Alig Yoy Alimbawa na Saray Propeta—Jonas
1. Anto ray positibon kualidad nen Jonas?
1 Antoy nanonotan yod si propetan Jonas? Nayarin iisipen na arum ya sikatoy payakot odino anawet so ulo to. Balet diad tua, sikatoy mapaabeba, makpel, tan masakripisyo. Panon tayon ‘naalig’ iray marakep ya kualidad nen Jonas?—Sant. 5:10.
2. Panon tayon naalig so inkamapaabeba nen Jonas?
2 Mapaabeba: Nen unaan, imbatikan nen Jonas so asainmin to tan linmad duman direksion. Agtayo iya pankelawan ta kabkabat iray Asiryano ya maruksa, tan tinawag ni ingen so Ninive ya “syudad a managpaagus na dala.” (Nah. 3:1-3, NW) Anggaman ontan, nen dinisiplina nen Jehova si Jonas, sikatoy nampaabeba tan inawat to lanlamang itan ya asainmin. (Uli. 24:32; Jon. 3:1-3) Anggaman nen unaan et tinmakas, ginawa to lanlamang so ipapagawa nen Jehova. (Mat. 21:28-31) Sikatayo ey, kasin determinado itayon ipulong so maong a balita, anggano adisiplina itayo odino mairap so teritoryan niasain ed sikatayo?
3. Anto ran aspektoy ministeryom so mankaukolay pakpel tan pansakripisyo?
3 Makpel tan Masakripisyo: Sanen amoria nen Jonas ya nipeligroy bilay na saray kaiba ton akalugan ed barko lapud lingon desisyon to, sikatoy akaparaan ya mangisakripisyod bilay to. (Jon. 1:3, 4, 12) Ag-abayag, pian sumpaley asainmin tod Ninive, sikatoy nanakar paonlad sentro na syudad, nayarin pian mananap na matukoy a lugar ya pangiyabawagan toy panangukom nen Jehova. Ontan so gagawaen na makpel, aliwan payakot a propeta na Dios! (Jon. 3:3, 4) Sikatayo ey? Kaukolan tayoy pakpel a manlalapud Dios pian makapantasi anggano susumpaen. (Gawa 4:29, 31) Kaukolan tayo met so mansakripisyo pian niiter so panaon tan kaykayarian parad ministeryo.—Gawa 20:24.
4. Akin ya kaukolan tayon ipanaon so pandalepdep ed maong ya alimbawa na saray propeta nen Jehova?
4 Kada no babasaen mo so salaysay nipaakar ed sakey a propeta nen Jehova, nagunggonaan ka no imadyinen mon sika imay walad onman a kipapasen. Tepetan moy sarilim: ‘Anto kasi gawaen ko no siak iman? Panon kon naalig iray maabig ya kualidad to?’ (Heb. 6:11, 12) Diad onsublay iran artikulo ed Ministeryo Tayo ed Panarian, naaralan tayoy kaaruman iran makanan leksion nipaakar ed arum ni ran matoor a propeta nen Jehova.