Espisyal a Kampanya no Nobyembre​—Iyabawag so Panarian na Dios!

Impulong nen Jesus so “maong a balita na Panarian na Dios.” (Luc 4:43) Imbangat to met iray totoo ya ipikasin onsabi la komon so Panarian. (Mat 6:9, 10) No Nobyembre, gawaen tayoy anggaay nayarian tayon iyabawag so Panarian na Dios. (Mat 24:14) Kanian iyuksoy mo la natan so eskedyul mo pian nasuportaan mo iyan kampanya. Sarag ya pilien na amin ya man-auxiliary payunir so 30 odino 50 ya oras parad Nobyembre.

Anggad posible, mangibasa kay sakey a teksto nipaakar ed Panarian na Dios ed dakel ya totoo. No manpipili kay teksto, ikonsideram so relihyon na katongtong mo. No interesado so apulongan mo, ikdan moy publikon edisyon na Say Panag-bantayan No. 2 2020. Pawil mon tampol insan salien ya igapon iyaralan na Biblia panamegley na publikasyon ya walad Uusaren ed Panagbangat. Antiktikey lay keran panaon antis ya deralen na Panarian na Dios so amin ya onsusumpan gobierno. (Da 2:44; 1Co 15:24, 25) Komon ta mamasya ka ed sayan espisyal ya pankanawnawan suportaan si Jehova tan say Panarian to!