No Panon ya Usaren so Maong a Balita ya Nanlapud Dios!
Balon Brosyur ya Ontulong Pian Makapanggaway Panagpawil tan Makapangigapoy Panangiyaral na Biblia
1. Anto imay balon brosyur ya nirelease ed “Protektaan Moy Pusom!” a Distriton Kombension ya ontulong pian makapan-RV tan makapangigapoy panangiyaral na Biblia?
1 Diad samay Distriton Kombension ya “Protektaan Moy Pusom!,” malikeliket tayon inawat so balon brosyur ya ontulong ed sikatayon makapan-RV tan makapangigapoy panangiyaral na Biblia. Say Maong a Balita ya Nanlapud Dios! ya sinmalat ed brosyur ya Kakaukolanen, et antirikey met iray leksion to. Kanian, mainomay iyan usaren diad pangiyaral na Biblia ed puerta. Samay Kakaukolanen a brosyur et ipapaliwawa to iray kakaukolanen ed saray Kristiano, a nayarin mairap ya awaten na saray balon iyaaralan. Sayan balon brosyur balet et akasentrod maong a balitan walad Biblia.—Gawa 15:35.
2. Akin et impalapag so brosyur ya Maong a Balita?
2 Akin et impalapag iya? Saray agagi ed interon mundo et onkekerew na simplin publikasyon ya managyat ed saray totoo ed katuaan tan insan niyaralan na libron Ibabangat na Biblia, say manunan uusaren parad panangiyaral ed Biblia. Ompan saramay manaalangan ya paiyaralan na Biblia panamegley na libro et labay day paiyaralan diad pangusar ed brosyur. Sakey ni, mas mainomay ya ipatalos so brosyur ed dakel ya lenguahe.
3. Akin et duma iyan brosyur ed arum ni ran aaralen ya publikasyon?
3 Inkadesinyo to: Dakel ed saray aaralen ya publikasyon tayo et insulat pian nabasa tan natalosan so katuaan, anggano anggapoy manbangat. Balet, duma iyan publikasyon. Ginawa iya bilang giya ed panagaral na Biblia kaibay managbangat. Kanian, sano iyopresi iya, maabig no pantongtongan so sakey odino duaran parapo. Antirikey iray parapo kanian nayarin pantongtongan anggan diad puerta labat odino diad pasen na trabaho. Maabig no igapo itan ed leksion 1, balet sarag tayo met ya igapo so panangiyaral ed anggan iner a leksion na brosyur.
4. Panon a makatulong so brosyur pian direkta tayon nibangat so Biblia?
4 Diad dakel ya publikasyon tayo, naromog so ebat ed saray tepet diad mismon parapo. Balet, diad sayan publikasyon, saray ebat et manunan naromog ed Biblia. Dakel so malabay ya manaral manlapud Biblia imbes ya manlapud saray literatura tayo. Kanian, maslak ed saray insitas ya teksto et ag-in-quote. Kaukolan ya basaen iratan a mismo ed Biblia. Diad ontan et natebek na saray iyaaralan ya manlalapud Dios so naaaralan da.—Isa. 54:13.
5. Akin et importantin manparaan tayon maong ed kada panagaral?
5 Ag-ipaliwawa na brosyur so amin ya teksto. Akin? Pian napaseseg so iyaaralan ya mantepet tan natulongan so mangiyaaral ya usarey dunong ton manbangat. Kanian importante so pamparaan ya maong parad kada panagaral. Nia balet so alwaran: Nepeg ya agtayo salita lan salita. Tua, labalabay tayon ipaliwawa so Kasulatan. Balet, mas maabig so resulta no paipaliwawa tayod iyaaralan so panmoria tod saray teksto. No mataktika itayon mantepet, sikatoy natulongan tayon ‘mankatunongan’ ed dugan kabaliksan na kada teksto.—Gawa 17:2.
6. Panon ya usaren so brosyur: (a) ed totoon manisian-andi ed Dios tan ed Biblia? (b) diad panagkabkaabungan? (c) sano direktan iyopresi so panagaral na Biblia? (d) sano man-RV?
6 Singa saray arum ya iyaaral a publikasyon, nayari tayon ipalima iyan brosyur anggano sananey so opresi ed bulan. Seguradon dakel so malabay ya mangusar ed saya diad direktan pangiyopresi na panangiyaral na Biblia diad puerta. Sakey ni, no usaren iya diad saray pawilen tayon interesado, singa abitlad distriton kombension et “talagan eksayting so pan-RV!”—Nengnengen iray kahon ed pahina 5-7.
7. Panon yon iyaral so Biblia diad pangusar ed brosyur?
7 No Panon Iyan Iyaral: Sarag tayon igapoy tongtongan diad pangibasa ed tepet ya walay numero to tan mabakat so inkisulat to. Insan, basaen so parapo tan say (saray) tekston aka-italiko. Mataktikan mantepet pian natalosan na katongtong so kabaliksan na saray teksto. Kayari to, antis ya onlad onsublay ya seksion, paebatan imay mabakat ya tepet pian naseguro no kasin atalosan to itan. Diad unona iran ibisita, maabig no sakey ya tepet labat so pantongtongan. Nasabi panaon, nayarin interon leksion lay pantongtongan.
8. Panon tayon ipaimano iray teksto, tan akin?
8 Saray tekston tumbokan na salitan “basaen” so manunan mangebat ed tepet ya mabakat so inkisulat to. Kanian no ipaimano so teksto, paliisay pangibaga na, “Insulat nen apostol Pablo,” odino “Oniay imbaga nen Jeremias.” Ompan say isipen na katongtong tayo et babasaen tayoy insulat labat na too. Mas maabig no say ibaga tayo et, “Oniay ibabaga na Salita na Dios” odino, “Oniay ibabaga na Biblia.”
9. Basaen tayo kasi so amin ya nisitan teksto sano mangiyaaral?
9 Basaen tayo kasi so amin ya nisitan teksto odino saramay “basaen” ya teksto labat? Depende itan ed situasyon. Walay gagala na amin ya nisitan teksto. Karga na saratan so impormasyon ya makanan pantongtongan. Balet no say iyaaralan et kulang so panaon to, mairap toy manpokus, odino manbasa, nayarin saray “basaen” ya teksto labat so nengnengen.
10. Kapigan isublay ed panagaral so libron Ibabangat na Biblia?
10 No Kapigan Isublay so Libron Ibabangat na Biblia: No aminpiga la tan regular la so panagaral, nayari tayo lan isublay so libron Ibabangat na Biblia odino ituloy ni so brosyur ya Maong a Balita anggad nasumpal. Say manangipalapag so mandesisyon no kapigan so matukoy ya panggawa ed satan. No isublay tayo lay libron Ibabangat na Biblia, nepeg tayo kasin igapo ed sankaunaan ya leksion? Depende itan ed kada indibidual. Balet, nagunggonaan iray iyaaralan no detalyadon aralen diad libron Ibabangat na Biblia iray teman apantongtongan la.
11. Akin ya usaren tayo iyan balon brosyur?
11 Diad sayan mundon puros mauges a balita so narerengel, baleg ya pribilehyo tayon iyabawag so sankaabigan ya balita—ya manuuley lay Panarian na Dios tan asingger lay balon mundo a “manayam so inkatunong”! (Mat. 24:14; 2 Ped. 3:13) Seguradon dakel ed saray makadngel ed sayan mensahe so mipakna ed pinuyanan ya salitan: “Agayla so kalimgasan ed tapew na saray palandey so saray sali na mangyakar na saray maong a balita, a mangibawag na deen, a mangyakar na saray maong a balita na kaabigan, a mangibawag na kilalaban, a kuan to ed Sion, Say Dios mo man-ari!” (Isa. 52:7) Komon ta usaren tayo iyan brosyur pian ipasabi ed saray napgaan so maong a balitan nanlapud Dios!
[Kahon ed pahina 5]
Sano Manisian-Andi ed Dios tan ed Biblia Iray Totoo:
● Diad arum a lugar, naimano na agagi ya aglabay ya pantongtongan na totoo so nipaakar ed “Dios” tan ed “Biblia.” No ontan, maabig no diad unonan idalaw et itongtong iray pampapagaan da, a singa say pankaukolan ed maong a gobierno, no iner so pakalmoay praktikal a tulong parad pamilya, tan no antoy nagawad arapen. Kayari na aminpigan indalaw ed sikato tan apantongtongan la no panon tayon amta ya walay Dios tan no akin ya napanmatalkan so Biblia, nayari tayo lan ipresenta so Maong a Balita ya brosyur.
[Kahon ed pahina 6]
Sano Mankakabkaabungan:
● “Wadia kami ta labay min naamtaan yo no antoy gagala na Dios parad arapen. Parad sikayo, ekalen kasi na Dios so paniirap? [Abuloyan ya onebat.] Nanengneng ed sayan brosyur no iner naromog ed Biblia so ebat. [Iderew so sakey a kopya, tan basaen so unonan parapo ed leksion 1, ontan met ed Jeremias 29:11.] Base ed saya, labay kasi na Dios ya oninaway bilay tayo? [Abuloyan ya onebat.] Itilak ko la ’tay brosyur ed sikayo. Diad onsublay, pantongtongan tayo so komaduan parapo pian naamtaay ebat na Biblia ed no ‘Panon ya ekalen na Dios so paniirap na totoo?’” No diad unonan dalaw et malaem so panaon na katongtong yo, nayari yon basaen tan pantongtongan so komaduan parapo tan saray taloran teksto. Iyuksoy so ipawil pian pantongtongan so komaduan tepet ed satan ya leksion.
● “Dakel a totoo so manpipikasi, lalo la no walay problema da. Manpipikasi kayo met? [Abuloyan ya onebat.] Parad sikayo, dedengelen kasi na Dios so amin ya pikakasi, odino wala ray agto dedengelen? [Abuloyan ya onebat.] Makatulong iyay awit kon brosyur pian naromog so ebat na Biblia ed satan. [Iderew so sakey a kopya, tan pantongtongan so unonan parapo ed leksion 12 tan saray “basaen” ya teksto.] Agta makapaliket ya naamtaan ya ondedengel so Dios ed sikatayo? Balet pian makatulong ed sikatayo so pikakasi, kaukolan tayon kabaten ya maong so Dios. [Ibukay ed leksion 2 tan ipaimano iray subheading.] No labay yo, itilak ko la yay brosyur ed sikayo, tan no onsublay, basaen tayoy ebat na Biblia ed sarayan balibalin tepet.”
● “Panaaburidoan na dakel no anto la kasi nagawa ed sayan mundo. Parad sikayo, onaligwas ni kasi so kipapasen? [Abuloyan ya onebat.] Saray arum et nabibigla no naamtaan dan wala manayad Biblia so maong a balitan mangiter na ilalo ed sikatayo. Nia ray pigaran tepet ya eebatan na Biblia.” Iderew so sakey a kopya, tan pampilien no dinan ed saray tepet diad beneg na brosyur so makapainteres ed sikato. Insan idemostra so panangiyaral. Iyuksoy so ipawil tan pantongtongan so onsublay ya tepet ed satan a leksion.
[Kahon ed pahina 7]
Salien so Direktan Pangiyopresi:
● “Linma ak dia pian ibalitad sika so panagaral ed Biblia ya usaren so balon brosyur. Walay 15 leksion ed saya ya makatulong pian naromog ed Biblia so ebat ed saray importantin tepet. [Ipanengneng so arap tan beneg na brosyur.] Sinalim lan binasay Biblia? [Abuloyan ya onebat.] Ipanengneng kod sika no panon kainomay ya aralen iray leksion ed saya. [Pantongtongan so unonan parapo na tepet 3 ed leksion 3, tan basaen so Apocalipsis 21:4, 5. No matukoy, ituloy ed onsublay ya parapo tan saray “basaen” a teksto.] No labay mo, itilak ko la yay brosyur. Komon nasalim anggan maminsan so manaral na Biblia. No nagustoan mo, sarag ta’n ituloy. Diad onsublay, nayari ta’n pantongtongan so unonan leksion. Sakey pahina labat iya.”
[Kahon ed pahina 7]
Ipresenta Sano Man-RV:
● “Maong ta asabian ta ka. Walay awit kon brosyur ya mangipaamtad ebat na Biblia ed importante iran tepet. [Iderew so sakey a kopya, tan ipaimano ed sikato so beneg na brosyur.] Dinan ed saraya so labay mon pantongtongan ta? [Abuloyan ya onebat. Insan onlad leksion ya pinili to.] Ipanengneng kod sika no panon ya usaren iyan brosyur pian naromog so ebat na Biblia.” Idemostra so panagaral diad pangonsiderad sakey odino duaran parapo tan saray “basaen” ya teksto. Akapangigapo ka lad satan na panangiyaral na Biblia! Iter so brosyur ed akatongtong, tan iyuksoy so ipawil. No nasumpal so sakey a leksion, nayari yon pantongtongan so sananey a leksion ya pinili to odino igapo ed leksion 1.