Anto Kasi Pakanengneng nen Jehova ed Siak?
1. Akin ya say Biblia et singa espiho?
1 Panon kabetbet kan onnenengneng ed espiho? Inagew-agew itan ya gagawaen na maslak ed sikatayo pian nanengneng no antoy kaukolan tayon ayosen ed sarili tayo. Say Biblia et singa espiho. No basaen tayoy Salita na Dios, natulongan itayon nanengneng so inkatoo tayo—say nenengnengen nen Jehova. (1 Sam. 16:7; Sant. 1:22-24) Say Salita na Dios et “nibiig to iray kanonotan tan getma na puso.” (Heb. 4:12) Panon ya makatulong so inagew-agew ya pambasa tan pandalepdep ed Biblia pian nanengneng tayo iray nepeg tayon paaligwasen pian magmaliw tayon mas epektibon ebanghelisador?—Sal. 1:1-3.
2. Panon ya makatulong ed sikatayo so Biblia pian nausisay sarili tayo?
2 Usaren so Biblia Bilang Espiho: Diad saray salaysay na Biblia nipaakar ed matoor iran lingkor nen Jehova, naaralan tayo no anto ray kualidad ya makapaliket ed sikato. Singa bilang, impanengneng nen David so panamabli tod ngaran na Dios. (1 Sam. 17:45, 46) Makpel si Isaias ya namboluntaryon nampulong ed mairap ya teritorya. (Isa. 6:8, 9) Lapud inad-aro nen Jesus so Ama tod tawen, impasen toy ministeryo to ya lapuan na pakainawaan tan inkapnek imbes ya pabelat. (Juan 4:34) Maseseg ya nampulong iray Kristiano nen inmunan siglo, nanmatalek irad si Jehova, tan determinado ran ag-ontunda. (Gawa 5:41, 42; 2 Cor. 4:1; 2 Tim. 4:17) No dalepdepen tayo iratan ya alimbawa, nausisa tayoy sarili tayo pian nanengneng iray papaaligwasen tayod kualidad na panagdayew tayo.
3. Akin et agtayo nepeg ya ipaleen so panggaway kaukolan iran pananguman?
3 Ipetek Iray Aliwa: Siempre, anggapoy gunggona na pan-espiho no ibaliwala tayo lanlamang so anengneng tayon aliwa. Sarag tayon kerewey tulong nen Jehova pian balanse so panusisa tayod sarili tayo insan makapanggawa tayoy kaukolan iran pananguman. (Sal. 139:23, 24; Luc. 11:13) Lapud apatikeyan lay akeran panaon, tan bilay so nalalanor, nepeg ya agtayo ipapaleen so panggaway kaukolan iran pananguman.—1 Cor. 7:29; 1 Tim. 4:16.
4. Antoy nagawad sakey ya too no onnengneng ed Salita na Dios insan onkiwas base ed naaralan to?
4 Say nenengnengen nen Jehova et say inkatoo na sakey—mas importante itan nen say akinpaway ya itsura. (1 Ped. 3:3, 4) Antoy nagawad sakey ya too no onnengneng ed Salita na Dios insan onkiwas base ed naaralan to? Sikatoy “magmaliw a maliket ed panggagawa to ed satan lapud sikatoy mananumpal na kimey, aliwan mililingwan a dumerengel.” (Sant. 1:25) On, magmaliw tayon maliket tan epektibo iran ministro lapud “iyaaninag tayon singa saray espiho so gloria nen Jehova.”—2 Cor. 3:18.