No Panon so Pangiyaral na Biblia Pian Onaligwas Anggad Bautismo so Iyaaralan​—Part 1

1. Base ed 2 Corinto 3:1-3, akin et baleg a pribilehyo ya iyaralan na Biblia so sakey ya too anggad manpabautismo? (Nengnengen so litrato ed apis.)

ANTOY naliknam no walay manpabautismo ed kongregasyon yo? Seguradon malikeliket ka! (Mat. 28:19) Lalo la no sikan mismo so angiyaral, seguradon eksayted ka lan nanengneng so pampabautismo to! (1 Tes. 2:19, 20) Saray balon bautismadon disipulo et singa ra “sulat na rekomendasyon” ya mamapaneknek ed inkakuli na saramay angiyaral tan na interon kongregasyon.​—Basaen so 2 Corinto 3:1-3.

2. (a) Anton tepet so ebatan tayo ed sayan artikulo, tan akin et importante ya pantongtongan tayo itan? (b) Anto so panangiyaral na Biblia? (Nengnengen so paimanod leksab.)

² Makapalikliket ta diad apalabas ya apatiran taon, say average ya irereport a panangiyaral na Bibliab diad interon mundo et 10,000,000. Tan diad saraman met lanlamang ya taon, masulok ya 280,000 so average ya nababautismoan kada taon bilang Tasi nen Jehova tan balon disipulo nen Jesu-Kristo. Antoy gawaen tayo pian mas dakel nin iyaaralan so manpabautismo? Anggad iyaabuloy ni nen Jehova ya magmaliw a disipulo nen Kristo iray totoo, labay tayon gawaen so anggaay nayarian tayo ya tulongan ira ya onaligwas anggad bautismo. Kaukolan tayo balet ya samboten ta antiktikey lay nakekeran panaon!—1 Cor. 7:29a; 1 Ped. 4:7.

3. Antoy aralen tayo ed sayan artikulo nipaakar ed panangiyaral na Biblia?

³ Lapud apuraan la so kimey ya panagbangat, walay ginawan survey ed nanduruman branch office pian naamtaan no panon tayo nin mas natulongan iray iyaaralan na Biblia anggad manpabautismo ira. Diad sayan artikulo tan diad onsublay, amtaen tayo no antoy naaralan tayo ed saray eksperiensyadon payunir, misionero, tan manangasikaso na sirkito.c (Pro. 11:14; 15:22) Wala ray suhestion da no antoy nagawaan na saray mangiyaaral tan saray mismon iyaaralan pian sulit so sagpot dan manaral. Diad sayan artikulo, aralen tayoy limara ya nepeg a gawaen na saray iyaaralan pian tuloytuloy iran onaligwas anggad manpabautismo ira.

SINIMBA YA MANARAL

4. Akin et aliwan epektibo no tuloytuloy ya antikey labat so panangiyaral na Biblia?

⁴ Wala ray agagi ya magano labat so pangiyaaral day Biblia, ya no maminsan et dia labat ed puerta na unabung. Anggaman makatulong itan pian mansiansia so interes na unabung, ompan daiset labat so napantongtongan tan agda nagawaan ya sinimba so panaral da. Kanian say gagawaen na arum et lalaen day contact number to may interesado pian natawagan o nai-text da tan mangibaga ira na teksto ed Biblia ya sarag ton panisipan anggad agni ra makapanaral lamet. Anggano onlabas ni pigaran bulan ya ontan so gagawaen da, aliwan epektibo so ontan ya panangiyaral na Biblia. Kasin nailaloan mo ya onaligwas so iyaaralan anggad idedika toy sarili to ed si Jehova tan manpabautismo no ontan labat so panaon tan sagpot to ed panaaral toy Salita na Dios? Andi.

5. Base ed Lucas 14:27-33, antoy imbangat nen Jesus ya sarag tayon usaren pian natulongan tayo ray iyaaralan tayo na Biblia?

⁵ Aminsan et angusar si Jesus na ilustrasyon pian ipaliwawa no antoy nepeg ya gawaen na sakey a too pian magmaliw ya disipulo to. Nipaakar itan ed sakey a too ya labay toy manpaalagey na tori tan sakey ya ari ya labay toy miguerra. Imbaga nen Jesus ya samay toon labay toy manpaalagey na tori et nepeg ya ‘onyurong ni tan kuentaen toy nagastos’ pian naseguro to ya walay magenap a kuarta to ya panumpal ed samay tori. Imbaga met nen Jesus ya samay ari et nepeg ya ‘onyurong ni tan onkerew na simbawa’ pian nanengneng to no kasin sarag ya taloen na saray sundalo to iray kalaban da. (Basaen so Lucas 14:27-33.) Idadanet dia nen Jesus ya no say sakey et labay toy magmaliw ya disipulo to, nepeg ya usisaen to nin maong no kasin sarag ton gawaen iray responsabilidad na sakey ya disipulo. Pian nagawaan itan na saray iyaaralan tayo, ibaga tayod sikara ya importantin sinimba so panaral tayo. Panon tayon nagawaan itan?

6. Antoy salien tayon gawaen pian onaligwas iray iyaaralan tayo na Biblia?

⁶ Salim ya dukeyan so panaaral yo. Alimbawa, imbes ya sakey a teksto labat so pantongtongan yo, aruman mo ni sakey. No diad puerta labat so panaaralan yo tan apasal met la imay unabung ed andukey ya tongtongan, tepetan mo no walay lugar ya makayurong kayo tan diman yo ituloy so panaral yo. Ditan mo naamtaan no talagan importante ed sikato so panaaral toy Biblia. Insan tepetan mo no labay toy manaral ya mamidua ed sakey simba pian mas maples ya onaligwas. Pero wala ni kaukolan ya gawaen.

IPARAAN SO ARALEN YO

7. Panon so dugan pamparaan antis tayon mangiyaral na Biblia?

⁷ Lapud sika so mangiyaaral, manepeg labat ya manparaan kan maong antis kan mangiyaral. Basam so aralen yo pati saray teksto. Nepeg ya malinew ed sika iray manunan punto. Isip mo so title na aralen yo, saray subheading, saray tepet na kada parapo, saray teksto ya “basaen,” saray litrato, tan saray video ya makatulong pian malinew mon nipaliwawa so topic. Insan mo natan dalepdepen no panon mon nibangat so katuaan diad simpli tan malinew ya paraan pian mainomay ya talosan na iyaaralan mo tan niyaplika to ed bilay to.​—Neh. 8:8; Pro. 15:28a.

8. Antoy naaralan tayo ed samay imbaga nen apostol Pablo ya nabasa ed Colosas 1:9, 10 nipaakar ed pangipikasi ed saray iyaaralan tayo?

⁸ Agmo lilingwanan ya ipikasi ed si Jehova so iyaaralan mo—kaiba itan ed panagparaan. Ibagam ed si Jehova ya labalabay mon tulongan so iyaaralan mo tan labay mon nasabi so puso to diad panaral yo. (Basaen so Colosas 1:9, 10.) Isip mo la iray posiblin agto natalosan ya tampol odino mairap ton awaten. Tandaan mo ya iyaaralan mo ta labay mon natulongan ya onaligwas anggad manpabautismo.

9. Antoy gawaen na mangiyaaral pian nibangat ton manparaan so iyaaralan to? Ipaliwawa.

⁹ Labay tayo ya diad kada pangiyaral tayo et nanengneng na iyaaralan tayo iray maabig ya ginawa nen Jehova tan Jesus parad totoo tan lapud pisasalamat tod sikara et mas kabaten to ni ra. (Mat. 5:3, 6) Pian nagawa itan, kaukolan ya natatalosan na iyaaralan so aaralen to. Importante sirin ya iparaan to so kada leksion—basaen to la itan ya masakbay tan isipen to no panon to itan ya niyaplika ed bilay to. Panon mon nibangat ya manparaan? Saniba yon iparaan so sakey ya leksion tan ipanengneng mod sikato no panon so dugan pamparaan.d Ipaliwawam ed sikato no panon ton anapen so direktan ebat ed saray tepet na kada parapo. Ipanengneng mod sikato ya makatulong no markaan to ray manunan salita odino grupo na salita pian natandaan toy ebat. Insan mo paebatan ed sikato so tepet diad sarili ton salita. Nanengneng mod ebat to no talagan atalosan to imay parapo. Balet wala ni sarag mon ibangat ed iyaaralan mo pian lalon onaligwas.

BANGATAN YA ONDENGEL TAN MITONGTONG ED SI JEHOVA KADA AGEW

10. Akin et importante ya basaen ya inagew-agew so Biblia, tan antoy nepeg ya gawaen na iyaaralan pian talagan minabang ed pambabasa toy Biblia?

¹⁰ Say iyaligwas na iyaaralan et aglabat akadepende ed sinimban panaaral yo. Walay balibalin gawaen to kada agew​—nepeg ya sikatoy ondengel tan mitongtong ed si Jehova. Panon ton nagawaan itan? Sikatoy ondedengel ed Dios no basaen ton inagew-agew so Biblia. (Jos. 1:8; Sal. 1:1-3) Maabig no mangimprinta ka na “Eskedyul ed Panagbasa na Biblia” ya walad jw.org tan ibangat mo no panon ton usaren.e Balet siempre, pian talagan minabang ed pambabasa toy Biblia, ibagam ed sikato ya dalepdepen to iray nababasa to​—no antoy naaralan to nipaakar ed si Jehova tan no panon ton niyaplika ed bilay to.​—Gawa 17:11; Sant. 1:25.

11. Panon mon nibangat ed iyaaralan mo so dugan pampikasi, tan akin et importante ya sikatoy lanang ya manpikasi ed si Jehova?

¹¹ Ibagam ed iyaaralan mo ya importante ya manpikasin kada agew ta atan so paraan pian makapitongtong ed si Jehova. Panon mon nibangat ed sikato so dugan panagpikasi? Antis tan kayari na panaral yo, manpikasi ka manlapud puso tan bitlam so iyaaralan mo ed pikakasim. Kada no narengel toy pikakasim, naaralan to no panon so manpikasi manlapud puso tan naamtaan to ya si Jehova so nepeg ton pampikasian diad ngaran nen Jesu-Kristo. (Mat. 6:9; Juan 15:16) No inagew-agew ya basaen na iyaaralan mo so Biblia (ondengel ed si Jehova) tan manpikasi (mitongtong ed si Jehova), seguradon sikatoy lalon onapit ed Dios! (Sant. 4:8) No napasalan to lan gawaen iratan, nakaaro toy Jehova. Kanian onaligwas ed espiritual anggad idedika toy sarili to ed Dios tan manpabautismo.

TULONGAN YA NAKAARO TOY JEHOVA

12. Antoy nepeg ya gawaen na mangiyaaral pian say iyaaralan et aroen toy Jehova?

¹² Nepeg mon seguroen ya saray ibabangat mod iyaaralan mo et aglabat angangga ed isip to, noagta onsasabi met ed puso to. Akin? On ta no onsasabi ed puso to iray nanaaralan to, mainomay to lan iyaplika iratan. Maong ya manbangat si Jesus ta agto labat paniisipen iray totoon ondedengel ed sikato, noagta sasabien toy puso ra kanian apakiwas iran ontumbok ed sikato. (Luc. 24:15, 27, 32) Ontan met so nepeg mon gawaen. Tulongan moy iyaaralan mo ya natalosan ton mismo ya si Jehova et tuan Persona, ya sarag toy onapit ed Sikato, tan ipasen to ya Ama, Dios, tan Kaaro to. (Sal. 25:4, 5) Kanian no manaral kayo, lanang mon idanet iray ugali na Dios. (Exo. 34:5, 6; 1 Ped. 5:6, 7) Antokaman so topic ya pantotongtongan yo, ipaimanom no anton klase na Dios si Jehova. Nepeg ton natalosan ya si Jehova et maar-aro, maomaong, tan makasi ya Dios. Imbaga nen Jesus ya say “sankaimportantian tan unonan ganggan” et “arom si Jehova a Dios mo.” (Mat. 22:37, 38) Seguroen mo sirin ya diad kada panaral yo et natulongan moy iyaaralan mo ya aroen si Jehova.

13. Anto ni sarag mon gawaen pian natulongan mo so iyaaralan mo ya nakabkabat toy Jehova?

¹³ No maniistoryaan kayo na iyaaralan mo, ibagam ed sikato no akin ya inar-arom si Jehova. Ditan to nanengneng ya kaukolan to met so mikaaro ed Dios. (Sal. 73:28) Singa bilang, kasin walay abasam ed sakey ya publikasyon tayo odino teksto ed Biblia ya sinmabi ed pusom tan lapud satan et atalotalosan mo so sakey a kualidad nen Jehova​—say panangaro, karunongan, inkahustisya, odino pakapanyari to? Sarag mo itan ya istoryaen ed iyaaralan mo. Tan ibagam ed sikato ya atan so sakey ed saray dakdakel ya rason no akin ya inar-arom si Aman Jehova. Wala ni nepeg ya gawaen na saray iyaaralan pian onaligwas ira anggad bautismo.

PASESEG MON ONATENDI ED SARAY ARAL

14. Base ed Hebreo 10:24, 25, akin et mas maples ya onaligwas iray iyaaralan no miaral ira?

¹⁴ Labay tayon onsabi so panaon ya mandesisyon a manpabautismo so iyaaralan tayo. Say sakey ya importantin paraan pian nagawa itan et no pasesegen tayo ya miaral. Ibabaga na saray eksperiensyadon agagi ya mas maples ya onaligwas iray iyaaralan no onatendi ran tampol ed aral. (Sal. 111:1) Say gagawaen na arum ya agagi et ibabaga dad iyaaralan da ya mas dakel ni naaralan to no onatendi ed saray aral. Ibasam ed iyaaralan mo so Hebreo 10:24, 25. (Basaen) Ipaliwawam ed sikato no anto ray nagunggona to no miaral. Ipabantay mo so video ya Antoy Gagawaen Diad Kingdom Hall?f Tan no asali to lay miaral, ipaliwawam ed sikato no akin ya importantin miaral ya lanang.

15. Antoy gawaen tayo pian napaseseg tayoy iyaaralan tayo ya regular a miaral?

¹⁵ Antoy gawaen mo no say iyaaralan mo et agto ni asali akiaral odino agni regular ya mimiaral? Imbes ya bastam labat imbitaan ya miaral, mas marakep no istoryam ed sikato iray nanaaralan mo ed saray aral tayo. Ikdan moy Panag-bantayan odino Workbook ed Aral pian nanengneng to no anto ray aaralen tayo. Ipanengneng mod sikato no antoy topic diad onsublay ya aral tan tepetan mo no dinan so makapainteres ed sikato. Diad unonan iyatendi na iyaaralan mo, seguradon nagusgustoan to so panaaral tayo lapud aliwan ontan so pantitipon na arum ya relihyon. (1 Cor. 14:24, 25) Ditan et nakabat to ray agagi ya pakaaralan toy maong ya alimbawa ra tan natulongan da met ya onaligwas anggad bautismo.

16. Anto ray kaukolan tayon gawaen pian onaligwas anggad bautismo so iyaaralan tayo, tan antoy aralen tayo ed onsublay ya artikulo?

¹⁶ Base ed sayan artikulo, panon so pangiyaral tayo na Biblia pian onaligwas anggad bautismo so iyaaralan tayo? Kaukolan ya ipaamta tayod iyaaralan ya importante ya sinimba so panaral tan ibangat tayon manparaan. Pasesegen tayo met ya ondengel tan mitongtong ed si Jehova diad kada agew tan mikaaro ed Sikato. Imbitaan tayo ya onatendi ed saray aral. (Nengnengen so kahon ya “Saray Nepeg ya Gawaen na Iyaaralan.”) Dia balet ed onsublay ya artikulo, aralen tayo so limara ya nepeg nin gawaen na saray mangiyaaral pian natulongan da ray iyaaralan da ya onaligwas anggad bautismo.