Akin et Wala ray Pikakasi ya Agnaeebatan?

Say Ama tayod tawen, si Jehova a Dios, et labalabay ton dengelen iray nanlapud puso ya pikakasi tayo. Balet wala ray rason ya nayarin agto ebatan iray pikakasi tayo. Anto iratan? Tan antoy nepeg tayon nonoten no manpipikasi tayo? Nia ray pigaran ibabaga na Biblia ya kaukolan tayon gawaen.

Babasaen na sakey ya grupo ed simbaan so pikakasi ya walad prayer book.

“Sano manpipikasi ka, agmo uulit-uliten ya ibaga iray apasakey a bengatla.”—Mateo 6:7.

Aglabay nen Jehova ya ulit-uliten tayo so in-memorize ya pikakasi odino basaen iratan ed sakey ya prayer book. Imbes, labay to ya manpikasi tayo manlapud puso. Imadyin mo pa no antoy naliknam no say sakey ya kaarom et ulit-uliten toy ibaga to ed sika kada agew. Ibabalikas na sankaaro ed sakey tan sakey no anton talaga so nalilikna tan iisipen da. Kanian no manpipikasi tayo diad sarili tayon salita, ipapanengneng na satan ya kaaro tayo so Ama tayod tawen.

Akatangay so sakey ya laki legan ton kakaskasen so sakey ya ticket ed lotto.

“Sano onkekerew kayo, anggapoy naaawat yo lapud mauges so gagala yo.”—Santiago 4:3.

Seguradon ag-ebatan na Dios iray pikakasi tayo no say kekerewen tayo et aliwan unong ed panlabayan to. No say sakey et ipikasi ton sikato komoy nasuertean tan manalo ed sugal, kasin ebatan na Dios so pikakasi to anta kabusol na Dios so inkaagum tan panisia ed suerte? (Isaias 65:11; Lucas 12:15) Seguradon ag-ebatan nen Jehova itan ya pikakasi! Pian ebatan na Dios so pikakasi tayo, kaukolan tayon seguroen ya say kerew tayo et mitukoyan ed no antoy ibabaga na Biblia.

Ipipikasi na sakey ya pari so sakey a grupo na saray sundalo.

“Samay agto labay ya unoren so ganggan—anggan say pikakasi to et makapadimla.”—Proverbio 28:9.

Diad panaon na Biblia, ag-inebatan na Dios so pikakasi na saramay mangibabaliwala ed saray matunong iran ganggan to. (Isaias 1:15, 16) Siansian ontan so nalilikna to anggad natan. (Malaquias 3:6) No labay tayon ebatan na Dios iray pikakasi tayo, kaukolan tayon unoren iray ganggan to. Panon to balet no wala ray agawaan tayon lingo nensaman? Labay to kasin ibaga ya aglan balot dengelen nen Jehova iray pikakasi tayo? Siempre andi! Maaron perdonaen itayo na Dios no pagbabawian tayo iratan tan pansagpotan tayoy manbilay diad paraan ya makapaliket ed sikato.—Gawa 3:19.