The Wonders of Creation Reveal God’s Glory
Panliliketan na dakel ya nengnengen iray pinalsa. Balet kaslakan et agda namomorian diad satan et makakaala la ray ideya ed panagnonot tan liknaan na Amalsa. (Roma 1:20) Nensaman, naaralan nen David so nipaakar ed si Jehova panamegley na pinuyanan a Salita To. Balet panamegley met na saray pinalsa et “anengneng” to tan inmapit ed Sikato. (Sal. 8:3, 4) Say video ya The Wonders of Creation Reveal God’s Glory so ontulong ed sikatayo, saray anak tayo, tan saray iyaaralan tayoy Biblia pian nausisan maong so arum ed saray pinalsa nen Jehova, nanengneng iray kualidad tan personalidad na Amalsa ed sikatayo, tan diad ontan et mas napaapit tayod sikato. Kayari yon bantayan so video, sali yo pan ebatan irayan tepet.
(1) Panon mon mas lalon naapresya si Jehova lapud kabaleg tan inkauksoy na universe? (Isa. 40:26) (2) No usisaen tayo so danum, antoy naaralan tayo ed Samay nandesinyo ed satan? (Apo. 14:7) (3) Panon ya napatnagan so kakabatan nen Jehova ed kabaleg na mundo tan distansia na satan ed agew? (4) Antoy usar na bulan? (Sal. 89:37) (5) Panoy impanggawa nen Jehova ed totoo pian na-enjoy day bilay? (6) Anto so DNA? (Sal. 139:16) (7) Diad amin ya pinalsa ed dalin, panon ya niduma iray totoo? (Gen. 1:26) (8) Antoy tatalaranan mo ed balon mundo?
Saray Extra Feature: (9) Panon a napapawala iray kolor? (10) Panon ya nalalabanan na danum so gravity pian makasabid tagey na kiew? (11) Antoy gagawaen na danum ed laman tayo? (12) Mangiter na saray alimbawa ya walay kooperasyon ed saray mabilay a pinalsa. (13) Panon ya amta na saray pinalsa so mi-partner ed arum? (14) Anto so “golden angle,” tan panon itan a napatnagan ed saray pinalsa?
“Imano Yo Pan Maong” Iray Pinalsa nen Jehova: Papasesegen itayo nen Jesus ya ‘imanoen a maong iray ontitikyab a kamanokan’ tan saray “lirio ed uma.” (Mat. 6:26, 28) Diad panggawa tayod satan, napabiskeg so pananisia tayo, nawalaan tayoy talek ed Amalsa, tan naapresya tayoy kakabatan, pakayarin mangiliktar, tan aro nen Jehova. Imbes ya masyado tayon busy ed saray gawa na sayan mundo, mangiganay panaon tan mansagpot ya obserbaan iray makapakelaw ya pinalsa nen Jehova, tan dalepdepen no antoy ibabaga da nipaakar ed Dios tayo.—Sal. 19:1.