Panon Kan Natulongan na Pikakasi?

“Nen tatambalen so kanser ko, natatakot ak ya maong,” so imbaga nen Pamela. “Balet nen nampikasi ak ed si Jehova a Dios, kinmalma so liknaan ko tan akapannonot ak na duga. Siansia nin naliliknak so graben sakit, balet akatulong so pikakasi pian magmaliw ak ya positibo. No tetepeten ak na totoo no kumusta lay liknaan ko, kuan ko, ‘Agak ni inmabig pero siansia nin maliket ak!’”

Siempre, agla kaukolan ya alagaren tayo ni ya walay graben sakit tayo insan tayo labat manpikasi. Amin tayo et ondadalan ed saray subok, melag man odino baleg, kanian kaukolan tayoy tulong pian nasarag iratan. Kasin makatulong so pampikasi?

Ibabaga na Biblia: “Ipasakbat mod si Jehova so ambelat ya awit mo, tan tulongan to ka. Agton balot paulyan a natumba so matunong.” (Salmo 55:22) Talagan makapabiskeg itan! Kanian panon ya makatulong so pikakasi? No manpikasi ka ed Dios diad dugan paraan, iter tod sika so kaukolan mon tulong pian nasarag iray problemam.​—Nengnengen so kahon ya “No Antoy Nitulong ed Sika na Pikakasi.”