Paaligwasen Iray Abilidad Tayod Ministeryo—Iyopresi so Libron Ibabangat na Biblia

No Akin ya Importante: Say libron Ibabangat na Biblia so manunan uusaren tayod panagbangat. Balet antis tayon iyaral itan, kaukolan tayo nin iyopresi. Kanian, panseetan tayon amin ya paaligwasen so abilidad tayon iyopresi so libron Ibabangat na Biblia ed ministeryo. (Uli. 22:29) Dakel so paraan pian nagawaan tayo itan, tan usaren tayo no antoy epektibo ed sikatayo.

No Panon Iyan Nagawaan:

Mangusar na makaalay interes a tepet pian nikonektay tongtongan ed espisipikon kapitulo ed libro. Sarag mo met so manpili na sakey ed saray tepet ya walad gapo na kada kapitulo. Kayarin onebat so unabung, manbasa ka na matukoy ya teksto tan ipanengneng ed sikato so parapo ya kawalaan na satan ya topic tan nayarin pantongtongan yon magano.
Usaren iray unonan pahina pian naalay interes na unabung insan ipanengneng ed libro so ebat na Biblia. Singa bilang, nayarin mangibaga kay agano nin balita nipaakar ed sakey ya trahedya tan ibagam ya pannonotan na dakel no antoy ebat ed saray tepet ya walad pahina 3. Odino sarag mon ibaga ya ombibisita ka ed saray totoo pian inabang so nipaakar ed balibalin nagawad arapen. Insan ipanengneng so litrato ed pahina 4-5 tan itepet mo, “Dinan ed saraya so labay yon nagawa?” Sarag mo met ya ibaga ya ombibisita kan magano pian natulongan iray totoo ya anapen so ebat ed saray importantin tepet. Insan ipanengneng ed unabung iray tepet ed leksab na pahina 6, tan tepet mo no dinan ed saratan so labay ton naebatan.
Direktan iyopresi so panangiyaral na Biblia. Nayarim ya ibaga: “Ipapanengneng mi yan libro ed saray totoo. Akanengneng kayo lay onian libro? [Abuloyan ya onebat.] Labay ko komon ya idemostra ed sikayo no panon iyan aralen ya usaren so sarili yon Biblia, anggan pigaran minuto labat.”

Gawaen Iya Legan na Sayan Bulan:

Manpraktis ed panagdayew na pamilya yo.
Diad ministeryo, ibagad arum ya manangipalapag no antoy iisipen mon presentasyon. (Uli. 27:17) Umanen itan no aliwan epektibo.