No Panon ya Sabien so Puso na Saray Ibabangat Tayo
1. Antoy epekto na impanbangat nen Jesus ed puso na saray ondedengel ed sikato?
1 Asabi nen Jesu-Kristo so puso na saray ondedengel ed sikato. Aminsan et “singa onaapoy” so puso na saray disipulo to kayari ton impaliwawad sikaray Kasulatan. (Luc. 24:32) Lapud say itulok ed Dios et nepeg a manlapud puso, panon tayon nasabi puso na saray ibabangat tayo pian napakiwas iran manggaway pananguman ed bilay da?—Roma 6:17.
2. Antoy nagawaan na inkamataktika tan pakatebek pian nasabi puso na iyaaralan?
2 Magmaliw a Mataktika tan Usarey Pakatebek: Dakel ya totoo so agnapakiwas diad pangibaga labat ed sikara no antoy maong tan mauges. Diad tua, no basaan tayo ray amayamay a teksto pian kontraey pananisia da, ompan agla ra mitongtong ed sikatayo. Pian napakiwas so sakey, tebeken tayo nin unona iray rason no akin ya onmay panisiaan tan gagawaen to. Saray mataktika tan pinilin maong ya tepet et mamaseseg ed sikaton ibaga iray iisipen to. (Uli. 20:5) No ontan, sarag tayo lay mamili na impormasyon ed Salita na Dios ya nayarin makasabid puso to. Kanian kaukolan tayon ipanengneng ya interesado tayod sikato tan mananos tayo. (Uli. 25:15) Tandaan ya nandurumay kapeles na iyaligwas ed espiritual. Ikday panaon so masanton espiritu nen Jehova ya mangimpluensya ed nonot tan kiwas da.—Mar. 4:26-29.
3. Panon tayon natulongan iray ibabangat tayo ya nawalaay maong iran kualidad?
3 Tulongan Iran Nabayuboay Maong Iran Kualidad: Saray tekston mangipapanengneng ed kamaongan tan panangaro nen Jehova et makatulong ed saray ibabangat tayon nawalaay maong iran kualidad. Sarag tayon usaren iray teksto a singa say Salmo 139:1-4 odino Lucas 12:6, 7 pian ipanengneng no panon kainteresado so Dios ed kada sakey ed sikatayo. No talagan aapresyaen na sakey so agnaparaan ya kaabigan nen Jehova, say panangaro tan debosyon tod Dios et ombiskeg. (Roma 5:6-8; 1 Juan 4:19) Tan no naamtaan da ya naapektoan si Jehova ed saray ugali da, nayarin napakiwas iran gawaen no antoy makapaliket tan mangigalang ed sikato.—Sal. 78:40, 41; Uli. 23:15.
4. No manbabangat tayo diad ministeryo, panon tayon nipanengneng ya rerespetoen tayoy kanepegan na sakey ya mandesisyon?
4 Agpipiliten nen Jehova so anggan siopa ya onunor ed saray ganggan to. Imbes, kekerewen to itan ed sikara diad pangipapanengneng to no akin ya makagunggona so pangunor ed saray bilin to. (Isa. 48:17, 18) Aaligen tayoy Jehova no say paraan na pambabangat tayo et ontulong ed totoo ya makagawa na sarili dan konklusyon. No nakombinse na sakey so sarili to ya kaukolan toy manguman, tuloytuloy la itan. (Roma 12:2) Tan mas onapit irad si Jehova, say “manguusisa ed kapusoan.”—Uli. 17:3, NW.