na saray bengatlan walad Biblia.