Antoy Mamapakiwas ed Sikatayon Manpulong?
1. Antoy koneksion na panangaro ed ministeryo tayo?
1 Say panangipulong ed maong a balita na Panarian na Dios so sankaimportantian a kimey a nagawaan tayo natan. Diad sayan kimey, nipanengneng tayoy katutulok ed duaran manunan ganggan, say pangaro ed si Jehova tan ed kaparan too. (Mar. 12:29-31) Panangaro so mabiskeg a rason a mamapakiwas ed sikatayon magmaliw a maseseg a ministro.—1 Juan 5:3.
2. Panon ya nipanengneng na panagpulong tayo so panangaro tayod si Jehova?
2 Panangarod si Jehova: Say panangaro ed sankaapitan ya Kaaro tayo, si Jehova, so mamapakiwas ed sikatayon sikatoy idepensa. Manga 6,000 a taon la a sikatoy papaugesen nen Satanas. (2 Cor. 4:3, 4) Lapud satan, anisia iray totoo ya say Dios et misteryoson Trinidad, anggapoy pibabali tod totoo, tan papairapen to ray makasalanan diad mandarlang ya impierno. Ibabaga ni ingen na dakel ya anggapoy Dios. Kanian, talagan labalabay tan pipilaleken tayon nipaamtad totoo so katuaan nipaakar ed si Aman Jehova! No makulikuli tayon ipulong so nipaakar ed Dios, sikatoy napaliket tayo tan naebatan tayoy balaw nen Satanas.—Uli. 27:11; Heb. 13:15, 16.
3. Panon ya say panagpulong tayo et panangipatnag na panangarod kaparan too?
3 Panangarod Kaparan Too: Kada no manpupulong tayo, nipapanengneng tayoy panangarod kaparan too. Diad sayan mair-irap a panaon, kakkaukolan na totoo ya narengel so maong a balita. Maslak ed saray totoo natan et singa saray taga-Ninive nen panaon nen Jonas ya “agda amta so lima ra a kawanan tan lima ra a kawigi.” (Jon. 4:11) Lapud panagpulong tayo, nibabangat ira no panoy pambilay a maliket tan matalona. (Isa. 48:17-19) Tan naiikdan iray ilalo. (Roma 15:4) No ondengel tan onkiwas ira ed nanaaralan da, sikaray “nilaban.”—Roma 10:13, 14.
4. Antoy agbalot lingwanan nen Jehova?
4 Saray maong ya anak et pansasagpotan dan aaroey atateng da ed amin a panaon. Aliwan natan et maaro ra tan nabuas et andi. Mipadpara, say aralem a panangarod Dios tan kaparan too so mamakiwas ed sikatayon alerto ed saray pankanawnawan makapanpulong ed amin a panaon, aliwa labat lan no eskedyul tayoy manpulong. Agtayo ontutundan manpulong. (Gawa 5:42) Satan ya panangaro et agbalot lingwanan nen Jehova.—Heb. 6:10.