Alig Yoy Alimbawa na Saray Propeta—Habacuc
1. Akin ya nayarin nalikna tayoy alikna nen propeta Habacuc?
1 Lapud lalon onuuges so mundo, nayarin nalikna tayoy alikna nen Habacuc, ya nantepet ed si Jehova: “Akin et aabuloyan mon nanengneng ko so mauges a kagagawa? Tan akin et aabuloyan mo so panamairap?” (Hab. 1:3, NW; 2 Tim. 3:1, 13) No dalepdepen tayoy mensahe nen Habacuc tan say maabig ya alimbawa to, ag-itayo onkapuy legan tayon aalagaren so agew na panangukom nen Jehova.—2 Ped. 3:7.
2. Panon tayon nipanengneng ya manbibilay tayon walaay pananisia natan?
2 Manbilay a Walaay Pananisia: Imbes ya naapektoan ya maong si Habacuc ed saray mauges ya nagagawa, sikatoy nansiansian alerto tan aktibo ed espiritual. (Hab. 2:1) Impaseguro nen Jehova ya nasumpal iray salita To diad dugan panaon tan “say matunong manbilay naani a lapu ed pananisia to.” (Hab. 2:2-4) Antoy labay ya ibaga na saya ed saray Kristianon manbibilay ed panaon na anggaan? Aliwan say pakaamta no kapigan onsabi anggaan so importante, noag say panisia ya talagan onsabi itan. Napakiwas itayo na pananisia pian mantultuloy ya manbantay tan iyuna so ministeryo tayo.—Heb. 10:38, 39.
3. Akin ya kaukolan tayon pansiansiaen so liket tayod panaglingkor ed si Jehova?
3 Manliket Lapud si Jehova: No atakien la na Gog na Magog iray totoo nen Jehova, nasubok so pananisia tayo. (Eze. 38:2, 10-12) Manresultad kairapan iray panlalaban, anggan diad saray manalo. Onkulang so naakan, naandi iray kaykayarian, tan magmaliw ya mair-irap so panagbilay. Antoy gawaen tayo no onsabi irayan kairapan? Amta nen Habacuc ya nagawa iraya, kanian impansiansia toy liket to ed panaglingkor ed si Jehova. (Hab. 3:16-19) “Say liket nen Jehova” so ontulong met ed sikatayon nasarag iray subok diad arapen.—Neh. 8:10; Heb. 12:2.
4. Antoy panliketan tayo natan tan diad arapen?
4 Saray iliktar nen Jehova diad agew na panangukom et mantultuloy ya nabangatan ed dalan To. (Hab. 2:14) Saray napaoli et manaral met nipaakar ed si Jehova. Anggan natan ni labat et anamoten tayo lay amin a pankanawnawan ipakabat si Jehova tan saray makapakelkelaw a kimey to!—Sal. 34:1; 71:17.